Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПАВЕЛ АПОСТОЛЛЭН РИМ КАРЫН УЛӤСЬЁСЛЫ ЫСТЭМ ГОЖТЭТЭЗ

Глава 1

1-тӥ ЛЮКЕТ

1Павел, Иисус Христослэн ляльчиез, Инмарлэсь Ӟеч Иворзэ тодытыны быръем апостолэз.2Инмар Аслаз пророкъёсыз пыр Священной Гожтэмъёсын Ӟеч Иворзэ сётыны азьвыл ик сӥзиз.3Та Ивор Солэн Пиез сярысь, асьмелэн Кузё-Инмармы Иисус Христос сярысь. Адями лулмугорын Со Давидлэн кидысэз бордысь вордскиз.4Духезъя – Со Инмар Пи. Инмар Пи луонэз бадӟым кужымен возьматэмын вал – Солэн кулэмысь улӟыса султонэз пыр.5Иисус Христос пыр ми дэлет но апостол луон басьтӥмы, Солэсь нимзэ дано карон, вань калыкъёсты Солы оскон пала берыктон понна.6Иисус Христослэн ӧтемъёсыз пӧлын тӥ но луиськоды.7Ваньмызлы Инмарлэн яратоно, вӧсяськисьёс радэ ӧтем, Римын улӥсь муртъёсызлы: Инмар Атаймылэн но Кузё-Инмарлэн Иисус Христослэн дэлетэз, каньыллыкез тӥ бордын мед улоз.

8Нырысь ик, ваньды понна, тӥляд осконды быдэс дунне выллы тодмо луэм понна Иисус Христос пыр Инмарелы тау карисько;9одӥг Инмар тодэ, кызьы мон вань лулыным-сюлмыным Солэн Пиез сярысь Ӟеч Иворез тодытонын тыршисько. Тӥ ялан мынам сюлмам улӥськоды.10Ялан вӧсяськыса курисько, тӥ доры куке но лыктыны Инмаре ӟеч эриксэ мед сётысал шуыса.11Мынам тӥледыз туж адӟеме потэ: тӥледыз юнматон понна кыӵе ке но духовной кузьым тӥледлы сётыны мед быгатом,12мукет сямен вераса, асьмелэн огъя осконэнымы огмес огмы юнматыны мед быгатомы шуыса.13Агай-вынъёсы, мынам тӥледыз тодытытэме потэ: мукет калыкъёс дорын кадь ик тӥ дорын но ас ужелэсь емышсэ бичаны мед быгатысал шуыса, мон трос пол тӥ доры лыктыны малпасько вал ини, но та дырозь ялан кыӵе ке но могӟетъёс сюрылӥзы.14Эллинъёслы но, варваръёслы но, визьмоослы но, нодтэмъёслы но мынам пунэм тыронэ вань.15Озьыен, мон сярысь ке верано, тӥледлы но, Римын улӥсьёслы, Ӟеч Иворез тодытыны мон дась.

16Иисус Христос сярысь Ӟеч Иворез тодытыны мон уг возьдаськиськы, уго со Инмарлэн кужымез луэ. Со вань оскись муртъёсты уте, нырысь ик, иудейёсты, собере – мукетъёссэ калыкъёсты но.17Евангелиын Инмарлэн шонерлыкез осконысь осконэ усьтӥське. Гожтэмын уго: «Шонер улӥсь оскон пыр улэп улоз».

18Инмысен Инмарлэн вожпотонэз зэмлыкез ёртыса-ӝикатыса возись адямиослэн котькуд сьӧлыксылы, лек ужзылы пумит ваське.19Уго Инмар сярысь мар тодыны луоно, соослэсь ватэмын ӧвӧл: Инмар соослы Ачиз сярысь Ачиз тодытӥз.20Дуннеез кылдытэм дырысен туннэ нуналозь Солэсь ужъёссэ чакласа-эскерыса адӟыны луэ синмын адӟыны луонтэм макеоссэ – Солэсь пумтэм вапумъёс улӥсь кужымзэ но Инмар луонзэ, соин ик соослэн асьсэзыз шонере поттэмзы уг луы.21Инмар луонзэ тодыса вылысь Сое Инмарез кадь ӧз данъялэ, тау но ӧз каре, нош визьмынызы укылтэммизы, валасьтэм-нодтэм сюлэмзы сьӧдэкмиз.22Асьсэды визьмоесь шуо вал, нош асьсэос визьзэс ыштӥзы.23Бырисьтэм Инмарлэсь пиштӥсь данлыксэ соос сисьмыса бырись адямилэн, тылобурдоослэн, ньыль пыдын ветлӥсьёслэн, нюж кыстӥськисьёслэн тусбуйзылы укшась сульдэръёслы-идолъёслы йыбыртъянэн воштӥзы.

24Соин ик соосты Инмар асьсэлэн сьӧлыко мылкыд каронъёссылэн киулазы сётӥз но, соос ог-огенызы мугоръёссэс юрӟым ужен саптаны кутскизы.25Инмар зэмлыклэсь палэнэ кожыса, соос ӧрекчи ужъёс пала берытскизы. Пумтэм вапумъёс ӵоже зэм ик данъяно Кылдытӥсьлы интые, кылдытэм макеослы йыбыртъяны, ужаны кутскизы.26Соин ик Инмар соосты возьдаськоно юрӟым кулэ каронъёс кие сётӥз. Соослэн кышномуртъёссы кышномуртъёсын ик азон-калгон сьӧлыке пырылӥзы.27Со выллем ик пиосмуртъёссы но. Кышномуртэз кулэ каронлэсь палэнтӥськыса, огзы вылэ огзылэн мылкыдзы лӧптылӥз: пиосмуртъёс пиосмурт вылын юрӟым азон сьӧлык лэсьто. Асьсэлэн йыромем ужзы понна соослы пачылаз пунэм берыктӥське.

28Инмарез визьмынызы тодэмзы потымтэ понна Инмар соосты йырчукин берытскем визьзылэн киулаз сётӥз. Соин ик соос лэсьто сое, мае лэсьтыны уг яра.29Соос котькыӵе сьӧлыко ужъёсын пачылмемын: азыса-калгыса улон, лекъяськон, кӧттырмостэмъяськон, урод ужъёсын сӧриськон, вожъяськон, адями виылон, керетыса-даллашыса улон, пӧяськон, кескич сямо луон.30Соос лек кылоесь, юнме кыл вӧлдӥсесь, Инмарез адӟонтэм карисесь, ултӥясесь, ушъяськисесь, вылӥ мылкыдоесь, котькыӵе уродэз кылдытыны быгатӥсесь, анай-атайлэсь кылзӥськисьтэмесь,31укылтэмесь, оскыны луонтэмесь, вожпотонэн улӥсесь, жалянэз тодӥсьтэмесь.32Инмар законъя таӵе ужъёсты лэсьтӥсьёс виыны ярамонэсь луо шуыса, соос тодо, нош асьсэос, соосты лэсьтэм гинэ ӧвӧл, озьы лэсьтӥсьёслэсь мылкыдзэс лӧпкытъяло на.


предыдущая глава Глава 1 следующая глава