Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 2

2-тӥ ЛЮКЕТ

1Витьтонэтӥ Нунал вуиз. Со нуналэ ваньзы соос огазьын, огкылысь кариськыса улӥзы.2Малпамтэ шорысь инмысь кужмо сильтӧллы укшась куара кылӥськиз. Пукон корка пушказы пырыса, со куара кужмо шуккиськиз.3Соос доры тыллы укшась люкылӥськись кылъёс лыктӥзы но котькудзы вылэ одӥген-одӥген пуксьылӥзы.4Ваньзы Святой Духен тыр луизы но мукет кылъёсын вераськыны кутскизы, кызьы соослы Дух вераськыны луонлык сётӥз.

5Нош та виын Иерусалиме инбам улысь вань калыкъёс пӧлын мур осконэн вӧсяськыса улӥсь иудейёс люкаськемын вал.6Та куара кылӥськем бере татчы трос адямиос лыктӥзы но паймыса алекъяськыны кутскизы: уго котькудзы но соос асьсэлэн кылынызы Иисуслэн дышетскисьёсызлэсь вераськемзэс кылӥзы.7Соос абдразы, паймизы но куспазы вераськизы: «Та вераськисьёс ваньзы ик Галилеяысь ӧвӧл-а?8Нош кызьы бен ваньмы таослэсь асьмелэн вордскем кылынымы вераськемзэс кылӥськомы?9Ми пӧлын вань парфянъёс но, мидянъёс но, еламитъёс но, Месопотамияын, Иудеяын, Каппадокияын, Понтын но Асияын улӥсьёс,10Фригияысь но Памфилияысь, Египетысь но Ливиялэн Киринея вӧзысь улосъёсысьтыз, Римысь лыктэмъёс, иудейёс но иудей осконэ выжем муртъёс,11крит калык но арабъёс, – ваньмы ми соослэсь асьме кылын Инмарлэн быдӟым ужъёсыз сярысь вераськемзэс кылӥськомы?»12Ваньзы паймизы но абдраса огзылы огзы шуизы: «Мар таӵе та?»13Нош куд-огез серекъяса, ултӥяса шуизы: «Соос ческыт вина юыса кудӟиллям».

14Соку Петр дас одӥг апостолъёсын ӵош султӥз но, куаразэ будэтыса, соослы ялӥз: «Иудей воргоронъёс, Иерусалимын вань улӥсьёс! Мынэсьтым кылъёсме сак кылзэ, та тӥледлы тодмо мед луоз:15та адямиос кудӟемын шуыса малпаськоды, нош соос кудӟемын ӧвӧл, али ӵукна, нуналлэн куинетӥ часэз гинэ уго, –16та сярысь Иоиль пророк азьвыл ик тодытыса вераз вал:

17”Берпум нуналъёсы, – Инмар шуэ, –
Аслэсьтым Духме вань адямиос вылэ кисьто.
Соку тӥляд пиосты, тӥляд нылъёсты Инмарлэсь кылзэ ивортылозы,
тӥляд егит пиосты адӟонъёс адӟылозы,
тӥляд пересьёсты уйвӧтъёс пыр визьмамын луозы.
18Ляльчи пиосы вылэ, ляльчи нылъёсы вылэ
со нуналъёсы Аслэсьтым Духме кисьто но,
Инмарлэсь кылзэ соос ивортылозы.
19Вылӥын, инмын, паймымон ужъёс возьмато;
улӥын, музъем вылын, – паймымон тодметъёс:
вир, тыл, бугырскем ӵын.
20Кузё-Инмарлэн быдӟым, данлыко нуналэз
вуэмлэсь азьло шунды пеймытомоз,
нош толэзь – вир кадь гордэктоз.
21Тазьы луоз: котькудӥз
Кузё-Инмарлэн нимызлы тэльмырыса вазиськись мурт
утемын луоз”.

22Израильысь воргоронъёс! Та кылъёсты пеляды понэ: Назаретысь Иисус тӥ понна Инмарлэн быръем Пимуртэз луэ. Тае Инмар кужмоесь, паймымонэсь ужъёс, паймымонэсь тодметъёс пыр юнматыса возьматӥз. Соосты Инмар тӥ пӧлын Иисус пыр лэсьтӥз. Тае тӥ асьтэос тодӥськоды.23Инмарлэн эрикезъя, Солэн азьвыл ик мылкыд каремезъя Иисус тӥ кие сётэмын вал, нош тӥ кутӥды но законэз тодытэк улӥсьёслэн киынызы Сое кортӵогаса вииды.24Кулонлэсь жильыетсэ тӥяса, Инмар Сое улӟытыса султытӥз, – кулонлэн Сое кутыса воземез уг луы вал уго.25Давид Со сярысь тазьы вера:

”Котьку но азьысьтым Кузё-Инмарез адӟисько,
мон медам куалектылы шуыса, Со котьку но мынам бурпалам.
26Соин ик мынам сюлэмы шумпотӥз,
кылы шулдырмиз, лулмугоры но оскиськыса каньылэн улоз.
27Тон мынэсьтым лулме адэ уд кельты уго,
дун-чылкыт улӥседлы сисьмонэз уд адӟыты;
28Тон мыным улон сюресэз тодон сётӥд;
Аслад син азяд Тон монэ шумпотонэн тыр карод”.

29Агай-вынъёс! Вашкала пересь атаймы Давид сярысь тӥледлы шонерак вераны быгатӥсько, со кулӥз но ватэмын вал, солэн шайгуэз туннэ нуналозь асьме дорын шуыса.30Давид пророк вал, солэн кидысысьтыз-выжыысьтыз лулмугорын Христос ӝутэмын луоз, солэн эксэй пукон вылаз Со пуктэмын луоз шуыса, Инмарлэсь кыл сётыса верамзэ со тодэ вал.31Со азьвыл ик Христослэн улӟыса султонэз сярысь вераз. Солэн лулыз адэ кельтэмын уз луы, Солэн лулмугорыз сисьмонэз уз адӟы шуыса вераз.32Инмар Иисусэз кулэмысь улӟытыса султытӥз. Тае ваньмы асьмеос адӟисьёс луиськомы.33Озьыен, Сое Инмар Аслаз бурпалаз ӝутэм бере Атайлэсь сӥзем Святой Духсэ Со басьтӥз но тӥ вылэ кисьтӥз, кудзэ тӥ табере асьтэос адӟиськоды, кылӥськоды.34Давид Инме ӧз ке но ӝутскылы ук, но со ачиз шуиз:

”Кузё-Инмар мынам Кузё-Инмарелы шуиз:
35тушмонъёстэ пыд улад понытозям,
Мынам бурпалам пук”.

36Озьыен, быдэс израиль калык, юн тод: Инмар со Иисусэз, Кудзэ тӥ кортӵогады, Кузё-Инмар но, Христос но кариз шуыса».

37Тае кылэм беразы адямиослэн сюлэмзы чутрак луиз, Петрлы но, мукет апостолъёслы но соос шуизы: «Агай-вынъёс, милемлы мар кароно?»38Петр соослы шуиз: «Сьӧлыкъёсты мед куштӥськозы шуыса, сьӧлыкъёсты понна ӧпкеле но ваньды Иисус Христослэн нимыз понна пылатӥське, соку тӥ Святой Духез кузьымез кадь кабыл басьтоды.39Уго тӥледлы сӥзён сётэмын, тӥляд нылпиостылы но, озьы ик ваньмызлы, кинъёс али Инмарлы кыдёкын уло на, – ваньмызлы, кинэ гинэ Кузё-Инмар асьмелэн Инмармы уз ӧтьы».40Трос мукет кылъёсын но со тодытылӥз, алыса шуылӥз: «Та азэм выжылэсь утиськелэ».41Солэсь кылзэ шумпотыса кабыл басьтӥсьёс пылатӥськизы, со нуналэ вӧсяськисьёс пӧлы ог куинь сюрс адями ватсаськиз.

42Оскыны кутскемъёс, апостолъёслэсь дышетэмзэс утьыса, ялан ог-огенызы кусып возьыса, нянь тӥялтыса, вӧсяськыса улӥзы.43Котькуд адями Инмар азьын гажанэн-кышканэн улӥз. Иерусалимын апостолъёс пыр трос паймымон ужъёс, паймымон тодметъёс ортчылӥзы.44Оскисьёс ваньзы огазьын улӥзы, соослэн ваньмыз огъя вал:45коркаоссэс, тӥрлыкъёссэс вузаллязы но ёрмыса-ӟудыса улӥсьёслы сётъяллязы.46Котькуд нуналэ, огкылысь кариськыса, храмын вӧсяськыса улӥзы. Кин ке но доры лыктыса, нянь тӥялтылӥзы, огазьын сиськизы, шулдырен, капчи сюлмын,47Инмарез ушъяса-данъяса улӥзы. Вань калык соосты яратӥз. Кузё-Инмар нуналлы быдэ утиськон сюрес вылэ тросгес но тросгес адямиосты султытӥз, Черк борды соосты карылӥз.


*а 2:1 Витьтонэтӥ Нунал – Пятидесятница

*б 2:15 туала дырын 9 час, ӵукна

*в 2:36 Христос: Мессия, Вӧйын Зырӟыса Пуктэм


предыдущая глава Глава 2 следующая глава