Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 8

8-тӥ ЛЮКЕТ

1Озьыен, табере Иисус Христос бордын улӥсьёслы, лулмугорлэн куронэзъя ӧвӧл, Духлэн валтэмезъя улӥсьёслы, нокыӵе но суд ӧвӧл ни,2малы ке шуоно улон вайись Духлэн законэз Иисус Христос пыр сьӧлыклэн законэзлэсь но кулонлэсь монэ мозмытӥз.3Уго лулмугорлэн лябеныз сэрен закон кужымтэм вал, соин ик Инмар Аслэсьтыз Пизэ сьӧлыко лулмугорлы укшась лулмугорын сьӧлыклы пумит ыстӥз но лулмугор бордын улӥсь сьӧлыкез судэ сётӥз.4Асьме бордын, лулмугорлэн куронэзъя ӧвӧл, Духлэн валтэмъяз улӥсьёс бордын законэн гожтэм шонерлык мед быдэсмоз.5Уго лулмугорлэн куронэзъя улӥсьёс лулмугорлэн кулэяськонъёсыз сярысь малпасько, нош Духлэн валтэмезъя улӥсьёс – Духен улон сярысь малпасько.6Лулмугорлэн кулэяськонъёсызъя улон кулонэ-быронэ нуэ, нош Духлэн валтэмезъя улон улэп улон но каньыллык вае.7Лулмугорлэн кулэяськонъёсыз сярысь сюлмаськись адями Инмарлы пумит тушмонъяськыса улэ; уго Инмар законлы со уг тэрытскы, уг но быгаты тэрытскыны.8Соин ик лулмугорлэн кулэяськонъёсызлы тэрытскыса улӥсьёс Инмарлы ярамонэсь уг луо.9Инмарлэн Духез зэмзэ ик тӥ пушкын улэ ке, тӥ лулмугорлэн куронъёсызъя уд улӥське, Духлэн валтэмезъя улӥськоды. Кинлэн бордаз Христослэн Духез ӧвӧл ке, со Солэн муртэз уг луы.10Христос тӥ пушкын улэ ке, соку мугор сьӧлык пыр кулэмын луэ, нош дух улэп улэ шонер улон пыр.11Иисусэз кулэмысь улӟытыса Султытӥсьлэн Духез тӥ пушкын улэ ке, соку Христосэз кулэмысь Улӟытӥсь тӥ пушкын улӥсь Аслаз Духеныз тӥлесьтыд но кулэм мугоръёстэс улӟытоз.

12Озьыен, агай-вынъёсы, асьмеос лулмугорлэн пунэм тыроно муртъёсыз ӧвӧл, асьмелы лулмугорлэн кулэяськонъёсызъя улыны уг яра.13Уго лулмугорлэн кулэяськонъёсызъя улӥськоды ке, соку кулоды, нош лулмугорлэсь сьӧлыко ужъёссэ Духлэн юрттэменыз виылӥды ке, соку улэп кылёды.14Ваньмыз, Инмарлэн Духезлэсь кылзӥськыса улӥсьёс, Инмарлэн нылпиосыз луо;15малы ке шуоно тӥляд басьтэм Духты со зӥбетын улонлэн духез ӧвӧл, кудӥз тӥледыз эшшо но кышкатыса мед возьысал. Озьы ӧвӧл, уго тӥледлы сётӥськем Дух тӥледыз Инмарлэн нылпиосыз кариз! Со Духен ик асьмеос вазиськиськомы: «Авва, Атае!»16Асьмеос Инмарлэн нылпиосыз шуыса, Ачиз та Дух асьмелэн духенымы ӵош иворто.17Нош нылпиосыз ке, соку люкет басьтӥсьёс но, Инмарлэн люкет басьтӥсьёсыз, Христосэн ӵош люкет басьтӥсьёс луо. Соин ӵош курадӟиськомы ке, Соин ӵош данэ но потомы.

18Малпасько, туннэ нуналысь та огдырлы сётӥськем курадӟонъёсмес ӵошатыны но уг луы вуоноеныз, асьме пушкын усьтӥськоно данлыкен.19Инмарлэн кылдытэм дуннеез чидатэк вите Инмар нылпиослэсь данлыксылэсь усьтӥськонзэ, –20малы ке шуоно вань кылдытэм макеос ас мылкыдзыя сисьмоно-быроно улон киулэ ӧз сётске, – соос понна сыӵе вал Инмарлэн эрикез,21Инмар нылпиослэн кадь ик данлыко эрикез басьтон понна вань кылдытэм макеос сисьмонлэн зӥбет улысьтыз мозмытэмын луозы шуыса оскиськыса уло.22Тодӥськомы, кызьы вань кылдытэм дунне туннэ нуналозь нуны вайись кадь ӝуштэ, курадӟе.23Со гинэ ӧвӧл, асьмеос но, Духез – Инмарлэсь нырысетӥ кузьымзэ – басьтӥсьёс, Инмарлэсь асьмеды Аслыз нылпи каронзэ витьыса, ас мугормылэсь мозмытонзэ возьмаса, асьмеос но лулынымы-сюлмынымы лулӟылӥськомы.24Уго асьмеос оскиськон пыр утемын. Нош оскиськон, кудӥз быдэсмемын ни, со оскиськон ӧвӧл: адями мае ас синмыныз адӟе ке, соку кулэ на-а солы оскиськон?25Нош асьмеос оскиськиськомы ке солы, мае ум адӟиське, соку чидаса возьманы кулэ.

26Лябӟыса улонъёсмы дыръя Дух но асьмелы юрттэ. Уго асьмеос ум тодӥське мар сярысь, кызьы кулэ вӧсяськыны, нош Дух, асьме понна кыл вератэк лулӟиськылыса, асьмелы дурбасьтэ.27Сюлэммес Эскерись тодэ Духлэсь малпанзэ, малы ке шуоно Со вӧсяськисьёс понна дурбасьтэ, озьы, кызьы кулэ Инмарлы.28Нош асьмеос тодӥськомы: Инмарез яратӥсьёслы, Солэн Ас эрикезъя ӧтемъёслы ваньмыз ӟечлы берытске.29Уго соосты Со кылдэмзылэсь азьло ик тодӥз но Аслаз Пиезлы укшась луыны эрик сётӥз. Озьы Солэн Пиез трос агай-вынъёс пӧлын нырысь вордскем Нуны луиз.30Кинъёсты Со азьло ик бырйиз, соосты ик ӧтиз. Нош кинъёсты ӧтиз, соосты шонере поттӥз. Нош кинъёсты шонере поттӥз, соосты ик данэ поттӥз.

31Мар бен талы шуод на? Инмар асьме палан ке, кин асьмелы пумит луыны быгатоз?32Нокин но уз. Уго Со, Кудӥз Аслэсьтыз Пизэ ӧз жаля, асьме понна Сое курадӟыны сётӥз, соку кызьы бен Соин ӵош асьмелы ваньзэ мукетсэ но уз кузьма?33Инмарлэсь быръемъёссэ кин янгыше уськытыны быгатоз? Нокин но уз. Инмар соосты шонере поттэ.34Кин соосты судить каре? Нокин но уг. Христос Иисус кулӥз, но улӟыса султӥз. Со Инмарлэн бурпалаз, Со ик асьме понна дурбасьтэ.35Христослэн яратонэзлэсь кин асьмеды люкоз: куректон-кайгу-а яке ёртыса возён, яке улляса возён, яке сютэм улон, яке куанере кылён, яке кышкытлык, яке меч? Кызьы Священной Гожтэмын шуо:

36«Тон понна нуналлы быдэ милемыз виыло;
милемыз вандыны дасям ыжъёс шуыса лыдъяло».

37Но ваньзэ тае асьмемыз Яратӥсьлэн кужыменыз вормиськомы.38Мон уго юн оскисько: кулон но, улон но, Кылчинъёс но, Кутсконъёс но, Кужымъёс но, туннэ нунал но, вуоноез но,39ӝуждала но, мурдала но, нокыӵе но мукет кылдытэм маке но асьмемыз Инмарлэн яратонэзлэсь люкыны уз быгатэ, кудӥз улэ Кузё-Инмармы Иисус Христос бордын.


предыдущая глава Глава 8 следующая глава