Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 18

18-тӥ ЛЮКЕТ

1Та бере, Афиныысь кошкыса, Павел Коринфе вуиз.2Татысен со Понтын вордскем Акила нимо иудеез но солэсь Прискилла кышнозэ шедьтӥз. Соос алигес гинэ Италиысь вуэмын вал, – Клавдий эксэй вань иудейёсты Римысь кошкыны косӥз. Павел, соос доры лыктыса, отчы ик ужаны но кылиз.3Соослэн киужзы-ӧнерлыксы солэн кадь ик, – палаткаос лэсьтон вал.4Котькуд суббота нуналэ со сӥнагогаын вераськиз, иудейёсты но, мукет калыкъёсты но оскон пала берыктыны тыршиз.

5Сӥлаен Тимофей Македонияысь вуэм бере Павел вань лулыныз-сюлмыныз Иисуслэсь Христос луэмзэ иудейёслы тодытонлы ӝутӥськиз.6Нош иудейёс пумитъяськизы, олокыӵе но лек кылъёс веразы. Соку Павел, дӥськутсэ курткыса, соослы шуиз: «Тӥляд вирды асьтэлэн йыр вылады, мон янгыш ӧвӧл; табере мон язычникъёс доры мынӥсько».7Отысь кошкыса, Инмарез сӥлы карись Иуст нимо мурт доры лыктӥз, солэн коркаез сӥнагога вӧзын ик вал.8Крисп, сӥнагогалэн кивалтӥсез, вань семьяеныз Кузё-Инмарлы оскыны кутскиз. Коринф карын тросэз улӥсьёс Павелэз кылзӥськем беразы оскыны кутскизы, пылатӥськизы.9Кузё-Инмар уйин Павеллы возьматскон пыр шуиз: «Эн кышка, дугдылытэк вера, тодытытэк эн ул.10Мон тонэн огазьын, нокин но тыныд уродзэ уз лэсьты, та городын трос уго Мынам адямиосы».11Инмар кыллы дышетыса, Павел татын ар но куать толэзь ӵоже улӥз.

12Нош Ахаия улосын проконсул луыса Галлион улон дыръя иудейёс огкылысь Павел вылэ урдскизы, сое суд лэсьтон интые кутыса вайизы, соос шуизы:13«Та адями Инмарез сӥлы карыны асьме законъя уг дышеты».14Нош куке Павел маке но вераны ӧдъя вал, Галлион иудейёслы шуиз: «Иудейёс! Та адями кыӵе ке но йыруж яке законлы пумит уж лэсьтысал ке, соку тӥледыз кылзыны мынам муге луысал.15Нош куке ченгешон мынэ дышетон сярысь, нимъёс сярысь, тӥляд законды сярысь, соку асьтэос эскере-чаклалэ: отын мынам судья луэме уг поты».16Суд лэсьтон интыысь соосты улляз.17Соку ваньзы эллинъёс сӥнагогалэсь кузёйырзэ Сосфенэз кутыса суд лэсьтон интыын жугизы; нош Галлион та пумысен нокыӵе но ӧз кариськы.

18Павел отын эшшо трос гинэ нуналъёс улӥз на. Собере, агай-вынъёсын люкиськем бераз, ву вылтӥ Сирияе кошкиз, – соин ӵош Акилаен Прискилла мынӥзы, – Инмар азьын сӥзиськем кылзэ быдэстыса, Кенхреяысен Павел йырсизэ ӵышкиз.19Ефесэ вуыса, соосты отчы кельтӥз, нош ачиз сӥнагогае пыриз но иудейёсын вераськыны кутскиз.20Соос куризы вал Павелэз кемагес соос дорын улыны, но со соглаш ӧз луы.21Соосын люкиськыкуз, Павел шуиз: «Матэ вуись праздникез мон одно ик Иерусалимын ортчытыны кулэ; тӥ доры мон, Инмарлы кулэ ке, нош ик берытско». Собере со Ефесысь кошкиз. (Нош Акилаен Прискилла Ефесэ кылизы.)22Кесарияе вуэм бераз Павел Иерусалиме мынӥз, отысь черклы ӟеч мылкыдзэ верам бераз Антиохияе кошкиз.23Отын кӧня ке но дыр улэм бераз со азьлане вырӟиз. Христослэн дышетонэз пала берытскемъёслэсь осконзэс юнматыса, со Галатия, Фригия шаеръёс пыр ортчиз.

24Александрияын вордскем Аполлос нимо иудей, кыллы усто, Гожтэмъёсты ӟеч тодӥсь мурт, Ефесэ лыктӥз.25Со Кузё-Инмарлэн сюресэзлы дышетэмын вал. Лулыныз-сюлмыныз ӝуатскыса, со Кузё-Инмар Иисус сярысь шонер вераз, дышетӥз, – Иоаннлэсь пылатонзэ гинэ тодэ ке но вал.26Сӥнагогаын со кышкатэк вераны кутскиз. Сое кылзыса, Прискиллаен Акила сое доразы ӧтизы но солы Кузё-Инмарлэн сюресэз сярысь эшшо но шонергес валэктӥзы.27Нош Аполлос Ахаияе мыныны малпам бере агай-вынъёс отысь дышетскисьёслы гожтэт ыстӥзы, сое бордазы мед кутозы шуыса. Отчы вуэм бераз Инмарлэн дэлетэз пыр оскыны кутскем муртъёслы со трос юрттӥз:28уго вань калык азьын Иисус – Со Христос луэ шуыса дышетӥз. Священной Гожтэмъёсысь верамъёсыз возьматыса-валэктыса, иудейёслэсь пумит веранъёссэс куашкатъяз.


предыдущая глава Глава 18 следующая глава