Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 11

11-тӥ ЛЮКЕТ

1Озьыен, мон юасько: «Оло нош Инмар Аслэсьтыз калыксэ палэнтӥз?» Ӧз, нокызьы но ӧз. Мон но уго израиль пи, Авраамлэн кидысэз бордысь, Вениамин выжыысь.2Инмар Аслэсьтыз калыксэ ӧз палэнты, сое Со азьвыл ик тодӥз. Оло, тӥ уд тодӥське, мар шуэ Священной Гожтэм Илия сярысь вераназ? Кызьы со, Илия, Израиль вылэ ӝожтӥськыса, Инмарлы шуэ:3«Кузё-Инмаре! Тынэсьтыд пророкъёстэ виылӥзы, курбон сётон ӝӧкъёстэ куашкатъязы. Мон огнам кыли, табере мынэсьтым лулме быдтыны утчало».4Мар бен солы Инмар шуэ: «Мон Аслым Вааллы йыбыртъясьтэм сизьым сюрс муртэ ути».5Инмарлэн гажан-жалянэныз та дыръёсы но быръем люкет возиське на.6Инмарлэн гажан-жалянэз пыр ке, соку ужъёсъя ӧвӧл; малы ке шуоно соку ини гажан-жалян дугдэ гажан-жалян луэмысь. Нош ужъёсъя ке, со гажан-жалян ӧвӧл ни, уго соку уж но уж ӧвӧл ни.7Мар бен? Израиль мае утчаз, сое ӧз шедьты. Быръемъёс шедьтӥзы. Нош мукетъёс чурыт-вог сюлэмоесь луизы,8кызьы гожтэмын:

«Инмар соослы умме усён духез ыстӥз;
синъёс сётӥз, кудъёсыныз уг адӟо, пельёс,
кудъёсыныз уг кыло туннэ нуналозь но».

9Давид но шуэ:

«Сиён-юон ӝутыкузы, сьӧлтэтэ, вотэсэ, кыӵесэ мед сюрозы,
пунэм берыктон соос вылэ мед вуоз!
10Син азьзы пеймыт мед луоз, медаз ни адӟе;
сюрлызэс пырак ӵожелы куасалты».

11Озьыен, юасько: иудейёс, оло, пырак ӵожелы усён понналы-а, канжаськизы? Ӧз, пырак ӵожелы ӧз. Но иудейёслэн усеменызы сэрен соос пушкын сюлмаськон-тыршонэз бугыртон понна язычникъёслы утиськон лыктӥз.12Нош соослэн усёнзы дунне понна узырмон ке, начармонзы но язычникъёс понна узырмон луэ, соку нош тыр луонзы эшшо но бадӟымгес узырмон луоз.

13Тӥледлы, язычникъёслы, верасько: мон язычникъёслэн апостолзы луисько, со уженым мон данъяськисько.14Лулмугорыя ас выжы калыкме сюлмаськыса-тыршыса улонлы уг-а вырӟыты, соос пӧлысь куд-огзэс уг-а быгаты утьыны?15Соослэн куштӥськонзы дуннелы Инмарен тупаса улон вайиз ке, соку мар луоз, соосты Инмар кабыл карыса кутӥз ке, – кулэмысь улӟыса улон ӧвӧл-а со?16Вӧсяны ваем нырысез емыш дун-чылкыт луиз ке, соку ваньмыз кылемез но емыш дун-чылкыт луэ. Писпу выжыос дун-шектэмесь ке, соку вайёсыз но дун-шектэмесь.

17Улвайёс пӧлысь куд-огзэ чигыса уськытылӥзы но тонэ, ас эркад будӥсь кыр вӧйпуэз, соос интые лякизы ке, соку тон, лякиськем улвай, вӧйпулэн выжыеныз но солэн сокеныз вожектыса сылӥськод.18Чигтылэм улвайёс азьын астэ вылӥе эн пукты. Астэ вылӥе пуктӥськод ке, соку тодад вай: тон выжыез уд возиськы, выжы тонэ возе.19Шуод: «Улвайёсты чигтылӥзы монэ лякон понна».20Умой. Соос оскымтэзы понна чигтэмын вал, нош тон осконэд ванен лякиськыса возиськиськод. Кышкаса ул, эн вылтӥяськы.21Уго Инмар вӧйпулэсь бордаз будэм ас вайёссэ ӧз жаля бере, учкы, жалялоз-а тонэ?!22Озьыен, эн вунэты: Инмар ӟечлыко но, кылэз юн юаны быгатӥсь но луэ. Куштӥськисьёслэсь кылзэс юн юа. Нош тон Солэн ӟечлыкезлы оскиськыса улӥд ке, ӟечлык басьтод. Озьы ӧд ке улы, тон но ӵогыса куштэмын луод.23Соос но оскытэк ӧз ни ке улэ, лякемын-бурмытэмын луозы, малы ке шуоно соосты нош ик лякыса бурмытыны Инмарлэн бадӟым кужымез вань.24Уго тон ас эрказ будӥсь кыр вӧйпу бордысь ӵогыса уськытэмын ке вал, но кылдэмедъя ярантэм луыса вылысь ӟеч вӧйпу борды лякиськид бере, соку, чик вераськытэк ини, кылдэмзыя аслаз луись, но ӵогыса уськытэм вайёссэ Инмар ас пудзы борды лякоз-бурмытоз.

25Агай-вынъёсы, та ватӥськыса улӥсь зэмлыкез тӥледлы усьтэме потэ, асьтэ сярысь укыр вылӥ малпанды медаз кылды шуыса. Язычникъёслэн лыдзы тырмыт луыса пырытозьлы, – со дырозьлы Израильлэн оглюкетэз Инмарлы тэрытскытэк вог сюлмын улоз.26Соку быдэс Израиль утиськоз, кызьы гожтэмын:

«Сӥонысь Мозмытӥсь лыктоз но
Иаковлэн калыкез бордысь
сьӧлыклэсь кышкатэк улонэз палэнтоз;
27соослэсь сьӧлыкъёссэс быдтӥ ке,
соку Аслэсьтым та сӥзён-косонме соослы сёто».

28Ӟеч Иворез кабыл басьтымтэзы понна Инмар азьын соос тӥ понна тушмонъёс луизы. Но соос – Инмарлэн быръем калыкез. Вашкала атайёссылы луыса Инмар соосты яратэ.29Уго Инмар Аслэсьтыз сётэм кузьымъёссэ берен уг басьты, быръем адямиосызлэсь уг куштӥськы.30Кызьы тӥ но вазен Инмарлэсь кылзӥськисьтэмесь вал, нош табере соослэн кылзӥськымтэзы понна тӥляд сьӧлыкъёсты куштэмын.31Табере соос но тӥляд сьӧлыкъёсты куштӥськем понна кылзӥськисьтэмесь луизы, – асьсэлэн но сьӧлыкъёссы куштэмын мед луозы шуыса.32Ваньмызлэсь сьӧлыкъёссэс куштон понна Инмар ваньзэс кылзӥськытэк улонлэн жильыетаз возиз.

33Э, Инмарлэн тодонэзлэн, визьлыкезлэн пыдэстэм узырлыкез! Валаны луонтэмесь Солэн судъёсыз, эскерыны луонтэмесь Солэн сюресъёсыз!

34Кузё-Инмарлэсь визьзэ тодыны кин быгатӥз ни?
Яке кин Солэн визь-кенеш сётъясез вал?
35Яке кин Солы, пунэмез берыктэмын мед луоз шуыса,
азьвыл ик мар ке но сётӥз?

36Уго ваньмыз Со бордысь, Со пыр, Со понна. Солы пумтэм вапумъёсы дан! Аминь.


*а 11:12 татын вераськон мынэ духовной узырмон сярысь


предыдущая глава Глава 11 следующая глава