Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 7

7-тӥ ЛЮКЕТ

1Агай-вынъёсы, оло, тӥ уд тодӥське-а, – законэз тодӥсьёслы тае верасько, – адями улэп дыръя гинэ закон соин кузёяськыны быгатэ шуыса?2Шуом, бызем кышномурт улэп кузпалыз борды законэн думемын; нош кузпалыз кулӥз ке, со мозмытске картэз борды думыса возись законлэсь.3Соин ик, улэп кузпалыз вань дыръя мукетызлы бызиз ке, азэм мурт шуыса нимаськоз. Нош кузпалыз кулыса, мукетызлы бызе ке, со законлэсь мозмытскемын но, сое азэм мурт шуыны уг ни луы.4Озьы ик тӥ но, агай-вынъёсы, Инмарлы емыш мед ваёмы шуыса, Христослэн мугорыз пыр, кулэмысь Улӟыса Султэмлэн киулаз сюрон понна, законлы кулӥды.5Уго, куке лулмугорлэн куронъёсызъя улӥмы, соку законэн лӧпкытэм сьӧлыко ӝуатскем мылкыдъёс кулонлэсь емышсэ ваён понна мугор люкетъёстӥмы ветлӥзы.6Нош табере закон понна кулыса, кудӥз асьмеды пленын возе вал, асьмеос солэсь мозмытскимы, вашкала вужмем буквая ӧвӧл, нош духен выльдӥськыса, асьмеос Инмарлы служить мед каромы шуыса.

7Мар бен шуомы? Закон бордысь-а потэ сьӧлык? Уг, нокызьы но уг, закон юрттэмен гинэ мон тодӥ, мар со сьӧлык. Закон ӧй ке шуысал: «Кулэ эн кары», сыӵе кулэ каронъёсты мон ӧй но тодысал.8Нош сьӧлык, курон-косон пыр муг шедьтыса, мон пушкы котькыӵе но мылкыд каронъёс кылдытӥз. Уго закон ке ӧвӧл, сьӧлык но улэп ӧвӧл.9Куке но мон законэз тодытэк улӥ. Нош куке курон-косон лыктӥз, соку сьӧлык улӟиз,10нош мон кулӥ. Улон ваён понна сётэм курон-косон мыным кулон вайиз,11малы ке шуоно сьӧлык, муг шедьтыса, курон-косон пыр монэ ӧрекчаз но со пыр ик монэ вииз.12Озьыен, закон святой луэ. Курон-косон но святой, шонерлыко, ӟечлыко.

13Соку, ӟечлыко закон мыным кулон вайиз-а? Ӧз, нокызьы но ӧз! Но сое сьӧлык вайиз, кудӥз ассэ возьматӥз сыӵеен, кыӵе со зэмзэ ик вань: ӟечлыко закон пыр мыным кулон вайиз. Озьыен, курон-косон пыр ӟеч валаны луэ, макем сьӧлыко-юрӟым со сьӧлык.14Уго асьмеос тодӥськомы, Инмар закон духовной луэ шуыса. Нош мон луллэсь-мугорлэсь кылдэмын но сьӧлыклэн киулаз вузамын.15Мон уг валаськы, мар лэсьтӥсько; малы ке шуоно мае лэсьтэме потэ, сое уг лэсьтӥськы, нош мае синазькыль-адӟонтэм карисько, сое лэсьтӥсько.16Нош лэсьтӥсько ке сое, мае лэсьтэме уг поты, соку мон законэз шонерлыко шуыса лыдъясько.17Зэмзэ ке верано, сое мон уг лэсьтӥськы, мон пушкын улӥсь сьӧлык лэсьтэ.18Тодӥсько уго мон пушкын, мынам лулмугорам, ӟечез уг улы шуыса; малы ке шуоно ӟеч лэсьтыны мылкыды вань, но сое лэсьтыны уг лэсьтӥськы.19Ӟечез, кудзэ лэсьтэме потэ, уг лэсьтӥськы, нош уродэз, кудзэ лэсьтэме уг поты, лэсьтӥсько.20Лэсьтӥсько ке сое, мае лэсьтэме уг поты, соку мон сое уг ни лэсьтӥськы, мон пушкын улӥсь сьӧлык сое лэсьтэ.

21Таӵе югдурен пумиськоно луисько: ӟечез лэсьтэме потыку, мон борды урод думиське.22Лулыным-сюлмыным мон Инмар законлы шумпотӥсько;23нош мугор люкетъёсысьтым мукет законэз адӟисько, со визьмылэн законэзлы пумитъяське но монэ мугор люкетъёсам интыяськем сьӧлык законлэн киулаз кутыса возе.24Куанер мискинь адями мон! Кин монэ та кулоно мугорлэсь мозмытоз?25Инмарелы тау карисько – сое Со Кузё-Инмармы Иисус Христос пыр лэсьтӥз.

Озьы, ачим мон визьмыным Инмар законлы тыршисько, нош лулмугорыным сьӧлыклэн законэзлы ужасько.


предыдущая глава Глава 7 следующая глава