Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 12

12-тӥ ЛЮКЕТ

1Озьыен, агай-вынъёсы, Инмар асьмеды гажа-жаля. Соин ик тӥледыз сюлворыса курисько: асьтэлэсь быдэс улондэс дун-сьӧлыктэм, ярамон карыса, курбонэз кадь Инмарлы сётэлэ. Та луэ, визьмын валаса, Инмарлы ужаса-тыршыса улон.2Туала вапумысь улонлэн куронъёсызлы тупатскыны турттыса эн улэ. Нош тӥ асьтэлэсь лулдэс-сюлэмдэс выльдэ-воштэ, тодыны мед быгатоды: мае тӥлесьтыд Инмар возьма, кыӵе уж Солы ӟеч, ярамон, дун-шектэм луэ.

3Инмарлэн сётэм дэлетэныз котькуддылы мон шуисько: кӧня сётэмын, солэсь вылӥе асьтэдыз эн пуктэ. Инмарлэн котькуддылы сётэм осконэзлэн мертэтэзъя, зӥбыт-востэм кариськыса, визьмо малпанэн улэ.4Уго, кызьы одӥг мугорамы трос люкетъёсыз, но котькудӥзлэн люкетлэн аслаз кулэлыкез,5озьы ик асьмеос но: асьмеос трос ӵошен, нош Христосэн огазе кариськиськомы ке, соку одӥг мугор кылдытӥськомы, нош нимамы ке – ог-огмылы пӧртэм люкетъёс луиськомы.6Инмарлэн асьмелы сётэм дэлетэныз асьмелэн пӧртэм пумо быгатонлыкъёсмы вань: Инмарлэсь кылзэ ивортон, – сое осконлэн куронэзъя-косонэзъя лэсьты;7юрттӥськыса улӥсь ке тон, юрттӥськыса ул; дышетӥсь ке, дышетыса ул;8буйгатӥсь ке, буйгаты; сёткась ке, вылтӥяськытэк сётка; кивалтӥсь ке, тыршыса кивалты; ӟеч уж лэсьтӥсь ке, ӟеч ужез капчи мылкыдын лэсьты.

9Яратонды чылкыт сюлмысьтыды потэмын мед луоз; урод ужез адӟонтэм каре, ӟечез борды лякиське;10агай-вынъёс кадь, гажаса ог-огеныды улэ; мукетъёссэ асьтэ сярысь умоесьгес луо шуыса лыдъялэ.11Тыршыса, дугдылытэк, духеныды ӝуатскыса, Кузё-Инмарлы ужалэ.12Оскиськонды ваньлы шумпотэ. Куректон-кайгу лыктыку, чидасесь луэ. Дугдылытэк вӧсяськыса улэ.13Вӧсяськисьёс шуге-леке сюрыку, соослы юрттӥське. Пыдйылчиосты гуртады вайыса сюдэ-вордэ.14Тӥледыз уллясьёсты-ултӥясьёсты бакель каре; эн юриське, эн каргаське, бакель каре.15Шумпотӥсьёсын ӵош шумпотэ, бӧрдӥсьёсын ӵош бӧрдэ.16Куспады огкылысь, тупаса улэ. Асьтэдыз вылӥе эн пуктэ, востэмъёслэсь-зӥбытъёслэсь адӟем карыса улэ. Асьтэдыз асьтэос визьмоесь-йӧноесь шуыса эн лыдъялэ.17Нокинлы но уродлы пумит уродэн пунэмзэ эн берыктэ. Вань адямиослы ӟеч лэсьтон сярысь сюлмаське.18Быгатэмдыя вань адямиосын тупаса улэ.19Гажаноосы, тӥледлы урод лэсьтӥсьёслы пунэмзэ эн берыктэ, Инмарлэн вожпотонэзлы инты кельтэ. Гожтэмын уго: «Мон – пунэм берыктӥсь, Мон пунэмзэ берыкто, – шуэ Кузё-Инмар».20Тӥ лэсьтэ тазьы: «тушмонэд сютэм ке, сюд сое; сюэз куасьме ке, секта сое. Тазьы лэсьтыса, солэн йыр вылаз кисьтыны ӝуась эгыръёс дасялод».21Уродлыклы вормыны эн сётӥськы, уродлыкез ӟечлыкен вормы.


предыдущая глава Глава 12 следующая глава