Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИУДА АПОСТОЛЛЭН ЫСТЭМ ГОЖТЭТЭЗ

Глава 1

1Иуда, Иисус Христослэн ляльчиез, Иаковлэн братэз, ӧтиськем муртъёслы, кинъёс Инмар Атай бордын дун-чылкыт луэмын, Иисус Христосэн утемын.2Гажаса-жаляса, тупаса, яратыса улон тӥ пӧлын мед йылозы.

3Гажаноосы! Асьмелэн огъя утиськонмы сярысь тӥледлы гожтыны бадӟым мылкыды ванен, мон тӥледлы таӵе курон гожтоно шуыса малпай – вӧсяськись калыклы пырак ӵожелы сётэм осконэз утьыны тыршыса ужалэ.4Уго куд-ог сьӧлыклэсь кышкасьтэмъёс, асьмелэн Инмармылэсь дэлетсэ азыса улон пала берыктӥсьёс, одӥг гинэ Кузё-Атаймылэсь Инмарлэсь но Кузё-Инмармылэсь Иисус Христослэсь куштӥськисьёс лушкемен асьме пӧлы пыризы – соослэн суд улэ сюронзы сярысь вашкала дауръёсы ик гожтэмын вал ини.

5Мынам тӥледлы, тае тодӥсьёслы, тодады вайытэме потэ: Кузё-Инмар израиль калыкез Египетысь мозмытӥз, нош бӧрысь соос пӧлысь оскымтэосты быдтӥз.6Кылчинъёсты но, кудъёсыз Инмарлэсь соослы сётэм вылӥлыко луонзэс утьыны ӧз быгатэ, асьсэлэсь улон интызэс куштыса кошкизы – соосты пырак вапумъёс ӵоже пеймыт азьын туж бадӟым нуналлэн судэз дыръялы жильыетын думылыса возе.7Кызьы Содомен Гоморра но соос вӧзысь городъёс, соос выллем ик азон-калгон сьӧлык пӧлы усемъёс, пиосмурт пиосмуртэн, кышномурт кышномуртэн сьӧлыке пырисьёс, чик кысылӥсьтэм тыл пӧлы курадӟонэ сюризы – мукетъёссэ алон понна.

8Чылкак озьы ик луоз таосын но – лулмугорзэс саптасьёсын, кузёосты кулэтэм карисьёсын, вылӥ властьёсты урод кылъёсын тышкаськисьёсын.9Моисейлэн мугорыз пумысен ченгешон потэм бере Михаил архангел диаволэн вераськиз, но сое со пыкылыса судить карыны ӧз дӥсьты, но шуиз: «Кузё-Инмар тонэ судить мед кароз».10Нош таос мае уг тодо, со сярысь урод кыл верало. Кылдэмзыя валасьтэм пудо-животъёс выллем, мае тодо, соин асьсэды сисьто-быдто.11Куректон-кайгу соослы, малы ке шуоно Каинлэн сюрестӥз мыно, Валаам кадь кузьым октон сьӧлыке пыро но Корей выллем асьсэлэн вогъяськон сямынызы быро.12Таӵеос тӥляд гажаса-яратыса улонлы сӥзем ӝытъёсады возьытэз валасьтэм сурон бамъёс луо. Тӥледын валче кышкатэк сиыса-юыса, асьсэды куайыто. Соос – тӧлэн нуллӥськись вутэм пилемъёс; ишкалтэм, кык пол кулэм, емыш сётӥсьтэм сӥзьыл писпуос;13асьсэлэн юрӟым макеосынызы шукыяськись, лекъяськись зарезь тулкымъёс; йыромыса калгись кизилиос, соослы пумтэм вапумъёслы пеймытлэн пеймытэз дасямын.

14Соос сярысь Енох но, Адам бордысен сизьыметӥез, азьпалзэ тодытыса вераз: «Тани, Аслаз туж трос сюрс святой Кылчинъёсыныз Кузё-Инмар лыктэ –15соос пӧлысь вань сьӧлыклэсь кышкасьтэмъёслэсь ваньзэ сьӧлыклэсь кышкатэк лэсьтэм урод ужъёссэс Со шарае поттоз; сьӧлыклэсь кышкасьтэмъёслэсь Солы пумит верам вань лек кылъёссы понна – ваньмызлы суд лэсьтоз».16Таослы номыр но уг яра вал, соослэн номырин но кӧтсы ӧз тырылы, мугорзылэсь юрӟым кулэ каронзэ быдэсъяса улӥзы (сьӧлыклэсь кышкатэк, законлы пумит); вылтӥяськыса вераськылӥзы, асьсэлы пайда басьтон понна адямиос азьын чеберъяськыса улӥзы.

17Нош тӥ, гажаноосы, тодады возе Кузё-Инмармылэн Иисус Христослэн апостолъёсызлэсь азьвыл ик верамзэс:18соос тӥледлы веразы, кызьы берпум аръёсы мугорзылэн юрӟым кулэ каронъёссылы сётӥськыса улӥсь мыскылляськисьёс потозы.19Та адямиос люкиськонъёс-висъяськонъёс ваё, соос – таизлэн дуннелэн адямиосыз, соос бордын Святой Дух ӧвӧл.20Нош тӥ, гажаноосы, асьтэдыз святойлэсь но святой осконды бордын юнматыса возе, Святой Духен тыр луыса вӧсяськыса улэ.21Инмарез яратыса улэ, Кузё-Инмармылэсь Иисус Христослэсь гажан-жалянзэ пумтэм вапумъёслы басьтонэз оскиськыса возьмалэ.22Куд-огзэ, осконзы лябен шонаськисьёсты, жалялэ,23нош мукетъёссэ кышкаса уте, соосты тыл пӧлысь поттэ, сьӧлыкъёссэс шарае поттэ, но со дыре ик соослэсь кышкалэ, саптаськем мугорзы вылын возиськись дӥськутсы борды йӧтӥськыны ик юрдэ.

24Нош тӥледыз усёнлэсь утьыны, Аслаз пиштӥсь данлыкез азе дун-шектэм, шумпотонэн пачыл карыса пуктыны Быгатӥсьлы,25Одӥг гинэ визьмолэсь но визьмо Инмармылы Утисьмылы Иисус Христос Кузё-Инмармы пыр вапумъёслэн кутсконысенызы данлык, быдӟым луон, кужым, кузё луон али но, котьку но пумтэм вапумъёсы. Аминь.


*а 1:8 таосын – татын вераськон мынэ ӧрекчи дышетӥсьёс сярысь;

*б 1:8 вылӥ властьёсты – татын вераськон мынэ Ин кужымъёс сярысь


предыдущая глава Глава 1 следующая глава