Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 3

3-тӥ ЛЮКЕТ

1Озьыен, иудей луонлэн вань-а вылӥлыкез, вандӥськонлэн нош мар пайдаез?2Котьмар ласянь но вылӥлыко луыны мугзы вань. Нырысь ик, соослы Инмар кыл оскемын.3Мар-о бен? Куд-огъёсыз Инмарлы оскиськымонэсь ӧй ке вал, соослэн оскиськымон луымтэзы быдтоз-а Инмарлэсь оскиськымон луонзэ?4Нокызьы но уз. Котькудӥз но адями – ӧрекчи, нош Инмар оскиськымон, Священной Гожтэмын верамын:

«Кыланэд-веранэд Тынад шонерлыко,
суд нуналад вормись луод».

5Нош асьмелэн шонертэм ужъёсмы Инмарлэсь шонерлыксэ эшшо но мургес усьто ке, оло нош Инмар шонертэм лэсьтэ, куке вожпотонзэ асьме вылэ кисьтэ? Тае адями визьмын верасько.6Ӧвӧл, озьы ӧвӧл. Озьы ке луысал, соку кызьы Инмар дуннеез судить карыны быгатысал?7Нош мынам шонертэм ужъёсы пыр Инмарлэн зэмлыкез будэ, Солэсь данзэ эшшо но вылӥе ӝутэ ке? Соку мар понна монэ сьӧлыко мурт шуыса судить кароно на?8Оло нош ӟечлык мед кылдоз шуыса, урод ужъёс лэсьтоно? – Кызьы куд-огез ми сярысь урод кылъёс вӧлдо но шуо, ми, пе, солы дышетӥськомы. Таӵе муртъёслы но шонер суд дасямын.

9Мар-о бен? Асьмеос, иудейёс, мукет калыкъёслэсь умоесьгес-а? Чик но ӧвӧл! Уго ми оскымон возьматӥмы ни, кызьы ке иудейёс, озьы ик эллинъёс но – ваньзы сьӧлыклэн киулаз шуыса.10Священной Гожтэмын шуэмын:

«Шонер лэсьтӥсез чик ӧвӧл, одӥгез но ӧвӧл;
11валасез но ӧвӧл; нокин но Инмарез уг утча;
12ваньмыз шонер сюрес вылысь кожизы,
номырлы ярантэмесь луизы:
ӟечсэ лэсьтӥсь ӧвӧл, одӥг адями но ӧвӧл.
13Соослэн ньылонзы – усьтӥськем шайгу;
кылынызы ӧрекчасько; сьӧд кыйлэн ядэз кыл улазы.
14Кылзы-ымзы каргаськонэн, лекъяськонэн пачылмемын.
15Вир кисьтыны пыдъёссы шаплыесь;
16соослэн ортчем бервылазы куашкан но бырон кыле;
17тупаса улонлэсь сюрессэ соос уг тодо.
18Соослэн син азязы Инмарлэсь кышкан ӧвӧл».

19Но ми тодӥськомы, закон мар ке вера ке, со Инмар законлы тэрытскыса улоноослы вера, ваньмыз ымъёссэс мед ворсалозы но быдэс дунне выл Инмар азьын янгыш мед луоз шуыса,20малы ке шуоно законлэн куронъёсызъя лэсьтэм ужъёсыныз нокудӥз но адями Инмар азьын шонере уз поты; уго Инмар закон пыр сьӧлыкез тодыны кутскиськод.

21Нош али, закон сяна, Инмарлэн шонерлыкез усьтӥськиз. Со сярысь закон но, пророкъёс но иворто.22Инмар азьын шонере потон Иисус Христослы оскон пыр ваньмыз понна, ваньмызлы оскисьёслы сётӥське, нокинэ но висъятэк-люкытэк,23малы ке шуоно ваньмыз сьӧлыке пыремын, Инмарлэн данэзтэк кылемын,24нош Аслаз гажан-жалянэныз Инмар ваньзэ шонере поттӥз, Иисус Христос пыр соосты сьӧлыкъёслэсь мозмытӥз.25Инмар Сое курбон луонлы дасяз ваньзэ Солы оскисьёсты Солэн Вирыныз дун-чылкыт карон понна. Тазьы Инмар Аслэсьтыз шонерлыксэ возьматӥз: азьвыл лэсьтэм вань сьӧлыкъёсты Со куштӥз26Аслаз кема чидаса улон дыръяз. Аслэсьтыз шонерлыксэ али дыре возьматӥз: Со Ачиз шонер лэсьтӥсь, Со ик Иисуслы оскисьёсты шонере поттӥсь.

27Маин бен табере ушъяськыны быгатӥськомы? – Номырин но. Со быдтэмын. – Кыӵе законэн? Ужъёсты курись законэн? – Ӧвӧл, оскыны косӥсь законэн.28Ми лыдъяськомы уго, законлэн ужъёсызтэк но, оскон пыр адями шонере потыны быгатэ шуыса.29Нош Инмар, оло, иудейёслэн гинэ Инмарзы, язычникъёслэн ӧвӧл? – Озьы ӧвӧл. Язычникъёслэн но Со Инмарзы.30Инмар – одӥг. Со вандӥськемъёсты осконзыя шонере поттэ, вандӥськымтэосты но, осконзы ке вань, шонере поттэ.31Озьыен, ми законэз оскон пыр, оло, быдтӥськомы? – Нокызьы но ум быдтӥське. Ми законэз юнматӥськомы оскон пыр.


предыдущая глава Глава 3 следующая глава