Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 17

17-тӥ ЛЮКЕТ

1Амфиполь но Аполлония пыр ортчыса, Павелэн Сӥла Фессалоникае вуизы. Отын иудейёслэн сӥнагогазы вал.2Огдышем сямызъя Павел, соос доры пырыса, куинь суббота ӵоже Священной Гожтэмъёсъя соосын вераськиз.3Со валэктыны, оскытыны тыршиз, кызьы Христослы курадӟонэз чидано но собере кулэмысь улӟыса султоно вал; кызьы та Иисус, Кудзэ со соослы тодытӥз, Христос ик луэ шуыса валэктӥз.4Соос пӧлысь куд-огез оскыны кутскизы но Павелэн Сӥла пала кариськизы. Соос пӧлын трос вал Инмарез сӥлы карись эллинъёс, озьы ик нимо-дано кышномуртъёс но ӧжыт ӧй вал.5Нош оскисьтэм иудейёс вожъяськеменызы сэрен куд-ог укылтэм муртъёсты калык люкаськон интыосы мыныса вайизы но городэз огыр-бугыр каризы. Соос, Иасонлэн корка дораз лыктыса, апостолъёсты калык азе поттыны косыса ёртӥзы.6Павелэн Сӥлаез шедьтымтэенызы сэрен Иасонэз но куд-ог агай-вынъёсты городлэн кузёйыръёсыз доры валтыса нуыкузы, тазьы кеськизы: «Таос, быдэс дуннеез бугыртӥсьёс, татчы но лыктӥллям ини,7нош Иасон соосты гуртаз вайиз. Ваньзы соос кесарьлэн косонъёсызлы пумит мыно, шуо мукет эксэй, пе, вань – Иисус».8Тае кылыса, калык но, городлэн кузёйыръёсыз но куалектӥзы.9Иасонэз но, мукетъёссэ но Инмарлы оскисьёсты тырмыт коньдон тырытэм беразы кошкыны лэзизы.

10Агай-вынъёс со уе ик Павелэн Сӥлаез Верияе келязы. Отчы вуыса, соос иудейёслэн сӥнагогаязы мынӥзы.11Татысьёсыз иудейёс, Фессалоникаысьёсыз сярысь, лякыт сюлэмоесьгес вал: Инмар кылэз соос шумпотыса кабыл басьтӥзы. Шонер-а тазьы луэ, уг-а соиз, я таиз верам шуыса, нуналлы быдэ Священной Гожтэмъёсты эскерыса улӥзы.12Верияысь иудейёс тросэз оскыны кутскизы. Озьы ик эллинъёс пӧлысь нимо-дано нылкышноос, трос пиосмуртъёс но оскыны кутскизы.13Нош куке Фессалоникаысь иудейёс Павел Верияын но Инмар кылэз тодытэ шуыса тодӥзы, соку соос, татчы лыктыса, калыкез сураны-пожаны, огыр-бугыр карыны кутскизы.14Соку агай-вынъёс ӝегатскытэк Павелэз зарезь дуре келязы, нош Сӥлаен Тимофей татчы ик кылизы.15Павелэз келяса мынӥсьёс сое Афины карозь вуттӥзы. Сӥлаен Тимофей, ӝоггес Павел доры мед лыктозы шуыса, солэсь косонзэ басьтэм беразы келяса мынӥсьёс доразы берытскизы.

16Афиныысен Сӥлаен Тимофеез возьмаса улон дыръяз, сульдэръёсын-идолъёсын пачылмем городэз адӟыса, Павеллэн лулыз-сюлмыз куректыны кутскиз.17Сӥнагогаын иудейёсын, нош озьы ик Инмарез сӥлы карись мукет калыкъёсын вераськылыса улылӥз. Нуналлы быдэ калыклэн вузкарыны люкаськон интыосаз лыктэмъёсын пумиськылӥз.18Эпикурей но стоик философъёс пӧлысь куд-огъёсыз соин ченгешыны кутскизы. Одӥгъёсыз шуизы: «Мар вераны ӧдъя та кыллы бырем?», нош мукетъёсыз: «Мурт инмаръёс сярысь со тодытъя, лэся», – уго Павел Иисус сярысь, улӟыса султон сярысь Ӟеч Ивор тодытыса улӥз.19Сое кутӥзы но Ареопаге вайыса шуизы: «Быгатӥськомы-а ми тодыны, мар со выль дышетон, кудзэ тон тодытӥськод?20Уго кыӵе ке но паймоно кадь тынад верам кылъёсыд ми доры вуо. Соин ик тодэммы потэ, мар со сыӵе?»21Афиныын улӥсьёс, соос доры мукет кунъёсысь лыктэмъёс, выль ивор вераса, иворъёс кылзыса дыр ортчытъянэз кадь номыре но мукет ужез озьы ӧз яратылэ.

22Ареопаглэн шораз султыса, Павел шуиз: «Афины карын улӥсьёс! Мон адӟисько, тӥ оскон пала кыстӥськись адямиос луиськоды шуыса.23Тӥляд вӧсяськон интыостӥды утчаськыса ветлыкум, курбон сётон интыдэс мон шедьтӥ, со бордын гожтэмын: ”тодмотэм Инмарлы”. Сое, Кудзэ тӥ тодытэк санэ понӥськоды, самой Со Инмарез мон тӥледлы тодытӥсько.

24Дуннеез но, маиз отын вань, ваньзэ Кылдытӥсь Инмар – Со инлэн но, музъемлэн но Кузё-Инмарзы луэ. Сое киын лэсьтэм вӧсь коркаосы улыны интыяны уг луы,25адями киын ужам-тыршемез Со кулэ уг кары, номырлы но Со ёрмыса уг улы. Ачиз ваньмызлы сётэ: улон но, шокан но – ваньзэ, мар кулэ.26Одӥг адями бордысь Со вань калыкъёсты поттӥз быдэс музъемлэн бам вылаз улон понна. Соослы мертам улон дыр сётӥз, улон интылы музъем висъяз, –27соос Инмарез мед утчалозы, уз шӧдэ-а, уз шедьтэ-а Сое шуыса, Со уго ваньмылы асьмелы матын улэ.28Уго ваньмы асьмеос Со бордын улӥськомы, азьлань мынӥськомы, улӥськомы-вылӥськомы, кызьы тӥляд куд-ог кылбурчиосты но шуизы: ”Ми Солэн выжыысьтыз”.29Озьыен, асьмеос Инмарлэн выжыысьтыз луиськомы бере, соин ик малпаны но кулэ ӧвӧл, Инмар – со адямиослэн устолыкенызы, адямиослэн ас малпамзыя зарнилэсь, азвесьлэсь яке излэсь пӧрмытэм сульдэр луэ шуыса.30Азьвылзэ, тодытэк улон дыръёсы лэсьтэм янгышъёсты, санэ понытэк кельтэ, нош та виысен Инмар вань адямиослы котькытысен но ӧпкельыса сьӧлыкъёслэсь куштӥськыны косэ.31Уго Со Аслаз тупатэм-пуктэм нуналаз быдэс дунне вылэз Аслаз азьвыл ик быръем Пимуртэз пыр шонер судить кароз. Аслэсьтыз быръёнзэ Инмар Сое кулэмысь улӟытыса султытон пыр вань адямиослы возьматӥз».

32Кулэмысь улӟыса султон сярысь веранэз кылыса, одӥгъёсыз серекъязы, нош мукетъёсыз шуизы: «Та сярысь тонэ эшшо мукет дыръя но кылзомы на».33Собере Павел соос пӧлысь потыса кошкиз.34Куд-ог адямиос Павел пала кариськизы, оскыны кутскизы. Соос пӧлын вал Дионисий Ареопагит, Дамарь нимо кышномурт но куд-ог мукетъёсыз.


*а 17:19 Ареопаг – Афиныысь вырйыл, вашкала аръёсы татын суд лэсьтон инты вал


предыдущая глава Глава 17 следующая глава