Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 5

5-тӥ ЛЮКЕТ

1Озьыен, оскон пыр шонере потыса, Кузё-Инмармы Иисус Христос пыр табере асьмелэн Инмарен тупаса улонмы вань.2Осконмы ванен Иисус пыр асьмеос дэлет басьтонэ пырыны быгатӥсьёс луимы. Со дэлетэн улӥськомы но Инмарлэн данлыказ пыронлы оскиськонэн ушъяськиськомы.3Таин гинэ ӧвӧл, куректон-кайгуосын но ушъяськиськомы. Тодӥськомы уго: куректон-кайгу бордысь чидан потэ.4Чидан бордысь быгатон-тодон потэ, быгатон-тодон бордысь – оскиськон,5нош оскиськон возьытэ уг вутты, малы ке шуоно Инмар Аслэсьтыз яратонзэ асьмелы сётэм Святой Дух пыр сюлэмъёсамы кисьтэ.

6Уго Христос, асьмеос, сьӧлыкоос понна, куке асьмеос кужымтэмесь на вал, Инмарлэн тупатэм дыраз кулӥз.7Уго шонер улӥсь понна кин ке но кулоз меда; нош ӟеч лэсьтӥсь понна, оло, кин ке но кулыны дӥсьтӥсь вань?8Но Инмар Аслэсьтыз асьмемыз яратэмзэ та пыр возьматӥз: Христос асьме понна кулӥз, куке асьмеос сьӧлыкоесь на вал!9Соин ик Солэн Вирыз пыр асьмеос, шонере потэмъёс, уката табере, Со пыр Инмарлэн вожпотонэзлэсь утемын луомы.10Уго, эшшо тушмонъяськыса улон вакытамы Солэн Пиезлэн кулонэз пыр асьмелэн Инмарен кусыпъёсмы тупатскизы. Табере, уката ик кусыпъёсмы тупатскем бере, Иисуслэн улонэз пыр утиськон басьтомы.11Та гинэ ӧвӧл! Асьмеос Инмарен ушъяськиськомы, нош та ушъяськонмы Кузё-Инмармы Иисус пыр луиз, Со валлин асьмелэн Инмарен кусыпъёсмы тупатскизы.

12Соин ик, кызьы одӥг адями пыр дунне вылэ сьӧлык пыриз, нош сьӧлык пыр кулон лыктӥз, соин сэрен кулон вань адямиос доры вуиз, малы ке шуоно вань адямиос сьӧлыказы.13Уго закон сётон дырозь но дунне вылын сьӧлык вал; нош закон ӧвӧлтэм дыръя сьӧлык янгыш каронлы уг гожтӥськы.14Адам бордысен Моисей дырозь но кулон кузёяськыса улӥз, Адамлэн йыружезлы тупась сьӧлык лэсьтымтэос вылын но. Адам Лыктонолэн (Иисуслэн) тусбуез луэ.

15Но Инмарлэн дэлетэзлэн кузьымез йыружлы уг укша. Уго одӥг адямилэн йыруженыз сэрен трос муртъёс быризы ке, соку уката, Инмарлэн дэлетэз но одӥг Адямилэн, Иисус Христослэн, дэлето кузьымез тросэз вылын пачылмыса улэ.16Инмарлэсь кузьымзэ Адамлэн сьӧлыкаменыз ӵошатыны но уг луы. Уго огезлэн одӥг гинэ йыружез судэ, янгыш карыса виёнэ вуттӥз, нош дэлетлэн кузьымез, трос йыружъёслэсь мозмытыса, шонере потон вайиз.17Одӥг муртлэн йыруж лэсьтэмез понна кулон кузёяськыса улыны кутскиз ке, соку уката ик одӥг Адями пыр, Иисус Христос пыр, кузёяськыса улозы Инмар дорысь туж бадӟым дэлет но шонере потон басьтӥсьёс.18Зэм ик, кызьы одӥг муртлэн йыружез вань адямиосты судэ сётонэ вуттӥз, озьы ик одӥг Адямилэн шонерлыко ужез вань адямиосты судысь мозмытэ но соослы улон сётэ.19Уго кызьы одӥг муртлэн кылзӥськымтэеныз сэрен трос адямиос сьӧлыко луизы, озьы ик Одӥг Адямилэн кылзӥськонэз троссэ адямиосты шонер улӥсь кароз.20Закон берло пыриз, йыруж мед йылоз шуыса. Нош кытын сьӧлык йылӥз, отын Инмарлэн гажан-жалянэз туж бадӟым луиз.21Кызьы сьӧлык бӧрсяз кулонэз вайыса кузёяськыса улыны кутскиз, озьы ик Инмарлэн но гажан-жалянэз шонер улон пыр валтыса улыны кутскоз но Кузё-Инмармы Иисус Христос пыр быронтэм улонэ нуоз.


предыдущая глава Глава 5 следующая глава