Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 27

27-тӥ ЛЮКЕТ

1Милемлы Италие кошкон сярысь верамзы бере Павелэз но жильыетын пукись куд-ог мукетъёссэ кесарьлэн полкысьтыз Юлий нимо сю солдатэн кивалтӥсь кие сётӥзы.2Ми Андрамит корабле пуксьыса кошкимы. Асиялэн ярдуртӥз уяса кошкыны мылкыдмы вал. Милемын огазьын Фессалоника карысь македон пи Аристарх мынӥз.3Мукетаз нуналэ Сӥдонэ дугдӥмы. Адямиез яратӥсь луэмзэ возьматӥз Юлий – со Павелэз эшъёсыз доры ветлыны лэзиз, соос мед юрттӥськысалзы солэн кыӵе ке кулэяськонъёсыз вань ке шуыса.4Отысь потыса, пужит пельтӥсь тӧлъёсын сэрен ву вылтӥ ми Кипр вӧзтӥ ортчимы но,5Киликияен Памфилия азьысь зарезь пыр потыса, Ликияысь Миры каре вуимы.6Отысен сю солдатэн кивалтӥсь Италие мынӥсь Александрияысь кораблез шедьтӥз но милемды отчы пуктӥз.7Трос нуналъёс ӵоже каллен уяса, мырдэм Книд кар шоры вуимы. Милемлы пумит пельтӥсь урод тӧлэн сэрен ми Критысь Салмон кожныр шоры мырдэм уяса вуимы.8Курадӟыса-курадӟыса со вӧзтӥ ортчимы но Ласея кар вӧзысь Ӟеч Пристаньёс шуыса нимаськись одӥг интые вуимы.

9Трос нуналъёс ортчизы ни; визьдыр ортчемын вал ини, соин ик уяны пумен кышкытгес луыны кутскиз. Павел аслэсьтыз ӵектонзэ10соослы вераз: «Воргоронъёс! Мон адӟисько, уянмы секытэн, кышкытлыкен ортчоз шуыса. Грузмылы, корабльмылы гинэ ӧвӧл, асьмелэн улонмылы но кышкытлык кылдэ».11Нош сю солдатэн кивалтӥсь, Павеллэн кылъёсызлы сярысь, кораблез валтӥсьлы, корабльлэн кузёезлы юнгес оскиз.12Пристань толэз потыны ярамон уг луы шуыса адӟизы но, тросэз отысь кошкыны ӵектӥзы. Луоно ке, Критысь Финик пристане мыноно, шуизы. Со интыяськемын лымшорен шундыпуксён но уйпалэн шундыпуксён тӧлъёслы ваче пумитын. Отын толйыны вераськизы.

13Лымшор палась капчияк тӧл пельтӥз, – милемлы со ик кулэ вал, – якорез ӝутӥзы но, Крит ярдур кузя уяса кошкимы.14Но ӝоген солы пумит ”Эвроклидон” шуиськись сильтӧл ӝутскиз.15Кораблез сильтӧл ӝиптӥз, солэн тӧллы пумит кариськемез ӧз ни луы, соин ик тулкымъёслы сётӥськимы но, милемыз азьлань-берлань нуллыны кутскиз.16Одӥгаз, Клавда нимо пичи шормуӵ вӧзы вуыса, мырдэм утиськон пыжмес кутыны быгатӥмы.17Сое ӝутӥзы но, утиськон амалъёс утчаса, зӧк гозыен кораблез думылӥзы. Сӥрт шуыса нимаськись лазег интые медам пуксе шуыса кышкаменызы, тӧлпомес лэзизы но, азьлань-берлань уяса ветлӥмы.18Сильтӧл кужмоямен сэрен мукетаз нуналэ грузъёсмес куяны кутскизы.19Куинетӥяз нуналэ ми асьме киын корабльысь тӥрлыкъёсты куямы.20Трос нуналъёс ӵоже шунды но, кизилиос но ӧз адӟиськылэ, кужмо сильтӧл пельтыса улӥз, нош пумаз ини утиськонмылы вань осконмы быриз.

21Кема дыр ӵоже сиськытэк улӥмы. Соку Павел соос шоры султӥз но шуиз: «Воргоронъёс! Мынэсьтым кылзӥськоно вал, Крит шормуӵысь кошконо ӧй вал, соку та шугадӟонэз, изъянэз ӧй адӟысалмы.22Нош али ваньдэс сэзь-сэзь кариськыны курисько, малы ке шуоно тӥ пӧлысь одӥг лул но уз быры, – корабль гинэ быроз.23Та уе Инмарлэн Кылчинэз мон азе султӥз, – Инмарлэн мон, Инмарлы мон ужаса-тыршыса улӥсько, –24со мыным шуиз: ”Эн кышка, Павел! Тыныд кесарь азе султоно на, но тани, Инмар ваньзэс тонэн ӵош уясьёсты улэп кельтоз”.25Соин ик, воргоронъёс, йыгмыт кариське, кызьы мыным верамын вал, озьы луоз шуыса, мон Инмарлы оскисько;26асьмеос кыӵе ке но шормуӵе куштэмын луыны кулэ».

27Адриатика зарезь вылтӥ уяса ветлонмылэн дас ньылетӥ уяз, уйшор вадесын, корабль валтӥсьёс шӧдӥськизы, кыӵе ке но музъем дуре вуиськомы шуыса.28Мурдалазэ мертазы но отын кызь сажем, ӧжытак мыныса мертазы но татыназ дас вить сажем шуыса тодӥзы.29Ву пушкысь изъёс борды шуккиськонлэсь утиськыса, корабль берысь ньыльзэ якорез куштӥзы но нунал вуэмез витьыса улӥзы.30Нош куке корабль валтӥсьёс пегӟыны малпазы но зарезь вылэ пыж лэзизы, – корабльлэн нырысьтыз якорьёсты куштэм амал утчаса,31соку сю солдатэн кивалтӥсьлы но солдатъёслы Павел шуиз: «Соос корабле ӧз ке кыле, тӥляд утиськемды уз луы».32Со дыре солдатъёс пыж бордысь гозыосты ӵогыса уретӥзы но пыж вуэ усиз.

33Ӟардон азьын Павел ваньзэс буйгатыса сиськыны куриз: «Туннэ дас ньылетӥ нунал ини, кызьы тӥ возьмаськыса номыр сиытэк, номыр веръятэк улӥськоды.34Соин ик тӥледыз сиськыны курисько: со тӥледлы улондэс утьыны юрттоз; нокуддылэн но тӥляд йырысьтыды йырсиды уз усьы».35Тае вераса, со нянь басьтӥз, ваньмыз азьын Инмарлы тау карыса, нянез тӥялтӥз но сиыны кутскиз.36Соку ваньзы сэзь-сэзь кариськизы но сиськыны кутскизы.37Корабльын ваньмы ми кык сю сизьымдон куать мурт вал.38Кӧтмес тырыса, корабльмес капчиятон понна чабеймес зарезе куяны кутскимы.

39Куазь югыт луиз. Но соос та музъемез ӧз тодмалэ. Адӟизы кыӵе ке но сюмез, солэн ярдурез нялмыт вал. Малпазы корабльмес со дуре дугдытыны.40Гозыосты ӵогыса уретӥзы но якорьёсты мозмытӥзы. Ми зарезь вылтӥ кошкимы. Рульёсты пертчылӥзы но, пичи тӧлпоэз тӧллане ӝутыса, ярдур пала нуыны тыршизы.41Лазег интые вуыса, корабль сюй вылэ пуксиз: нырыз выйиз, со вырӟылытэк сылыны кутскиз, нош мышсэ тулкымъёс ас кужмынызы тӥяллязы.42Уяса потэм беразы, жильыетын пукисьёс пӧлысь нокудзы но медаз пегӟе шуыса, солдатъёс соосты виылыны малпазы.43Нош сю солдатэн кивалтӥсь, Павеллэсь улонзэ утемез потыса, соосты та малпанзылэсь куштӥськытӥз. Со косӥз нырысь ик уяны быгатӥсьёслы вуэ тэтчыны но музъем вылэ потыны,44нош мукетъёссэ – кинлы пул вылын, кинлы корабльлэн кыӵе ке люкетъёсыз вылын. Та амалэн ваньзы музъем вылэ потыны быгатӥзы, ваньзы утиськизы.


*а 27:9 вераськон мынэ одӥг нуналъем сӥзьыл визьдыр сярысь (Лев. 16:29-31)


предыдущая глава Глава 27 следующая глава