Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПЕТР АПОСТОЛЛЭН ЫСТЭМ НЫРЫСЕТӤ ГОЖТЭТЭЗ

Глава 2

2-тӥ ЛЮКЕТ

1Озьы, котькыӵе уродлыкез, котькыӵе кескич ужез, чеберъяськонэз, вожъяськонэз но котькыӵе урод кылын вераськонэз палэнтэ,2Али вордскем вож нуныос кадь яратэлэ дун-чылкыт кыл йӧлэз, со бордысен тӥ мед будоды но утиськон мед шедьтоды шуыса.3Уго тӥ оскалтӥды ини, Кузё-Инмар ӟечлыко шуыса.4Со доры, улэп из доры, адямиосын кулэтэм карем, нош Инмарен быръем дунолыклэн матаз мыныса,5асьтэос но, улэп изъёс луыса, асьтэдыз духовной корка пуктыны сётэ, дун-шектэм священство луэ, Иисус Христос пыр Инмарлы ярамонэсь духовной курбонъёс сётон понна.6Священной Гожтэмын верамын уго:

«Тани, Мон Сӥонэ инъетлы йыр из понӥсько,
быръемзэ, дунозэ;
Солы оскись мурт возьытэ уз усьы».

7Тӥледлы, оскисьёслы, Со дунолэсь но дуно луэ, нош оскисьтэмъёс понна –

«из, кудзэ корка пуктӥсьёс кулэтэм каризы,
но кудӥз корка сэреглэн улаз инъет йыр луиз,
канжаськон излы, ӵемтӥськон излы пӧрмиз».

8Инмар кыллы тэрытскытэк улӥсьёс со борды канжаськыло. Сыӵе уго соослэн адӟонзы.

9Нош тӥ – быръем выжы, Эксэйлэн священникъёсыз, святой калык, Инмарлэн люкетэз. Солэн ӟечлыкъёсыз сярысь мед ивортоды шуыса, тӥледыз Со пеймыт азьысь Аслаз паймымон югыт улаз ӧтьыса поттӥз.10Куке но тӥ калыктэмлэсь гинэ калык вал, нош али – Инмарлэн калыкез луиды. Куке но тӥ Инмарлэсь гажан-жалянзэ тодытэк улӥды, нош али сое ас вылады шӧдӥды ни.

11Гажаноосы! Тӥледыз, та дуннелы мурт адями луисьёсты, пыдйылчиосты, курисько: лул вылэ урдскылӥсь лулмугорлэн юрӟым куронъёсызлэсь палэнскылэ.12Тӥляд улонды язычникъёс азьын ӟечо-буро мед луоз. Соос тӥледды, йыруж лэсьтӥсьёсты музэн, урод кылъёсын вераллязы. Тӥлесьтыд ӟеч ужъёстэс адӟыса, Инмарез данъяны мед быгатысалзы Солэн лыктон нуналаз.

13Кузё-Инмар понна, адямиослэн пуктэм котькудӥзлы кузёзылы тэрытскыса улэлэ: эксэйлы-а – вылӥ кивалтонэз киулаз возисьлы,14кивалтӥсьёслы-а – кудъёсыз йыруж лэсьтӥсьёсты вӧсь карыны ысто, нош ӟеч уж лэсьтӥсьёслы – кузьымъёс-медъёс сёто.15Уго Инмарлэн таӵе эрикез: асьмеос, ӟеч ужъёс лэсьтыса, визьзэс ыштэм адямиослэсь валатэк вераськонзылэсь ымзэс ворсаны мед быгатомы.16Эриклэн нимыныз уродэз ватӥсь адямиос кадь ӧвӧл, эрикын улӥсь муртъёс выллем, Инмарлэн ляльчиосыз кадь лэсьтэ.17Котькинэ санэ понэ, куспады тупаса улонэз яратэ, Инмарлэсь кышкалэ, эксэез сӥё-сано каре.

18Медоос, кышкаса кузёостылы тэрытске, – лякыт, зӥбыт-востэмъёсызлы гинэ ӧвӧл, лякыттэмъёсызлы-лекъёсызлы но.19Инмарлы со ярамон: кин Инмар сярысь малпаса, курадӟонэз, куректон-кайгуэз чида – сое шонертэм ке но вӧсь каро.20Урод ужъёсты понна жугемез чидаськоды ке, со понна кыӵе ушъян тӥледлы луоз? Нош ӟеч уж лэсьтыса вылысь курадӟоно луиськоды, но сое чидаськоды ке, со Инмарлы ярамон.21Уго тӥ со понна ӧтемын. Христос но асьме понна курадӟон чидаз, Солэн пытьы кузяз мед мыномы шуыса, асьмелы адӟем карон кельтӥз:

22«Со нокыӵе но сьӧлык ӧз лэсьты,
Солэн кылаз-ымаз чеберъяськонэз-ӧрекчаськонэз ӧй вал».

23Сое урод кылын тышкаськизы, нош Со пумитазы урод кылъёс ӧз вера. Курадӟытыкузы но пунэмзэ берыктонэн ӧз кышкаты – ваньзэ шонер Судить Карисьлэн кияз сётӥз.24Асьмелэсь сьӧлыкъёсмес Со Ачиз Аслаз Мугорыныз кирос вылэ нуиз, сьӧлыкъёс понна кулэмын мед луомы, нош шонерлык понна мед уломы шуыса. Солэн яраосыныз тӥ бурмытскиды.25Тӥ уго, возьмаськисьтэк кыльыса, йыромем ыжъёс кадесь вал, нош табере лулдэс Возьмась, Чаклась доры берытскиды.


предыдущая глава Глава 2 следующая глава