Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПЕТР АПОСТОЛЛЭН ЫСТЭМ НЫРЫСЕТӤ ГОЖТЭТЭЗ

Глава 3

3-тӥ ЛЮКЕТ

1Озьы ик тӥ но, кышномуртъёс, асьтэлэн кузпалъёстылы тэрытскыса улэ. Инмар кыллы тэрытскытэк улӥсь воргоронъёс, кышнооссылэсь улонзэс адӟыса, кылъёсын индылытэк, Инмар пала берытскозы,2адӟизы ке тӥлесьтыд чылкыт, Инмарлэсь кышкаса улондэс.3Тӥляд чеберъяськонды вылласянь медаз луы – йырси пунон, зарни арбериосты ошылонъёс, кильтрес дӥськут.4Адямилэн сюлэм пушказ бырытэк мед улоз зӥбыт, востэм дух: тӥни мар дуно Инмар азьын.5Куке но озьы ик Инмарлы оскиськыса, вӧсяськыса улӥсь кышномуртъёс но, кузпалъёссылэсь кылзӥськыса, асьсэды чебертылӥзы,6кызьы Сарра, Авраамлы тэрытскыса, сое ”кузёе” шуылӥз. Ӟеч уж лэсьтӥськоды но номырлэсь но уд ке кышкаське, тӥ солэн нылпиосыз луиськоды.

7Вӧсяськемды иназ мед мыноз шуиськоды ке, тӥ но, воргоронъёс, кышноосыныды асьтэдыз визьмо возе – кынартэм сосудэн кадь. Тӥледын ӵош соос но дэлето улон басьтоно муртъёс бере, соосты санэ понэ.

8Озьыен, ваньды тӥ одӥг малпанэн, гажаса-жаляса, ог-огдэс яратыса, лякыт сямо луыса, зӥбыт-востэм визьмын улэлэ.9Уродлы пумит уродэн яке керетонлы пумит керетыса пунэмзэ эн берыктэ. Нош тӥ, эшшо ке, бакель каре, тодэ: со понна уго тӥ ӧтемын, – бакель каронэз басьтыны.

10Уго, кин улонэз яратэ но ӟеч нуналъёсты адӟемез ке потэ,
кылзэ уродлэсь мед кутоз,
ымзэ кескич вераськонъёслэсь мед утёз.
11Уродлэсь мед палэнскоз но ӟеч уж мед лэсьтоз;
тупаса улонэз мед утчалоз но со пала кариськыны мед тыршоз.
12Уго Кузё-Инмарлэн синмыз шонер улӥсьёс шоры учке;
Солэн пельыз – вӧсяськемзы палан,
нош Кузё-Инмарлэн ымнырыз
уродэз лэсьтӥсьёслы пумит берытскемын
(соосты музъем вылысь быдтон понна).

13Ӟеч лэсьтыны тыршисьёс ке тӥ луиды, кин тӥледлы уродзэ лэсьтоз?14Шонерлык понна курадӟоно луиды ке но, тӥ шудоесь. Соослэн кышкатонзылэсь эн курдалэ, кер но эн потэ.

15Асьтэлэн сюлмады Инмарез Кузё-Инмарез сӥё-дано возе. Оскиськонды пумысен котькудӥзлы кылдэс юасьлы востэмен, гажась мылкыдын ответ сётыны котьку но дась луэ.16Сюлэмды чылкыт мед луоз, тӥледыз йыруж лэсьтӥсьёсты кадь урод кылъёсын верамзы понна Христос бордын чылкыт улэмдэс сантэмасьёс возьытэ вуттэмын мед луозы шуыса.17Уго, Инмарлэн эрикезлы ярамон ке, урод ужъёс лэсьтыса курадӟон сярысь, ӟеч ужъёс понна, эсьмаса, мед курадӟод.18Уго асьмеды Инмар доры ваён понна, асьмелэн сьӧлыкъёсмы понна, Христос но одӥг пол курадӟон адӟиз. Сьӧлыкоос понна Шонер Улӥсь мугорыныз виемын, нош духеныз улӟытэмын вал.19Со духеныз лэзиськыса пытсэтэ ворсам духъёслы тодытӥз, –20соослы, кудъёсыз куке но соосты возьмась Инмарлэн кема чиданэзлы тэрытскисьтэмесь вал. Ной улон нуналъёсы, ковчег пыж лэсьтон вакытэ, тямыс лул гинэ ву пыр утиськыны быгатӥзы.21Нош со ву али но асьмеды уте, пылатонлы со укша. Пылатон – мугорлэсь кырсьсэ миськон понна ӧвӧл, со Инмарлы чылкыт сюлмын улыны сӥзиськон. Со Иисус Христослэн улӟыса султонэз пыр асьмелы утиськон сётэ,22Кудӥз, Инме ӝутӥськыса, Инмарлэн бурпалаз улэ. Солы Кылчинъёс, Властьёс но Кужымъёс тэрытскыса йыбырттӥзы.


предыдущая глава Глава 3 следующая глава