Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПЕТР АПОСТОЛЛЭН ЫСТЭМ КЫКЕТӤ ГОЖТЭТЭЗ

Глава 2

2-тӥ ЛЮКЕТ

1Калык пӧлын ӧрекчи пророкъёс но вал, кызьы тӥ пӧлын но ӧрекчи дышетӥсьёс луозы ай. Соос быронэ нуись осконэз тугась-пожась дышетонъёсты лушкемен пыртозы но соосты мозмытӥсь Кузё-Инмарлэсь куштӥськозы, озьы соос асьсэлы асьсэос ӝог бырон шедьтозы.2Тросэз соослэн сӧриськем сюрес вылазы султозы, соосын сэрен зэмлыклэсь сюрессэ сантэмалозы.3Асьсэлы узырлык люкан понна, кескич кылъёсын вераськыса, тӥледыз сьӧлтэтазы кутылозы. Соослы суд кемалась дась ини, бырон чассы но умме усьыса уг улы.

4Сьӧлык лэсьтэм кылчинъёсты Инмар ӧз жаля, адлэн пеймыт гуаз куштӥз, суд нуналозьлы возьмасьёс киулэ сётӥз.5Вашкала дуннелэсь муртъёссэ Со ӧз жаля, нош тямыс лулъёсын ӵош шонерлыкез тодытӥсь Ноез но солэсь семьязэ утиз, куке сьӧлыклэсь кышкамтэослэн дуннезы вылэ ву нюртон лэзиз.6Азьланьысь сьӧлыклэсь кышкасьтэмъёс понна мар луонэз возьматыса, Содом но Гоморра каръёсты быдтыны судить кариз, пеньлы пӧрмытӥз.7Нош законлы пумит ортчыт азыса-калгыса улӥсь адямиос пӧлын улыса жадем шонер улӥсь Лотэз мозмытӥз.8Уго та шонер улӥсь, соос пӧлын улыса, соослэсь законлы пумит ужъёссэс адӟыса, кылыса, аслаз шонерлыко лулыныз-сюлмыныз нуналлы быдэ курадӟиз.

9Кузё-Инмар Ачиз тодэ, кызьы чылкыт сюлэмо, оскыса улӥсьёсты визь сынаськонлэсь мозмытыны, нош законлы пумит улӥсьёсты – вӧсь карон понна суд нуналозь пытсэтын возьыны, –10уката ик соосты, кинъёс мугорзылэн юрӟым куронъёсызлы сётӥськыса уло, кузёе пуктэмъёсты адӟемпотостэм каро, возьытэз уг валало, ас тодэмзыя лэсьто, вылӥос сярысь урод кылъёс вераны уг кышкало.11Та виын ик, Кылчинъёс юнлыкенызы, кужмынызы соослэсь вылӥын ке но, Кузё-Инмар азьын соос вылэ сантэмась кылъёс соос уг верало.12Та адямиос валасьтэм, кутыса быдтон понна вордскем пудо-живот выллемесь. Мае уг тодо, со сярысь урод кылъёс верало. Азыса-саптаськыса улэмзы понна соос быдтэмын луозы, бырозы.13Законлы пумит улэмзы понна соослы пунэм берыктӥськоз. Уго соос нуналлы быдэ эзылыса, майбыр улонэз утчало. Возьыттэмъёс, дунне саптасьёс, ӧрекчаськыса соос эзылон басьто, тӥледын огазьын сиё-юо.14Азыса-калгыса улӥсьёс шоры соослэн синъёссы мыльккиськемын, дугдытэк сьӧлыкало. Быдэ вуымтэ лулъёсты соос либатыса пӧяло. Сюлэмзы азыса-калгыса улонлы дышемын. Соос – каргам нылпиос.15Шонер сюрес вылысь кожыса, соос йыромизы но Восорлэн шонертэм ужысь барыш басьтонэз яратӥсь Валаам пиезлэн пытьы кузяз кошкизы.16Но со, законлы пумит уж лэсьтыкуз, шарае поттэмын вал: вераськисьтэм ишак, адями кылын вазьыса, пророклэсь укылтэм уж лэсьтонзэ дугдытӥз.

17Та – вутэм ошмесъёс, сильтӧллэн кужмысь нуоно пилемъёсыз, – соослы пумтэм вапумъёс ӵожелы тём пеймыт инты дасямын.18Уго соос ӧрекчи кылъёсын азон-калгон сьӧлыке, жоб улонэ кыско йыромыса улӥсьёс пӧлысь мырдэм гинэ палэнскем муртъёсты.19Асьсэос быронэ нуись улонлэн ляльчиосыз луыса вылысь соослы эрик сётом, шуо. Уго кин маин вормемын, со солы ик ляльчи.20Кузё-Инмармес, Утисьмес Иисус Христосэз, тодэм беразы та дуннелэн юрӟым ужъёсызлэсь палэнско ке, нош собере выльысь соос пӧлы сьӧлтасько но пограло ке, соку нырысетӥез сярысь, берпуметӥез сьӧлыксы эшшо уродгес луэ.21Соослы сётэм святой курон-косонлэсь куштӥськыса, берен со ужазы ик кошкытозь, зэмлыклэсь сюрессэ ӧй ке тодысалзы, соослы умойгес луысал.22Нош соосын пӧрмиз озьы, кызьы пыӵкылыса веранын шуэмын:

«Пуны аслаз ӧскем дораз берытске»,
«Миськем парсь дэрие погылляськыны мынэ».


предыдущая глава Глава 2 следующая глава