Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 10

10-тӥ ЛЮКЕТ

1Кесарияын Корнилий нимо пиосмурт вал, Итали шуыса нимаськись полкысь сю солдатэн кивалтӥсь.2Быдэс семьяеныз шонер, Инмарлэсь кышканэн улӥсь мурт. Израильысь ёрмыса улӥсьёслы трос юрттӥськыса, ялан Инмарлы вӧсяськыса улӥз со.3Ог укмыс час котырын нуназе солы Инмар Кылчин возьматскиз, со доры со пырыса шуиз: «Корнилий!»4Нош Корнилий со шоры учкиз но кышкаса шуиз: «Мар, Кузёе?» Кылчин солы ответ сётӥз: «Тынэсьтыд вӧсяськемдэ, ёрмисьёслы юрттӥськемдэ Инмар кабыл басьтӥз;5али Иоппияе адямиосты ысты но Петр шуон Симонэз татчы ӧть:6со Симон ку посӥсь дорын куноя. Солэн коркаез зарезь дурын сылэ. Со тыныд кылъёс вералоз, со кылъёсын тон но, тынад быдэс семьяед но утиськоды».7Соин вераськись Кылчин палэнскем бере Корнилий кык медооссэ но Инмарлы оскись одӥгзэ солдатсэ ӧтиз.8Корнилий соослы ваньзэ вераз-валэктӥз но соосты Иоппияе ыстӥз.

9Мукетаз нуналэ, Иоппия карлы матэ вуыкузы, ог куать час котырын Петр корка йылэ вӧсяськыны тубиз.10Кӧт сюмамзэ шӧдыса сиськыны малпаз. Сиён дасян куспазы солы паймымон адӟон возьматскиз:11усьтӥськем инмез адӟиз. Со доры, музъем вылэ, ньыль пал сэрегтӥз ик думем бадӟым ӝӧккышет кадь, кыӵе ке но сосудлэсь лэзиськемзэ со адӟиз.12Отын олокыӵе но музъем выл пӧйшуръёс, нюж ветлӥсьёс, ин тылобурдоос вал.13Солы куара кылӥськиз: «Султы, Петр, ванды но си».14Но Петр шуиз: «Уг, ноку но уг сиы. Кузё-Инмаре, мон ноку но юрӟым, чылкыттэм макеез ӧй сиылы».15Соку кыкетӥ ползэ солы куара вераз: «Мае Инмар дун-чылкыт кариз, сое тон чылкыттэм шуыса эн лыдъя».16Тазьы куинь пол луиз, – собере сосуд берен инме ӝутӥськиз.

17Петр та адӟонэз адӟем бераз, ас понназ паймыса, мае меда та возьматэ шуыса улон дыръяз Корнилиен ыстэм пиосмуртъёс, Симонлэсь корказэ утчаса, капка выжые вуизы.18Кеськыса юазы: «Татын-а улэ Петр шуон Симон?»19Адӟемез сярысь Петр малпаськыса улыку, Дух солы шуиз: «Тани, тонэ куинь адямиос утчало.20Султы, васькы но, нокыӵе кариськытэк, соосын ӵош мын, – уго Мон соосты ыстӥ».21Корнилийлэн ыстэм адямиосыз доры васькыса, Петр шуиз: «Мон – со, кинэ тӥ утчаськоды; кыӵе муген тӥ лыктӥды?»22Соос шуизы: «Корнилий – сю солдатэн кивалтӥсь, шонер, Инмарлэсь кышканэн улӥсь, вань иудейёслэн гажано муртсы, Инмар Кылчинлэсь тонэ аслаз дораз ӧтьыны но тынэсьтыд веранъёстэ кылзӥськыны косон басьтӥз».23Соку Петр соосты, корка пыртыса, куно кариз, нош мукетаз нуналэ султӥз но соосын ӵош кошкиз. Иоппияысь куд-огез агай-вынъёс но соин ӵош мынӥзы.

24Мукетаз нуналэ соос Кесарияе вуизы. Ӵыжы-выжыоссэ, матысь эшъёссэ ӧтьыса, Корнилий соосты витиз.25Петр пырыку, Корнилий сое пумитаз но со азе пыдесъяськыса йыбырттӥз.26Нош Петр сое ӝутыса шуиз: «Султы, мон но тон кадь ик адями гинэ уго».27Корнилиен вераськыса, Петр корка пыриз. Трос люкаськем калыкез адӟыса,28соослы со шуиз: «Тӥ ӟеч тодӥськоды, иудейлы мукет выжы калыкъёсын кусып возьыны яке соос доры ветлыны лэземын ӧвӧл шуыса. Но мыным Инмар усьтӥз: одӥгзэ но адямиез юрӟым яке чылкыттэм шуыса лыдъяны уг яра.29Соин ик мон, ӧтиды бере, пумитъяськытэк лыктӥ; юаме потэ: кыӵе муген тӥ монэ ӧтиды?»30Корнилий шуиз: «Ньыль нунал ӵоже та часозь мон визяса улӥ, укмысэтӥ часын аслам коркам вӧсяськыса улӥ. Но, тани, шӧдтэк шорысь мынам азям югыт тӧдьы дэремен пиосмурт султӥз но31шуиз: ”Корнилий! Тынад вӧсяськемед Инмар доры кылӥськиз, ёрмисьёслы юрттэмъёсыд но Инмар дорын кабыл басьтэмын.32Озьыен, кинэ ке Иоппияе ысты но Петр шуон Симонэз татчы ӧтьыса вай: со али зарезь дурысь Симон ку посӥсьлэн корказ куноя. Со лыктыса тыныд вералоз”.33Соку мон тон доры ӧтисьёсты ыстӥ. Кыӵе умой – тон лыктӥд! Али ваньмы ми татын Инмар азьын сылӥськомы Инмарлэсь тыныд ваньзэ вераны косэмъёссэ кылзон понна».

34Петр вераны кутскиз, со шуиз: «Зэмзэ ик табере валасько, Инмар адямиосты вылтус шоры учкыса улӥё-вылӥё уг кары.35Котькуд калык пӧлысь Солэсь кышканэн, шонерлыко улӥсь муртъёс Солы кельшымонэсь-ярасесь луо.36Иисус Христос пыр тупаса улон сярысь Ӟеч Ивор тодытыса, израиль пиослы Со веран кыл ыстӥз. Иисус Христос – ваньмызлы Кузё-Инмар.37Иоанн пылатонэз тодытэм бере, Галилеяысен кутскыса, быдэс Иудей музъемын мар луэмез тӥ тодӥськоды.38Тӥ кылӥды, кызьы Инмар Назаретысь Иисусэз Святой Духен но кужымен вӧйын зырӟыса пуктӥз, кызьы Со ӟеч ужъёс лэсьтылыса, диаволлэн киулаз сюремъёсты ваньзэс бурмытылыса ветлӥз, – малы ке шуоно Инмар Соин валче вал.39Мар Со лэсьтӥз Иудей шаерын, Иерусалимын, кызьы Сое кирос борды кортӵогаса виизы, ми ваньзэ тае адӟисьёс луиськомы.40Куиньметӥ нуналаз Инмар Сое улӟытыса султытӥз но адямиослы возьматскылыны Солы эрик сётӥз,41вань калыклы возьматскыны эрик ӧз сёты, нош милемлы, адӟеммес ивортӥсьёслы, Инмарлэн азьвыл ик быръем муртъёсызлы, кулэмысь улӟыса султэм бераз Соин ӵош сиыса, юыса улэм муртъёслы, возьматскылыны эрик сётӥз.42Со – улэпъёслэн но кулэмъёслэн Инмарен пуктэм Судьязы луэ, Со милемыз калыклы тодытыны, адӟеммес ивортыны косӥз.43Иисус Христос сярысь вань пророкъёс иворто, котькудӥз но Солы оскись мурт Солэн нимыз пыр сьӧлыкъёсты куштон басьтоз».

44Петр та кылъёссэ эшшо вера на вал, – солэсь верамзэ вань кылзӥсьёс вылэ Святой Дух васькиз.45Петрен валче Иоппияысь лыктэм вандӥськемъёс пӧлысь потэм оскисьёс паймизы, язычникъёс вылэ но Святой Духлэн дэлетэз лэзиськиз шуыса, –46уго язычникъёслэсь но мукет кылъёсын вераськемзэс, Инмарез данъямзэс соос кылӥзы.47Соку Петр шуиз: «Та адямиос асьмеос кадь ик Святой Духез басьтӥзы. Соин ик кин ке но соослы вуын пылатонэз алыны быгатоз шат?»48Иисус Христослэн нимыз понна соосты пылатӥськыны косӥз. Собере соос Петрез доразы эшшо кӧня ке но нунал мед улоз на шуыса куризы.


*а 10:9 туала дырын ог 12 час, нуназе шор

*б 10:9 10:9 лымшорысь пӧсьпал шаеръёсын коркаослэн липетсы ӧвӧл, соос ӵошкытэсь, отын сиськыны но, кӧланы но, вӧсяськыны но луэ


предыдущая глава Глава 10 следующая глава