Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ПЕТР АПОСТОЛЛЭН ЫСТЭМ НЫРЫСЕТӤ ГОЖТЭТЭЗ

Глава 1

1-тӥ ЛЮКЕТ

1Петр, Иисус Христослэн апостолэз, Инмарен быръемъёслы, мурт шаерын – Понтын, Галатияын, Каппадокияын, Асияын, Вифинияын – пазьгиськыса улӥсьёслы.2Инмар Атайлэн мылкыд каремезъя, Дух пыр дун-сьӧлыктэм карыса, тӥ быръемын Иисус Христослэсь кылзӥськон но Солэн Вирыныз сузяськон понна. Дэлет тӥледлы! Тупаса улонды мед йылоз.

3Инмар, Кузё-Инмармылэн Иисус Христослэн Атаез данлыко! Аслаз быдӟым ӟечлыкеныз, Иисус Христослэн кулэмысь улӟыса султонэз пыр, асьмеды выльысь вордскытӥз улэп улонлы оскиськон сётон понна.4Сисьмисьтэм, саптаськисьтэм, шуясьтэм-куасьмисьтэм люкет сётӥз, со асьме понна Инмын возиське.5Оскон пыр Инмарлэн кужыменыз шобыртэмъёс, берпуметӥ нуналъёсы усьтӥськись утиськонэн утемын луоды.6Та пумысен шумпотэлэ, та виын пӧртэм визь сынаськонъёсын сэрен ӧжытак куректоно ке но луиды.7Эскерем-чаклам осконды тыл пыр эскерем-чаклам ышись-бырись зарнилэсь но дуногес. Иисус Христос лыктыку, ушъян, сӥ-сан, данлык мед басьтоды.8Иисус Христосэз адӟытэк но яратӥськоды, та дырозь Сое тӥ ӧд адӟе, но Солы оскыса, вераны луонтэм, туж дано шумпотонэн шумпотӥськоды.9Озьы асьтэ осконэн лулдэс утёнэ вуиськоды.

10Та утиськонэз утчазы, эскеризы-чаклазы пророкъёс. Соос азьвыл ик веразы тӥледлы дасям дэлет сярысь.11Эскеризы-чаклазы, кудӥз вылэ но кыӵе дырлы возьматылӥз соос пушкысь Христослэн Духез, куке Со азьвыл ик Христослэсь курадӟонъёссэ но соос бӧрсьы лыктӥсь Солэн пиштӥсь данлыкез сярысь тодытъяз.12Соослы усьтэмын вал: соос асьсэлы ӟечлык утчаса ӧз улэ, асьмелы ӟеч карон понна ужаса-тыршыса улӥзы. Инмысен лэзем Святой Духен тыр луыса Ӟеч Ивор вайисьёс та сярысь тӥледлы тодытӥзы. Кылчинъёслэн но та сярысь туж тодэмзы потэ.

13Соин ик, визьдылэсь куссэ думыса, сэзь улыса, быдэсак оскиське Иисус Христослэн лыктон дыръяз тӥледлы сётӥськись дэлет вылэ.14Кылзӥськись нылпиос кадесь луэлэ, мугордылэн кулэ каронъёсызлы кузёяськыны эн сётӥське. Соос тӥ пушкын уло вал, куке тӥ утиськон сярысь номыр но уд на тодӥське вал.15Тӥледыз ӧтем Дун-Сьӧлыктэмлэсь адӟем карыса, тӥ асьтэос но быдэс улон-вылонады дун-сьӧлыктэмесь луэлэ;16Гожтэмын уго: «Дун-чылкытэсь луэлэ, Мон дун-чылкыт уго».17Атай шуыса нимаськоды ке Сое, Кудӥз, ымныр шоры учкытэк, ужъёсъя ваньзэ судить каре, соку та дунне вылысь улон нуналъёстэс Солэсь кышкаса ортчытэ.18Тӥ тодӥськоды, атайёсты бордысь потэм алекъяськыса улонлэсь сисьмись азвесен яке зарниен тӥ мозмытэмын ӧвӧл шуыса, –19тӥ мозмытэмын чик шектэм-сьӧлыктэм, дун-чылкыт ыжпилэн кадь, Христослэн дуно Вирыныз.20Со дунне кылдытонлэсь азьвыл ик дасямын вал ни, нош лыктӥз тӥ понна берпум дыръёсы.21Со пыр Инмарлы оскыны кутскиды, Кудӥз Сое кулэмысь улӟытыса султытӥз но Солы пиштӥсь данлык сётӥз. Соин ик тӥляд осконды но, оскиськонды но Инмар дорын мед луоз.

22Дух пыр зэмлыклы тэрытскыса, ымныр шоры учкытэк, агай-вынлыко яратон понна асьтэлэсь лулдэс чылкытатэ, котьку но огдэс огды чылкыт сюлэмен яратэлэ.23Сисьмись кидыслэсь ӧвӧл, сисьмисьтэмлэсь, улэп но пумтэм дауръёс улӥсь Инмар кыл бордысь выльысь вордскемъёс тӥ луиды.24Уго

котькудӥз но лулмугор – турын кадь,
адямилэн данэз но – турын пӧлысь сяська кадь:
турын куасьмиз но, солэн сяськаез усьылӥз;
25нош Кузё-Инмарлэн кылыз
пумтэм дауръёс улэ.

Та самой со кыл, кудӥз тӥледлы Ӟеч Ивор шуыса тодытӥське.


предыдущая глава Глава 1 следующая глава