Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 15

15-тӥ ЛЮКЕТ

1Иудеяысь Антиохияе кыӵе ке но адямиос лыктыса, агай-вынъёсты Моисей сямъя вандӥськонэз ӧд ке ортчытэ, утиськыны уд быгатэ шуыса дышетыны кутскизы.2Нош соос куспын кужмо ченгешон ӝутӥськем бере Павелэн Варнава соосын ваче вуылӥзы. Соку Антиохияысь оскисьёс Павелэн Варнаваез, нош озьы ик асьсэ пӧлысь куд-огзэ та ужпумъя Иерусалиме апостолъёсын но Иерусалимысь вӧсяськисьёслэн кивалтӥсьёсынызы вераськыны ыстоно кариськизы.3Озьы соосты быдэс черкен келязы. Финикия но Самария пыр ортчизы, отын соос язычникъёсты осконэ берыктэмзы сярысь веразы. Та иворзы ваньмызлы агай-вынъёслы бадӟым шумпотон вайиз.4Иерусалиме вуэм беразы соосты быдэс черк, апостолъёс, татысь вӧсяськисьёслэн кивалтӥсьёссы ӟеч пумитазы. Павелэн Варнава соослы ивортӥзы Инмарлэсь соосын мар каремзэ но кызьы Инмар мукет калыкъёслы но осконлэсь ӧссэ усьтӥз.5Соку осконэз тугась-пожась фарисейёс пӧлысь куд-огез оскыны кутскемъёс ӝутскыса шуизы: «Язычникъёс пӧлысь осконэ берыктэмъёслы но вандӥськон сямез ортчытыны, Моисейлэсь законзэ утьыны косоно».

6Апостолъёс но татысь вӧсяськисьёслэн кивалтӥсьёссы та ужпумез эскерыны люкаськизы.7Кема вераськем-эскерем беразы Петр султыса соослы шуиз: «Агай-вынъёс! Тӥ тодӥськоды, кызьы кутсконысеныз ик асьме пӧлысь Инмар монэ бырйиз, Ӟеч Иворлэсь кылзэ мынам ымысьтым язычникъёс мед кылозы но оскыны мед кутскозы шуыса.8Сюлэмез Тодӥсь Инмар соосты но кабыл басьтэмзэ возьматӥз, уго язычникъёслы но, асьмелы кадь ик, Со Святой Духез лэзиз.9Асьмемыз соослэсь номырин но ӧз висъя, оскон пыр соослэсь сюлэмзэс чылкытатӥз.10Малы бен тӥ али Инмарлэсь визьзэ сынаськоды, дышетскисьёслэн сильсьӧразы зӥбет поныны ӧдъяськоды, кудзэ атайёсмы но, асьмеос но нуыны ӧм быгатэ?11Нош ми оскиськомы, соос кадь ик асьмеос но Кузё-Инмарлэн Иисус Христослэн дэлетэныз утиськомы шуыса».

12Соку вань люкаськемъёс чус кариськизы но Варнаваен Павелэз кылзӥськизы. Соос веразы, кыӵе паймымон тодметъёс, паймымон ужъёс Инмар соос пыр язычникъёс дорын лэсьтӥз.13Соос чус кариськем бере Иаков вераськыны кутскиз, со шуиз: «Агай-вынъёс! Монэ кылзӥське:14Симон валэктӥз, кызьы Инмар азьвыл ик язычникъёс пумысен сюлмаськиз, Аслэсьтыз нимзэ нуллӥсь калык кылдытон понна соос пӧлысь адямиосты люказ.15Пророкъёслэн но верам кылъёссы таин тупало, гожтэмын уго:

16”Собере берытско но Давидлэсь
куашкатэм-погыртэм скиниязэ выльдыса ӝуто,
маиз отын куашкатэмын вал, сое выльдо, тупато, –
17мукет адямиос но, вань калыкъёс но,
кинъёс пушкын Мынам нимы тодытэмын луоз,
мед утчалозы Кузё-Инмарез, – тае лэсьтӥсь Кузё-Инмар шуэ”.

18Вапумъёслэн кутсконысенызы Инмарлэн ужъёсыз Аслыз Инмарлы тодмо.19Соин ик малпасько, Инмар пала кариськись язычникъёслы секытлыкъёс-могӟетъёс кылдытъяно ӧвӧл.20Соослы гожтэт ыстоно, соослы верано: мед куштӥськозы сульдэръёссылы курбон сётэм сиёнъёсты сиемысь, азыса-калгыса улонлэсь, кекаса-ӝикаса кулэм пудолэсь сӥльзэ, вирез сиёнлэсь. Мукетъёслы медаз лэсьтэ сое, мае асьсэлы лэсьтэмез кулэ уг каро.21Уго вашкала дырысен кутскыса ик, Моисейлэсь законзэ тодытӥсьёс котькуд городын-гуртын вань, Моисей законэз котькуд суббота нуналэ сӥнагогаосын чирдо».

22Соку апостолъёс но вӧсяськисьёслэн кивалтӥсьёссы быдэс черкен ӵош вераськизы асьсэ пӧлысь кӧня ке муртэ бырйыса Павелэн Варнава сьӧры Антиохияе ыстыны. Бырйизы Варсава шуон Иудаез но Сӥлаез – агай-вынъёс куспысь кивалтӥсьёсты.23Ас киынызы таӵе гожтэт гожтыса сётӥзы: «Антиохияын, Сирияын, Киликияын улӥсь язычникъёс пӧлысь потэм агай-вынъёслы апостолъёс, татысь вӧсяськисьёслэн кивалтӥсьёссы но агай-вынъёс салам верало.24Ми кылӥмы, кызьы ми пӧлысь потэм куд-ог адямиос вандӥськон сямез но законэз утьыны кулэ шуыса асьсэ вераськонъёсынызы тӥледыз абдратӥзы, тӥлесьтыд лулъёстэс куалектытӥзы, ми соослы нокыӵе но сыӵе-таӵе косонъёс ӧм ке но сётэ вал.25Соин ик ми люкаськыса огкылысь малпамы милям гажано Варнаваенымы, Павелэнымы ӵош тӥ доры бырйыса кӧня ке муртэ ыстыны, –26Кузё-Инмармылэн Иисус Христослэн нимыз понна асьсэлэсь лулзэс сётыны дась луэм адямиосты.27Озьы ик Иудаен Сӥлаез ми ыстӥськомы, соос тӥледлы асьсэос та сярысь ик вералозы.28Уго Святой Духлы, милемлы но кулэ ӧвӧл тӥ вылэ бадӟымесь секытлыкъёс тырыны, – таизэ, тужгес кулэ луисьсэ, сяна:29куштӥськелэ сульдэръёслы-идолъёслы курбон сётэм сиёнъёсты, вирез сиемысь, кекаса-ӝикаса кулэм пудолэсь сӥльзэ сиёнлэсь, азыса-калгыса улэмысь дугдэ. Мукетъёслы медад лэсьтэ сое, мае асьтэлы лэсьтэмез кулэ уд кариське. Ваньзэ тае быдэсъяса улӥды ке, ӟеч лэсьтоды. Ӟеч луэ».

30Та ыстэм муртъёс Антиохияе вуизы но, оскись адямиосты люкаса, соослы гожтэтсэс сётӥзы.31Соос лыдӟизы но таӵе иворлы шумпотӥзы.32Иудаен Сӥла кыксы ик пророкъёс вал, соос асьсэлэн кылынызы-веранэнызы агай-вынъёслэсь мылкыдзэс лӧпкытӥзы, осконзэс юнматӥзы.33Кӧня ке дыр отын улэм беразы агай-вынъёс соосты, ӟеч сюрес сӥзьыса, апостолъёс доры келязы.34Сӥла отчы ик кыльыны малпаз. (Нош Иуда Иерусалиме берытскиз.)35Павелэн Варнава Антиохияын вал. Соос трос мукетъёсын ӵош Кузё-Инмарлэсь кылзэ дышетыса, Ӟеч Ивор тодытыса улӥзы.

36Кӧня ке дыр ортчыса, Павел Варнавалы шуиз: «Кузё-Инмарлэсь кылзэ тодытэм городъёсы ойдо нош ик мыномы, учкомы, кызьы уло агай-вынъёсмы».37Варнава Марк шуон Иоаннэз сьӧразы басьтыны ӧдъя вал,38нош Павел сое басьтоно ӧз ни кариськы, малы ке шуоно тодаз вайиз, кызьы та пияш Памфилияысен соос бордысь палэнскиз но соосын ӵош кутскем уже ӧз ни пыриськы.39Та пумысен вожвылъяськон потӥз но, соин сэрен соос ог-огзылэсь люкиськоно луизы. Варнава, Маркез сьӧраз басьтыса, Кипре кошкиз.40Нош Павел аслыз Сӥлаез бырйиз. Агай-вынъёс солы Инмарлэсь дэлетсэ сӥзем бере со сюрес вылэ потӥз.41Со Сирияен Киликия пыр ортчиз, черкъёсты юнматыса ветлӥз.


предыдущая глава Глава 15 следующая глава