Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 16

16-тӥ ЛЮКЕТ

1Отысен Павел Дервияе но Листрае вуылӥз. Отын Тимофей нимо дышетскись вал, солэн анаез иудейёс пӧлысь, Иисус Христослы оскыны кутскем мурт, нош атаез эллин вал.2Тимофей сярысь Листраын но, Иконияын но улӥсь агай-вынъёс умойзэ веразы.3Павел сое ас сьӧраз басьтыны мылкыд кариз. Та ёросын улӥсь иудейёсты буйгатон понна Павел солы вандӥськон сямез ортчытӥз, – уго ваньмыз тодо вал, солэн атаез эллин шуыса.4Городысь городъёсы ветлыса, соос апостолъёслэсь, вӧсяськисьёслэн кивалтӥсьёссылэсь Иерусалимын ортчем кенешазы кутэм косонъёссэс вӧсяськисьёслы чаклан-утён понна сётъязы.5Черкъёс оскон пыр юнмазы, нуналлы быдэ соослэн лыдзы тросгес но тросгес луиз.

6Фригия но Галатия музъемъёс пыр ортчизы, но Святой Дух соосты Асияын Инмар кылэз тодытыны ӧз лэзьы.7Мисия ёросэ вуыса, соос Вифинияе мыныны ӧдъяло вал, нош Дух соосты отчы мыныны ӧз лэзьы.8Мисияез ортчыса, Троадае васькизы.9Уйин Павеллы адӟон вал: кыӵе ке но македон пиосмурт солэн азяз султӥз но сое курыса шуиз: «Македонияе лыкты, милемлы юртты».10Та адӟон бере соку ик ми Македонияе мыноно кариськимы, малпамы, Кузё-Инмар милемыз отын Ӟеч Иворез тодытыны ӧте шуыса.

11Троадаысь потӥмы но шонерак Самофракияе вуимы, мукетаз нуналэ – Неаполе,12нош отысен – Филиппые: Македониялэн сопал люкетысьтыз та нырысетӥез город, Рим кунлэн колониез луэ. Та городын ми кӧня ке нунал улӥмы.13Суббота нуналэ город сьӧрысь шур дуре потӥмы, малпамы, отын вӧсяськон луоз шуыса; отчы люкаськем нылкышноосын вераськыса пукимы.14Отын вал Фиатир карысь Лидия нимо нылкышно, дуно кумач басмаен вузкарись. Со Инмарлы оскись мурт вал, отын со кылзӥськыса пукиз. Павеллэсь верамзэ кабыл басьтон понна Кузё-Инмар солэсь сюлэмзэ усьтӥз.15Со но, солэн семьяосыз но пылатӥськизы. Собере со милемлы тазьы шуиз: «Тӥ монэ Кузё-Инмарлы оскиськымон адями шуыса лыдъяськоды ке, мынам коркам лыктэ но улэ». Со туж куриз но, ми солэсь кылзӥськимы.

16Луиз озьы: ми вӧсяськонэ мынӥськомы вал, азьпалзэ тодытыса верась урод духен кутэм одӥг ляльчи нылмурт милемын пумиськиз. Со азьпалзэ тунаса веранэн аслаз кузёосызлы бадӟым узырлык вае вал.17Павелэн ми бӧрсьы со мынӥз но тазьы вераса черекъяз: «Та адямиос – Вылысь Инмарлэн ляльчиосыз, соос асьмелы утиськон сюрес сярысь верало».18Тазьы со трос нунал лэсьтӥз. Павеллэн вожез потӥз но берытскыса духлы шуиз: «Иисус Христослэн нимыныз нылмуртлэн пушкысьтыз тонэ потыны косӥсько». Со куспын ик дух потӥз.19Соку ляльчи ныллэн кузёосыз, барыш басьтонлэсь быремзэ адӟыса, Павелэн Сӥлаез кутӥзы но кузёйыръёс доры, калык люкаськон интые нуизы.20Соосты кузёйыръёс доры вайыса шуизы: «Та адямиос иудейёс луо, соос асьмелэсь улон интымес огыр-бугыр каро.21Асьмелы, римлянъёслы, кабыл басьтыны но, быдэсъяны но ярасьтэм сямъёсты-йылолъёсты соос тодыто».22Калык но Павелэн Сӥлалы пумит султӥз. Нош кузёйыръёс соослэсь дӥськутсэс кесяса, ньӧрен жугыны косӥзы.23Трос жугем беразы пытсэтэ ворсазы. Пытсэт возьмасьлы соосты зол возьманы косӥзы.24Таӵе косон басьтыса, возьмаськись соосты пыдлось пытсэтэ пыртӥз но пыдъёссэс сьӧлтаз.

25Уйшор вадесын Павелэн Сӥла вӧсяськизы, Инмарез кырӟаса данъязы, нош пытсэтын пукисьёс соосты кылзыса улӥзы.26Шӧдтэк шорысь туж кужмо музъем зурказ, пытсэтлэн сылон инъетэз ик зурказ; со дыре ик вань ӧсъёс усьтӥськизы, ваньзылэн сьӧлтэтъёссы усьылӥзы.27Нош пытсэт возьмась сайкам бераз адӟиз: пытсэтлэн ӧсъёсыз усьтӥськемын. Пытсэтын пукисьёс пегӟизы кожаса, со, мечсэ поттыса, ассэ быдтыны малпа вал ини.28Нош Павел бадӟым куаразэ поттыса шуиз: «Астэ эн быдты, ми ваньмы татын».29Соку возьмаськись тыл куриз, пытсэтэ бызьыса пыриз но куалекъяса Павелэн Сӥла азе уськытскиз.30Соосты педло поттыса шуиз: «Кузёосы! Мар мыным кароно утиськон понна?»31Павелэн Сӥла солы шуизы: «Кузё-Инмарлы Иисус Христослы оскы, соку тон но, тынад семьяед но утиськоды».32Соку солы но, солэн коркасьтыз вань адямиослы но Кузё-Инмарлэсь кылзэ тодытӥзы.33Со часын ик, уйин, соосты басьтыса, яраоссэс гылтӥз но чик ӝегатскытэк ачиз но, солэн быдэс семьяез но пылатӥськизы.34Павелэн Сӥлаез ас дораз вайыса куно кариз. Инмарлы оскыны кутскемзы понна ваньназы шумпотӥзы.

35Ӵукна вуэм бере кивалтӥсьёс медоосты пытсэт возьмасьёслы вераны ыстӥзы: «Мозмытэ со адямиосты».36Пытсэт возьмась та сярысь Павеллы вераз: «Кивалтӥсьёс тӥледыз мозмытыны лэзизы. Табере потэ но каньыллыкен мынэ кытчы мынӥськоды».37Нош Павел соослы шуиз: «Милемды, Рим кунлэсь адямиоссэ, судтэк вань калык азьын жугизы но пытсэтэ куштӥзы, нош табере лушкемен келяны туртто? Ӧвӧл, мед лыктозы но асьсэос мед мозмытозы».38Та кылъёсты медоос кивалтӥсьёслы веразы, нош соос, таос Рим кунлэн адямиосыз луо шуыса кылэм беразы, куалектӥзы.39Собере лыктӥзы но вожзэс медаз поттэ вал шуыса куризы. Мозмытэм беразы улон интыысьтызы кошкыны куризы.40Пытсэтысь потэм беразы Павелэн Сӥла Лидия доры лыктӥзы. Отысь агай-вынъёсын адӟиськем беразы соослэсь мылкыдзэс ӝутӥзы, собере отысь кошкизы.


предыдущая глава Глава 16 следующая глава