Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 13

13-тӥ ЛЮКЕТ

1Антиохияысь черкын куд-ог пророкъёс но дышетӥсьёс вал: Варнава, Нигер шуон Симеон, Киринеяысь Лукий, ньылетӥ люкетыныз кивалтӥсь Иродэн ӵош дышетскем, быдэсмем Манаил но Савл.2Кузё-Инмарлы ужаса-тыршыса, визяса улон дыръязы Святой Дух соослы шуиз: «Лэзе Мыным Варнаваез но Савлэз, мон соосты нимысьтыз уж лэсьтыны ӧти».3Визь утьыса, вӧсяськыса улэм беразы, пророкъёс но дышетӥсьёс соос вылэ кизэс понэм бере соосты келязы.

4Варнаваен Савл, Святой Духен ыстэмъёс, Селевкияе васькизы, отысен ву кузя Кипре мынӥзы.5Саламин каре вуыса, иудейёслэн сӥнагогаосазы Инмар кылэз тодытӥзы; бордазы Иоанн юрттӥськисьсы вал.6Быдэс шормуӵез пыр потыса, Паф каре вуизы но отысен иудейёс пӧлысь Вариисус нимо туно-пеллёез, ӧрекчи пророкез, пумитазы.7Со Сергий Павел проконсулэн, визьмо пиосмуртэн, эшъяське вал. Сергий Павел Варнаваез но Савлэз дораз ӧтьыны ыстӥз, Инмар кылэз кылзӥськемез потӥз.8Нош Елима (Вариисус) туно-пеллё, – солэсь кин луэмзэ солэн нимыз ик возьматэ, – соослы пумитъяськиз, проконсулэз осконлэсь палэнтыны тыршиз.9Соку Савл, со ик Павел, Святой Духен тыр луыса, Елима шоры шонерак учкыса10шуиз: «Эй, котькыӵе но кескич луонэн, урод ужен пачылмем, диаволлэн пиез, шонерлыко улонлэн тушмонэз! Дугдод-а, уд-а Кузё-Инмарлэсь шонер сюресъёссэ кырыж карылэмысь?11Нош али, тани Кузё-Инмарлэн киыз тон вылэ ваське: тон синтэм луод, дыр вуытозь, шундыез уд ни адӟы». Со куспын ик Елима туно-пеллё вылэ пеймыт бус кадь шобыр усиз но со, отчы-татчы бергаса, ассэ валтыса нуись муртэ утчаны кутскиз.12Соку проконсул мар луэмез адӟиз но, Кузё-Инмарлэн дышетонэзлы паймыса, оскыны кутскиз.

13Пафысь ву вылтӥ кошкыса, Павел но соин ӵош луэмъёс Памфилияысь Пергия каре вуизы. Отысен Иоанн, соослэсь люкиськыса, Иерусалиме берытскиз.14Нош соос, Пергияысь кошкыса, Писидияысь Антиохия каре вуизы. Суббота нуналэ сӥнагогае пырыса пуксизы.15Моисей законэз но пророкъёслэсь гожтэмзэс лыдӟем бере сӥнагогалэн кузёйыръёсыз соослы вераны ыстӥзы: «Агай-вынъёс! Калыклэсь мылкыдзэ ӝутӥсь кылъёсты вань ке, вералэ».

16Павел султӥз но киыныз возьматыса шуиз: «Израильысь пиосмуртъёс, Инмарлэсь кышканэн улӥсьёс! Кылзӥськелэ:17Израиль калыклэн Инмарез асьмелэсь атайёсмес бырйиз. Египет музъемын улыкузы, калыкез вылӥ кариз но вылӥ суйбыгытэзлэн кужыменыз отысь поттӥз.18Ог ньыльдон аръёс ӵоже кыр дуннеын соосты сюдӥз-вордӥз.19Ханаан музъемысь сизьым калыкъёсты быдтыса, соослэсь музъемзэс Аслаз калыкезлы люкетлы сётказ.20Тазьы ог ньыль сю витьтон ар ортчиз. Самуил пророк потытозь, соослы судьяос сётылӥз.21Собере соос эксэй куризы но, Инмар соослы Вениамин выжыысь Кислэсь пизэ Саулэз сётӥз, ньыльдон ар ӵожелы.22Саулэз палэнтыса, Инмар соослы эксэе Давидэз пуктӥз, со сярысь Со тазьы ивортӥз: ”Аслам сюлмылы кельшись пиосмуртэз, Иессейлэсь пизэ Давидэз, шедьтӥ, со Мынэсьтым вань кулэ каронъёсме быдэстоз”.23Солэн выжыысьтыз ик, азьвыл кыл сётэмезъя, Инмар Израильлы Утисез Иисусэз ӝутӥз.24Ӵапак Солэн лыктон азяз вань израиль калыклы сьӧлыкъёс понна ӧпкельыса пылатӥськон сярысь Иоанн тодытӥз.25Нош улон сюресэз пумаз вуыку, Иоанн шуиз: ”Кин шуыса монэ лыдъяськоды, мон Со ӧвӧл. Но тани, мон бӧрсьын лыктэ Со, Кудӥзлэсь пыдысьтыз кутчанзэ пертчыны но мон уг сылӥськы”.

26Агай-вынъёс! Авраам выжыысь калык! Кин тӥ пӧлысь Инмарлэсь кышканэн улэ, тодэ: та утиськон кыл тӥледлы ыстэмын.27Уго Иерусалимын улӥсьёс, соослэн кузёйыръёссы Иисусэз ӧз тодмалэ, Сое судить карыса, соос пророкъёс пыр верам кылъёсты быдэстӥзы, кудъёссэ субботалы быдэ лыдӟо.28Виён понна нокыӵе но муг ӧз ке но шедьтэ, Пилатэз Сое виытыны куризы.29Со сярысь вань гожтэмез быдэстэм беразы, кирос бордысь басьтыса, шайгуэ понӥзы.30Нош Инмар Сое кулэмысь улӟытыса султытӥз.31Трос нуналъёс ӵоже Со, Соин ӵош Галилеяысь потыса, Иерусалиме лыктэмъёслы возьматъяськиз. Соос табере израиль калык азьын Солэн адӟисьёсыз-ивортӥсьёсыз луо.32Ми табере тӥледлы Ӟеч Ивор тодытӥськомы: Иисусэз кулэмысь улӟытыса, Инмар атайёсмылы сётэм кылзэ ми азьын – соослэн нылпиоссы азьын – быдэстӥз,33кызьы кыкетӥ псаломын но гожтэмын:

”Тон Мынам Пие,
туннэ Мон Тонэ вордскытӥ”.

34Инмар Иисусэз кулэмысь улӟытыса султытӥз, Со табере сисьмонэз уз ни адӟы, – та сярысь Инмар тазьы шуиз:

”Мон тӥледлы Давидлы сётыны сӥзем дун-шектэм,
вошъяськисьтэм ӟечлыкъёсме сёто”.
35Мукет интыын но шуэ:
”Аслад Дун-Сьӧлыктэмедлы сисьмонэз уд адӟыты”.

36Давид, Инмарлэн эрикезлы тэрытскыса, ас дыраз ужаз-тыршиз. Нош со кулӥз но, сое атайёсыныз огазе ватӥзы. Сисьмиз, сюйлы пӧрмиз.37Нош Со, Кудзэ Кузё-Инмар улӟытыса султытӥз, сисьмонэз ӧз адӟы.38Озьыен, агай-вынъёс, тӥледлы тодмо мед луоз: сьӧлыкъёсты куштон тӥледлы Иисус пыр ивортӥське.39Моисейлэн законэныз тӥляд шонере потэмды ӧз луы, нош Таиз пыр котькудӥз но оскись мурт шонере потоз.40Но чакласькелэ, пророкъёслэн верамзы тӥ вылэ медаз вуы:

41”Учкелэ, серем карисьёс,
паймоды но быроды;
Мон уго тӥляд улоно нуналъёсады сыӵе уж лэсьтӥсько,
кудӥзлы тӥ ӧй оскысалды, кин ке тӥледлы верасал ке но”».

42Сӥнагогаысь иудейёс потэм бере язычникъёс вуоно субботае но соослы та сярысь ик вераны куризы.43Люкаськемъёс кошкем бере тросэз иудейёс, нош озьы ик Инмарез сӥлы карись иудей осконэ берыктӥськемъёс Павелэн Варнава сьӧры мынӥзы. Апостолъёс соосын вераськизы, соосты Инмарлэн дэлетэз вылэ оскиськыса улыны косӥзы.

44Вуонояз субботае городын ваньмыз сямен улӥсьёс Инмар кылэз кылзӥськыны люкаськизы.45Нош иудейёс, калыкез адӟыса, кӧт пӧсен вожомизы но Павеллэн верамезлы пумитъяськизы, лек кылъёс веразы.46Соку Павелэн Варнава кышкатэк соослы веразы: «Инмар кылэз нырысь ик тӥледлы ми тодытыны кулэ вал, нош тӥ сое палэнтӥськоды. Асьтэдыз асьтэос быронтэм улонлы ярантэм кариськоды бере, табере ми язычникъёслы вазиськиськомы.47Кузё-Инмар милемлы тазьы косӥз уго:

”Мон Тонэ вань калыкъёсты югдытӥсь карисько,
Тон пыр музъемлэн вань сэрегъёсаз утиськон мед лыктоз шуыса”».

48Тае кылыса, язычникъёс шумпотӥзы но Кузё-Инмарлэсь кылзэ данъяса улӥзы. Быронтэм улон басьтонлы азьвыл дасямъёс ваньзы оскыны кутскизы.49Кузё-Инмарлэн кылыз та шаерысь вань ёросъёсы вӧлмыны кутскиз.50Нош иудейёс вӧсяськыса улӥсь, сӥё-сано кышномуртъёсты но городысь кузёйыръёсты Павелэн Варнава вылэ узатӥзы, соосты ёртыны кутскизы но асьсэлэн музъем вылысьтызы уллязы.51Нош апостолъёс, соослы пумит пыдысьтызы сюйзэс курткыса, Иконияе кошкизы.52Дышетскисьёс шумпотонэн но Святой Духен тыр луизы.


*а 13:7 проконсул – кыӵе ке улосэн кивалтӥсь кузёйыр; губернатор


предыдущая глава Глава 13 следующая глава