Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 14

14-тӥ ЛЮКЕТ

1Иконияысен, котьку сямен ик, Павелэн Варнава иудейёслэн сӥнагогаязы пыризы. Соос вераськем бере туж трос иудейёс, озьы ик мукет калыкъёс но оскыны кутскизы.2Нош соослэн верамзылы оскымтэ иудейёс агай-вынъёслы пумит язычникъёслэсь сюлэмъёссэс вожомытӥзы, соослы пумит берыктӥзы.3Павелэн Варнава татын кема гинэ улӥзы. Кузё-Инмар сярысь кышкатэк вераса улӥзы, нош Кузё-Инмар Аслаз дэлетэз сярысь тодытонэз соослэн киосынызы лэсьтэм паймымон тодметъёс но ужъёс пыр юнматӥз.4Городысь калык шори люкиськиз: огъёсыз иудейёс пала кариськизы, нош мукетъёсыз – апостолъёс пала.5Язычникъёсын иудейёс асьсэлэн кузёйыръёсынызы ӵош соосты сантэманы но изэн жугыны кулэ шуыса вераськизы.6Тае тодыса, Павелэн Варнава Ликаония улосысь Листра но Дервия каръёсы, соослэн котырысьтызы гуртъёсы кошкизы.7Отын но Ӟеч Ивор тодытыса улӥзы.

8Листраын пыдтэм пиосмурт вал. Со вордскыкуз ик сыӵе вал, ноку но пыдыныз ӧз ветлы.9Со мурт Павеллэсь вераськемзэ кылзыса улӥз. Павел со шоры учкиз но солэн бурмон басьтыны осконэз вань шуыса адӟиз.10Соку со бадӟым куараен шуиз: «Кузё-Инмарлэн Иисус Христослэн нимыныз тыныд верасько: пыдъёсыд вылэ шонерак султы». Со соку ик тэтчыса султӥз но ветлыны кутскиз.11Нош калык Павеллэсь мар лэсьтэмзэ адӟем бераз бадӟым куараен, ликаон кылын шуиз: «Адями тусъем кариськыса, асьме доры инмаръёс васькизы».12Варнаваез Зевс шуыны кутскизы, нош Павелэз – Ермий, малы ке шуоно вераськон ужъёсын со кивалтэ вал.13Кар капка сьӧрын Зевслы сӥзем куала сылӥз. Солэн вӧсясез капка азе ошъёсты, сяська тугокоос вайыса, калыкен валче апостолъёслы курбон сётыны малпаз.14Нош Варнава но Павел апостолъёс, тае кылыса, дӥськутсэс шорияк кесизы, калык пӧлы дыртыса пыризы но бадӟым куараен шуизы:15«Воргоронъёс! Мар тӥ лэсьтӥськоды? Ми тӥ кадесь ик адямиос, та ӧвӧлтэмъёс бордысь мед куштӥськоды но улэп Инмар пала мед берытскоды шуыса, ми тӥледлы Ӟеч Ивор тодытӥськомы. Улэп Инмар кылдытӥз инмез но музъемез, зарезез но – ваньзэ, маръёс соос пушкын вань.16Азьвыл, вашкала аръёсы, Со котькуд калыклы аслыз гинэ тупась сюрестӥ ветлыны луонлык сётылӥз.17Но азьвыл кадь ик Со ялан Ачиз сярысь ӟеч ужъёс пыр тодэ вайытэ: инмысен асьмелы зор но удалтэм ю-нянё аръёс сётэ, сиёнэн но, шумпотонэн но сюлэмъёсмес тыр каре».18Тазьы вераса, соослы асьсэлы курбон сётонлэсь калыкез мырдэм-мырдэм дугдытӥзы. Калыкез ваньзэс гуртазы бертыны косӥзы.

Соос отчы кылизы но калыкез дышетыса улӥзы.19Соку Антиохияысь, Иконияысь куд-ог иудейёс лыктӥзы. Апостолъёс кышкатэк тодытон дыръя калыкез соос бордысь мед куштӥськозы шуыса либатӥзы, шуизы: «Соос нокыӵе но зэмлыкез уг верало, ӧрекчасько гинэ». Калыкез ӝутказы но, соос Павелэз изэн лэзьяса жугизы, город сьӧры поттыса куштӥзы, малпазы, со кулӥз ини шуыса.20Нош дышетскисьёс котыраз люкаськем бере Павел султӥз но городэ берытскиз. Ӵуказеяз Варнаваен ӵош со Дервияе кошкиз.

21Дервия карын Ӟеч Иворез тодытэм беразы трос муртъёс дышетскись радэ пыризы. Собере отысен берытскыса, нош ик Листрае, Иконияе, Писидияысь Антиохия каре вуылӥзы.22Дышетскисьёслэсь лулзэс юнматӥзы, осконэн улыны косӥзы. Трос куректон-кайгуос пыр Инмар Эксэйлыке асьмелы пыроно луоз шуыса, соос дышетӥзы.23Кизэс вылазы поныса, черкъёслы кивалтӥсьёс пуктӥзы. Визь утизы, вӧсяськизы. Соосты Кузё-Инмарлэн киулаз сётӥзы, Солы соос оскыны кутскизы.24Собере Павелэн Варнава, Писидия пыр ортчыса, Памфилияе вуизы.25Пергияын Кузё-Инмарлэсь кылзэ тодытэм беразы Атталияе васькизы,26нош отысен ву вылтӥ Сирияысь Антиохияе кошкизы, – Инмар дорысь дэлет басьтыса, соос та городысен али быдэстэм ужазы ыстэмын вал.

27Отчы вуэм беразы, черке ветлӥсьёсты люкаса, соослы веразы, мар соосын Инмар кариз, кызьы Инмар мукет калыкъёслы но осконлэсь ӧссэ усьтӥз.28Дышетскисьёсын валче соос отын кема гинэ улӥзы.


предыдущая глава Глава 14 следующая глава