Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 9

9-тӥ ЛЮКЕТ

1Мон Христослэн адямиез, соин ик мае верасько, – со зэм. Уг ӧрекчаськиськы, Святой Духен тыр улӥсь сюлэмы но со сярысь вера.2Туж бадӟым кӧтӝожен улӥсько, чик дугдылӥсьтэм куректон мынам сюлмам улэ.3Агай-вынъёсы, лулмугорзыя мыным ӵыжы-выжы луисьёс понна анафема басьтыны но Христослэсь люкемын луыны но мон дась.4Со – израиль калык уго, соосты Инмар Аслыз нылпилы бырйиз, соослы данлык, сӥзён-косонъёс, закон, храмын вӧсяськон, сӥзиськонъёс сётӥз.5Соослэн атайёссы – патриархъёс. Соос дорын лулмугорын Христос вордскиз. Со – ваньмызлы Инмар луэ, пумтэм вапумъёсы ушъяно-данъяно, аминь.

6Инмарлэн кылыз медаз быдэсмы, – озьы ноку но уг луы. Израиль атай бордысь потэмъёс но ваньзы Израильлы зэмос нылпи уг луо,7Авраам атай бордысь потэмъёс но ваньзы зэмос нылпи уг луо. Инмар Авраамлы шуиз уго: «Исаак бордысь потэмъёс тынад кидысэд-выжыед шуыса нимаськозы».8Мукет сямен вераса, ваньмыз Авраамлэсь вордскем нылпиос но Инмар нылпи шуыса уг нимасько. Израильлэн зэмос нылпиосыз шуыса нимасько Инмарлэн сӥзиськемез пыр вордскем нылпиос гинэ.9Нош сӥзиськонын тазьы шуэмын: «Вуоно арын та дыре ик лыкто, соку Сарралэн пи нуныез вордскемын луоз ини».10Одӥг та гинэ ӧвӧл. Тазьы ик Ревеккаен но луиз, куке со атаймылэсь, Исааклэсь, кыкто нылпи вайыны секытэн луиз.11Соос ӧз на вордске на вал, номыр ӟечсэ но, уродзэ но ӧз на лэсьтэ, – Инмарлэн бырйыны эрикез12ужъёс бордысь уг поты, со Ӧтисьлэн эрикез бордысь потэ. Ревеккалы верамын вал: «Бадӟымез пиед покчиезлы ляльчи радын улоз».13Кызьы гожтэмын но: «Иаковез Мон яратӥ, нош Исавез адӟонтэм кари».

14Мар бен шуомы? Оло, Инмар дорын шонертэм ужъёс? Ӧвӧл. Нокызьы но ӧвӧл.15Уго Инмар Моисейлы шуиз: «Кинлы ӟеч кареме потӥз, солы ӟеч каро; кинэ жаляме потӥз, сое жаляло».16Озьыен, ужпум со бордын ӧвӧл, мар каремез потэ, мар лэсьтыны тырше адями, нош ваньмыз Инмарлэн гажась-жалясь киулаз возиське.17Уго Священной Гожтэм фараонлы шуэ: «Тон вылын Аслэсьтым кужымме возьматон понна, Мынэсьтым нимме быдэс дунне выл мед тодоз шуыса, Мон тонэ, вылӥ карыса, эксэе пуктӥ».18Тӥни озьы, кинлы Солэн ӟеч каремез потэ, ӟеч каре; нош кинлэсь сюлэмзэ чурытомытэмез потэ, сое вог сюлэмо каре.

19Тон мыным шуод: «Мар понна эшшо соку Со кинэ ке янгыше уськытэ на? Уго кин Солэн эрикезлы пумит султыны быгатоз?»20Нош тон адями, кин тон сыӵе, Инмарен ченгешиськод? Горшок горшок лэсьтӥсьлы шуоз-а: «Малы тон монэ тазьы лэсьтӥд?»21Горшок лэсьтӥсь уг быгаты шат одӥг нелькем сюйысь ик одӥгзэ сосудзэ чылкыт маке возён понна, нош мукетсэ кырсь маке возён понна лэсьтыны?22Озьы ик Инмар но Аслэсьтыз кужымзэ, йыркурзэ возьматыны мылкыд кариз, но туж кема чидаса улӥз сузмытыны дасям, ”йыркуръяськон поттӥсь сосудъёссэ”.23Но Со тае чидаз Аслаз ”гажано-жаляно сосудъёсыз” понна, кудъёсызлы Со Аслаз пиштӥсь данлыкезлэсь быдӟымлыксэ возьматыны мылкыд кариз, – соослы, кудъёссэ Со азьпал данлык басьтонлы дасяз.24Асьмеды, иудейёс пӧлысьёсты гинэ ӧвӧл, язычникъёс пӧлысьёсты но Со ӧтиз уго.25Кызьы Осия пророк пыр Инмар шуэ:

«Аслэсьтымтэзэ калыкез Аслам шуо, яратымтэзэ яратэм шуо;
26со интыын, кытын соослы шуэмын вал:
”Тӥ Мынам калыке ӧвӧл”, –
табере соосты Улэп Инмарлэн пиосыз шуозы».

27Нош Исаия Израиль сярысь шуэ: «Лыдынызы израиль пиос зарезьысь луо мында ке но луизы, оглюкетэз гинэ утиськоз.28Кузё-Инмар музъем вылын быдэстоно ужез пумозяз ӝегатскытэк, шонер йылаз-пумаз вуттоз».29Кызьы Исаия азьпалзэ тодытыса вераз:

«Кузё-Инмар Саваоф кидыс-выжы асьмелы ӧй ке кельтысал,
асьмеос Содом кадесь луысалмы, Гоморралы укшасесь луысалмы».

30Мар бен шуомы? Шонере потонэз утчасьтэм язычникъёс шонере потон басьтӥзы. Оскон пыр шонере потон.31Нош закон пыр шонере потонэз утчась Израиль шонерлыклэн законэз дорозь ӧз вуы.32Малы? Малы ке шуоно шонере потонэз оскон бордысь ӧз, законлэн ужъёсыз бордысь утчазы. Канжаськон из борды соос канжаськизы,33кызьы гожтэмын:

«Тани, Сӥонэ канжаськон из, визь сынаськон из понӥсько;
нокин но Солы оскись мурт возьытэ уз усьы».


предыдущая глава Глава 9 следующая глава