Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 28

28-тӥ ЛЮКЕТ

1Ярдуре вуэм берамы та шормуӵ Мелит нимаське шуыса тодӥмы.2Татын улӥсь калык милемды ӟеч мылкыдын пумитаз: куазь зоремен но кезьыт кариськемен сэрен соос тылскизы но милемыз ваньнамес асьсэ доры ӧтизы.3Павел, трос силё люкаса, тыл пӧлы куштӥз но, соку тыл пушкысь урод кый потыса, солэн ки бордаз ошиськиз.4Татын улӥсь калык Павеллэн ки бордаз ошиськыса улӥсь кыез адӟиз но ог-огзылы шуизы: «Та адями – адями виылӥсь, дыр. Зарезьын со утиськиз, нош шонерлыко судын со улэп уз ни кыльы».5Суй бордысьтыз кыез со тыл пӧлы курткиз, кый сое чик вӧсь ӧз кары.6Соос возьмало вал, солэн кытӥыз ке но пыктоз яке шӧдтэк шорысь со кулыса усёз шуыса. Кема ӵоже чакласа-эскерыса сылэм беразы адӟизы: солы номыр но ӧз луы. Соку соос асьсэлэсь малпанзэс воштӥзы но со – инмар шуыса вераны кутскизы.

7Публий нимо шормуӵ кузёйырлэн музъемъёсыз та интылы матын вал. Со милемды гуртаз ӧтиз но куинь нунал ӵоже мылысь-кыдысь куноятыса возиз.8Публийлэн атаез кезегъяса, кӧт виян черен курадӟыса, валесаз кылле вал. Павел со доры пыриз, вӧсяськыса со вылэ киоссэ понӥз но сое бурмытӥз.9Та ужъюгдур бере шормуӵысь мукет висисьёс но Павел доры лыктылӥзы, ваньзэс бурмытылӥз.10Милемыз сӥлы карыса возизы, кошкыкумы, мар кулэ, сётыса лэзизы.

11Куинь толэзь ортчем бере Александрияысь ”Диоскур” шуыса нимаськись кораблен ми татысь кошкимы. Корабль та шормуӵын толзэ потӥз.12Сӥракузы каре ву вылтӥ вуимы, отын куинь нунал улӥмы.13Отысь кошкыса, Ригия каре вуимы. Нунал кельтыса, лымшор палась тӧл пельтыны кутскиз. Мукетаз нуналэ Путеолэ вуимы.14Татысен ми агай-вынъёсмес шедьтӥмы, соос милемды ас доразы сизьым нунал ӵоже улыны куризы, нош собере ми Риме кошкимы.15Ми сярысь кылэм беразы Римысь агай-вынъёсмы Аппий Падвоже но Куинь кунокуа юртъёс доры милям пумитамы потӥзы. Соосты адӟыса, Павеллэн мылкыдыз капчи луиз. Со Инмарлы тау кариз.

16Ми Риме вуэм бере сю солдатэн кивалтӥсь жильыетын пукисьёсты ожйырлэн киулаз сётӥз, нош Павеллы нимаз, сое возьмась солдатэн ӵош улыны лэземын вал.

17Куинь нунал ортчыса, Павел иудейёс пӧлысь нимо-дано адямиосты ӧтчаз. Соос люкаськем бере Павел соослы шуиз: «Агай-вынъёс! Калыкелы но, атайёсмылэн сямъёссылы но пумит мон номыр но ӧй лэсьты, озьы ке но монэ Иерусалимысен жильыетэ пуктӥзы но римлянъёс кие сётӥзы.18Допрос лэсьтэм беразы соос монэ мозмытыны малпало вал, уго виён понна мынам нокыӵе но янгыше ӧвӧл.19Нош иудейёс пумитъяськемен сэрен кесарь дорын суд ортчытыны куроно луи. Но та ужрад ас калыкме янгыше уськытон понна чик но ӧвӧл.20Та пумысен ик адӟиськыны, вераськыны шуыса, мон тӥледыз ӧти, – Израильлэн оскиськонэз понна та жильыосын мон думылэмын уго».21Нош соос Павеллы шуизы: «Иудеяысь ми тон сярысь нокыӵе но гожтэт ӧм басьтэ, татчы вуылэм агай-вынъёсмы но тон сярысь ӧз поттылэ, номыр но уродзэ ӧз вералэ.22Тынад малпанъёсыд сярысь милям кылэммы потэ вал. Милемлы тодмо, кызьы та дышетон пумысен котькытын но ченгешо».

23Солы нунал висъязы. Тупатэм нуналэ туж трос муртъёс со доры лыктӥзы. Ӵукнаысен ӝытозь Павел Инмар Эксэйлык сярысь вераса улӥз, Моисей законысь но пророкъёслэсь Иисус сярысь ивортэмзэс тодытыса, соосты оскытыны тыршиз.24Одӥгъёсыз солэн кылъёсызлы оскизы, нош мукетъёсыз ӧз оске.25Куспазы огкыл шедьтымтэен сэрен соос кошкыны дасясько вал ини, но соку Павел та кылъёсты вераз: «Исаия пророк пыр Святой Дух асьмелэн атайёсмылы умой вераз:

26”Та калык доры мыныса, тазьы шу:
пельыныды кылоды но – уд валалэ;
синмыныды учкоды но – уд адӟе.
27Чурытомемын уго та калыклэн сюлэмыз,
пельынызы но мырдэм кыло, синъёссэс но кыниллям;
синъёсынызы уз адӟе, пельёсынызы уз кылэ,
сюлмынызы уз валалэ,
Мон соосты мед бурмытом шуыса, уз но берытске”.

28Озьыен, тӥледлы тодмо мед луоз: Инмарлэн утиськонэз мукет калыкъёслы ыстэмын – верам кылэз соос кабыл басьтозы».29Со тае верам бере иудейёс куспазы юн ченгешыса кошкизы.

30Кык ар ӵоже Павел одӥг коркан улӥз, со понна ачиз коньдон тыриз. Ваньзэс дораз лыктӥсьёсты со ӟеч мылкыдын пумиталляз,31Инмар Эксэйлык сярысь тодытылӥз, Кузё-Инмар Иисус Христос сярысь кышкатэк, дугдылытэк дышетылӥз.


*а 28:1 Мелит – туала нимыз Мальта

*б 28:15 Аппий Падвож – Римлы ог 60 иськемысь пичи город;

*в 28:15 Куинь кунокуа юртъёс – Римлы ог 40 иськемысь пичи город


предыдущая глава Глава 28 следующая глава