Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 2

2-тӥ ЛЮКЕТ

1Соин ик, мукет муртэ судить кариськод ке, тынад но сьӧлыкед уг куштӥськы. Уго кыӵе судэн мукетсэ судить кариськод, сыӵеен ик астэ но судить кариськод, малы ке шуоно мукетсэ судить кариськод, нош ачид соос кадь ик лэсьтӥськод.2Ми тодӥськомы, таӵе ужъёсты лэсьтӥсьёс понна Инмарлэн судэз вань, со зэмлыко суд.3Таӵе ужъёсты лэсьтӥсьёсты судить кариськод, нош ачид со ужъёсты ик лэсьтӥськод ке, Инмарлэн судэзлэсь ватӥськыны тон быгатод шат?4Оло, тон кулэтэм кариськод Инмарлэсь туж бадӟым ӟечлыксэ, гажан-жалянзэ, кема чиданзэ? Уд валаськы шат, Инмарлэн ӟечлыкез тонэ ӧпкельыса сьӧлыкъёслэсь куштӥськонэ нуэ шуыса?5Нош тон вог сямыныд, ӧпкелисьтэм сюлмыныд вожпотон нуналлы, Инмарлэн шонерлыко судаз ас вылад вожпотон люкаськод.6Инмар котькудӥзлы солэн ужезъя берыктоз.7Ӟеч ужъёс лэсьтылыса, Инмар дорысь дан, сӥ-сан, быронтэм улон утчасьёслы Со пумтэм вапумъёсы улон сётоз.8Нош асьсэды яратыса, вогъяськыса, зэмлыклы тэрытскытэк, урод ужъёс лэсьтыса улӥсьёс вылэ Со вожпотонзэ, йыркурзэ кисьтоз.9Урод лэсьтӥсь вань адями лулъёс куректон-кайгу чидано, курадӟоно луозы, нырысь ик, иудей, собере – мукет калыкъёс но!10Котькудӥзлы ӟеч лэсьтӥсьлы дан, сӥ-сан, каньыллык, нырысь ик, иудейлы, собере – мукет калыкъёслы но!11Уго Инмарлэн, огзэ яратыса, мукетсэ ултӥян сямыз ӧвӧл.

12Кинъёслы закон сётэмын ӧй вал но соос сьӧлыказы ке, соос законтэк ик бырозы но. Нош кинъёс законэз тодыса вылысь сьӧлыке пыризы ке, соос законъя ик судэ но сюрозы, –13малы ке шуоно законэз кылзӥсьёс ӧвӧл, законэз быдэсъясьёс Инмар азьын шонере поттэмын луозы.14Законзы ӧвӧло язычникъёс шӧдон-валанзыя законысь косонъёсты быдэсъяло ке, соос асьсэлы асьсэос закон, асьсэлэн гожтэм законзы ке но ӧвӧл.15Соос соин законлэн ужез соослэн сюлмазы гожтэмын шуыса возьмато. Со сярысь ик вера соослэн возьытлыксы, куке соос малпанъёсынызы огзэс огзы я янгыше уськыто, я шонере потто.16Инмарлэн адямиослэсь лушкем ужъёссэс Иисус Христос пыр судить карон нуналаз луоз озьы, кызьы мон тодытӥ Ӟеч Иворъя.

17Тани, тон иудей шуыса нимаськиськод, тон закон вылэ оскиськыса улӥськод, Инмарен ушъяськиськод.18Солэсь эриксэ но тодӥськод. Инмар законлы дышетскыса, тон тодыны быгатӥськод, мар со ӟечлык, мар со уродлык.19Тон малпаськод, синтэмъёслы валтӥсь, пеймыт азьын улӥсьёслы югытлык,20нодтэмъёслы валэктӥсь, пиналъёслы дышетӥсь луиськод шуыса. Тынад кияд тырмыт тодон-валан, зэмлык сётӥсь закон вань шуыса оскиськод.21Мукетъёссэ дышетӥськод, нош малы тон астэ ачид уд дышетӥськы?22«Эн лушка» шуиськод но, лушкаськиськод? «Азыса-калгыса эн улы» шуиськод но, нош ачид азыса-калгыса улӥськод? Сульдэръёслэсь-идолъёслэсь юрдӥсько шуиськод, нош ачид соослэн куалаосысьтызы лушкаськиськод?23Инмар законэз тодэменыд ушъяськиськод, нош ачид, со законэз сӧрыса, Инмарез сантэмаськод?24Уго Священной Гожтэмын шуэмын: «Тӥледын сэрен язычникъёс Инмарлэсь нимзэ ултӥяло».25Вандӥськон сямез быдэстон соку пайдаё, куке законэз быдэсъяськод. Нош тон законэз сӧрыса улӥськод ке, соку тынад вандӥськемед вандӥськымтэ луэ.26Озьыен, вандӥськымтэ мурт Инмар законлэсь косонъёссэ быдэсъя ке, соку солэсь вандӥськымтэзэ вандӥськем шуыса, Инмар уз гожты-а?27Вандӥськон сямез ортчытӥсьтэм калык Инмар законэз быдэсъяса улэ ке, со тонэ, закон тодӥсь, вандӥськон сямез ортчытӥсь но Инмар законэз сӧрыса улӥсь иудеез, судить кароз.28Уго зэмос иудей ӧвӧл со, кин вылтусызъя гинэ иудей. Зэмос вандӥськон но ӧвӧл со, кудӥз вылласянь, мугор вылын гинэ.29Ӧвӧл! Зэмос иудей со, кудӥз лулыныз-сюлмыныз иудей луэ. Вандӥськон но зэмосэз со, кудӥз сюлэмын. Законлэн куронэзъя ӧвӧл, духен лэсьтэмын. Таӵе адямиез калык уз ушъя, Инмар ушъялоз.


предыдущая глава Глава 2 следующая глава