Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ИАКОВ АПОСТОЛЛЭН ЫСТЭМ ГОЖТЭТЭЗ

Глава 1

1-тӥ ЛЮКЕТ

1Инмарлэн но Кузё-Инмарлэн Иисус Христослэн ляльчизы Иаков, пазьгиськыса палэнын улӥсь дас кык выжыослы – ваньдылы салам верасько.

2Агай-вынъёсы, пӧртэм визь сынаськонъёс улэ сюриды ке, туж шумпотэлэ.3Тодэлэ, тӥлесьтыд Инмарлы оскондэс эскерыку, чидан вордӥське шуыса.4Тӥ быдэсак дун-шектэмесь, номырлы но ёрмисьтэмесь мед луоды шуыса, тӥляд чиданды быдэс улонды ӵоже юн мед луоз.5Тӥ пӧлысь кинлэн ке визьлыкез уг ке тырмы, Инмарлэсь мед куроз. Инмар жалятэк, пыкылытэк ваньмызлы сётэ – курисьлы сётэмын луоз.6Оскыса, чик шекланытэк мед куроз, малы ке шуоно шекланыса улӥсь мурт тӧлын ӝуткам но пазяськыса улӥсь зарезь тулкымлы укша:7сыӵе адями медаз малпа Кузё-Инмарлэсь мар ке но басьтыны.8Отчы-татчы пазяськись малпанэн улӥсь адями аслаз сюрес вылаз юн уг сылы.

9Куанер улӥсь агай-вын мед ушъяськоз аслаз вылӥын луэменыз,10нош узыр мурт – аслаз улӥын луэменыз, малы ке шуоно турын пӧлысь сяська кадь улонэд ортчоз-тӧлӟоз:11шунды ӝужа, пӧсь луэ но турынэз ӵушка, солэн сяськаез усьылэ, солэн чебер тусыз быре. Озьы ик аслаз улон сюрес вылаз узыр мурт но шуя-быре.

12Визь сынаськонэз чидам мурт шудо, малы ке шуоно со эскеремын-чакламын луоз но соин со улонлэсь венецсэ басьтоз, кудзэ Кузё-Инмар Сое яратӥсьёслы кузьманы кыл сётӥз.13Визь сынаськон лыктыку нокин но медаз шуы: «Инмар визьме сына». Нокыӵе но урод ужлэн Инмарлэсь визьзэ сынамез уг луы, Инмар Ачиз но нокинлэсь визьзэ уг сына.14Котькин но, аслаз кырсь малпанъёсызлы сётӥськыса, мылкыдзэ отчы понэ ке, соин со ассэ визь сынаськон улэ сётэ.15Соку кырсь малпан кылдэ но сьӧлыкез вордӥськытэ, нош сьӧлык кулонэз вордӥськытэ.

16Гажано агай-вынъёсы, ӧрекчаськонлы эн сётӥськелэ.17Котькудӥз ик ӟеч, дун-шектэм кузьым вылӥысь, югыт сётӥсь Атаймы дорысь ваське, Солэн воштӥськонэз, воштӥськонлэн вужерез но ӧвӧл.18Мылкыд кариз но – зэмлыклэн кылыныз Со асьмеды вордӥськытӥз, Солэн кылдытэмъёсыз пӧлын асьмеос нырысетӥ емышъёсыз мед луомы шуыса.

19Озьыен, тодэ, гажано агай-вынъёсы: котькудӥз адями кылзӥськись мед луоз, кыл вераны дыртӥсьтэм, вожпоттӥсьтэм,20уго адямилэн вожпотонэз Инмарлэн шонерлыкезъя улыны люкетэ.21Соин ик котькыӵе кырсь ужлэсь, уродлыклэсь куштӥське. Асьтэдыз востэм карыса, Инмар кылэз кабыл басьтэ, кудӥз тӥ пушкы мерттэмын, со тӥлесьтыд лулдэс утьыны быгатэ.

22Инмар кылэз быдэсъяса улэ, кылзӥськыса гинэ эн улэ – асьтэдыз асьтэос эн ӧрекчалэ.23Уго кин кылэз кылзэ но сое уг ке быдэсъя, со аслэсьтыз ымныр тусбуйзэ синучкон пыр чаклась адямилы укша:24со ас шораз учкиз, палэнскиз но со куспын ик вунэтӥз, кыӵе со.25Нош кин чик шектэм, эрик сётӥсь Инмар закон шоры учкоз но со бордын сюлмыныз улӥз ке – кылзӥськыса, вунэтытэк, уж вылын быдэсъяса – шудо луоз ужрадъянъёссэ быдэсъякуз.

26Тӥ пӧлысь кин ке но ачиз сярысь мон осконэн шонер улӥсь шуыса малпа ке, нош кылзэ уг ке куты, со ассэ ачиз ӧрекча, солэн осконэн шонер улонэз пайдатэм луэ.27Инмар азьын, Атай азьын ярамон дун-чылкыт осконэн шонер улон луэ со: анайтэк-атайтэк кылем нылпиослы, палкышноослы ёрмыса-ӟудыса улон дыръязы юрттӥськон но та дуннелэн уродэныз-лекеныз саптаськытэк астэ ачид утьыса возён.


предыдущая глава Глава 1 следующая глава