Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 11

11-тӥ ЛЮКЕТ

1Быдэс Иудеяысь апостолъёс, агай-вынъёс кылӥзы, язычникъёс но Инмар кылэз кабыл басьтӥзы шуыса.2Петр Иерусалиме вуэм бере вандӥськон сямез ортчытэм оскисьёс сое пыкылӥзы,3тазьы шуыса: «Вандӥськон сямез быдэсъясьтэмъёс дортӥ тон ветлӥд, соосын огазьын сиид-юид».

4Нош Петр соослы радызъя вераны кутскиз, кызьы со вал:5«Иоппияын мон вӧсяськи но паймымон возьматсконэз адӟоно луи: бадӟым ӝӧккышет выллем кыӵе ке но сосуд васькиз, инмысен ньыль пал сэрегтӥз ик лэземын вал, со мон доры лэзиськиз.6Со пушкы мон чакласькыса учки но музъем выл пӧйшуръёсты, нюж ветлӥсьёсты, ин тылобурдоосты адӟи.7Мон куара кылӥ, со куара мыным шуиз: ”Султы, Петр, ванды но си”.8Нош мон шуи: ”Уг, ноку но уг сиы. Кузё-Инмаре, номыр но юрӟым, чылкыттэм маке мынам ымам ӧз на пырылы”.9Инмысен мыным кыкетӥ ползэ куара вераз: ”Мае Инмар дун-чылкыт кариз, сое тон чылкыттэм шуыса эн лыдъя”.10Тазьы куинь пол луиз; собере нош ик ваньмыз инме ӝутскиз.11Ӵапак со часын, со виын мынам улон корка азям Кесарияысь мон доры ыстэм куинь адямиос дугдӥзы.12Дух мыным вераз, нокыӵе кариськытэк мон соосын ӵош Иоппияе мед мыном шуыса. Монэн ӵош та куать агай-вынъёс но мынӥзы. Собере ми со Корнилийлэн корказ вуимы.13Со милемлы вераз, кызьы со аслаз корказ Кылчинэз адӟиз, кудӥз султыса шуиз: ”Иоппияе адямиосты ысты, соос Петр шуон Симонэз татчы ӧтьыса мед ваёзы.14Со тыныд кылъёс вералоз, со кылъёсын тон но, тынад быдэс семьяед но утиськоды”.15Вераны кутскем берам соос вылэ Святой Дух васькиз озьы, кызьы нырысь кутсконаз ик асьмеос вылэ но Со васькиз.16Соку мон тодам вайи Кузё-Инмарлэсь верам кылзэ: ”Иоанн вуэн пылатӥз, нош тӥ Святой Духен пылатэмын луоды”.17Озьыен, Инмар соослы но, милемлы кадь ик, – Кузё-Инмарлы Иисус Христослы оскисьёслы, кузьым сётӥз бере, кин бен мон сыӵе Инмарлы люкетыны мед быгатом?»18Тае кылзыса, соос буйгатскизы но Инмарез данъяса шуизы: «Озьыен, Инмар язычникъёслы но быронтэм улонэ пырон понна ӧпкельыса сьӧлыкъёслэсь куштӥськон сётӥз».

19Стефанэз вием но оскисьёсты улляны-ӝикатыны кутскем бере палэнэ кошконо луэм муртъёс, иудейёслы Ӟеч Ивор тодытыса, Финикияозь, Кипрозь, Антиохияозь вуизы.20Соос пӧлын Кипрысь, Киринеяысь оскисьёс но вал, соос, Антиохияе вуыса, мукет калыкъёслы но Иисус Кузё-Инмар сярысь Ӟеч Ивор тодытӥзы.21Кузё-Инмарлэн киыз соосты юнматыса возиз. Туж трос адямиос оскыны кутскизы, Кузё-Инмар пала берытскизы.

22Та сярысь ивор Иерусалимысь черке но вуиз. Соку соос Варнаваез Антиохияе мыныны косӥзы.23Со отчы вуэм бераз, Инмарлэсь соослы ӟеч каремзэ адӟыса, шумпотӥз, ваньзэс чылкыт сюлэмен Кузё-Инмар бордын возиськыны куриз.24Со лякыт сямо, Святой Духен но осконэн тыр луэм пиосмурт вал. Трос калык Кузё-Инмар пала кариськиз.25Собере Варнава Тарсэ Савлэз утчаны мынӥз. Сое шедьтэм бераз сое Антиохияе вайиз.26Быдэс ар ӵоже соос, черкен огазе люкаськылыса, трос калыкез дышетӥзы. Нырысьсэ Антиохияысен дышетскисьёсты христианъёс шуыса ниманы кутскизы.

27Со нуналъёсы Антиохияе Иерусалимысь пророкъёс лыктӥзы.28Соос пӧлысь одӥгез, Агав нимоез, султӥз но, Духен тыр луыса, быдэс дунне вылын туж секыт сютэм ар луоз шуыса ивортӥз. Сыӵе секыт сютэм ар Клавдий эксэй дыръя луиз.29Соку дышетскисьёс котькудӥз аслаз луонлыкезъя Иудеяын улӥсь агай-вынъёссылы юрттэт ыстыны мылкыд каризы.30Люкам юрттэтсэс Иудеяысь вӧсяськисьёслэн кивалтӥсьёссылы Варнаваен Савл бӧрсьы келязы.


предыдущая глава Глава 11 следующая глава