Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

АПОСТОЛЪЁСЛЭН УЖЪЁССЫ

Глава 1

1-тӥ ЛЮКЕТ

1Нырысетӥ книгаям, Феофил, мон гожтӥ ваньзэ кутсконысеныз ик ма кариз, малы дышетӥз Иисус, –2Инме ӝутскем но Святой Дух пыр быръем апостолъёсызлы косонъёс сётэм нуналозяз.3Ачиз курадӟон чидам бераз соослы Со возьматскылӥз, улэп луэмзэ оскымонэсь трос тодметъёсын юнматылӥз; ньыльдон нунал ӵоже соослы возьматъяськылӥз но Инмар Эксэйлык сярысь вераса-тодытыса улӥз.

4Дышетскисьёсыныз сиськыны огазе люкаськон дыръя Иисус соослы косон сётӥз: «Иерусалимысь эн кошке, Атайлэсь кыл сётыса верамезлэсь быдэсмемзэ возьмалэ. Со сярысь Мон тӥледлы вералляй.5Иоанн вуэн пылатӥз, нош тӥ, кӧня ке нунал ортчыса, Святой Духен пылатэмын луоды».

6Апостолъёс огазе вуыса, Иисуслэсь юаллязы: «Кузё-Инмармы, оло, та вакытэ ик-а ни Тон Израиль эксэйлыкез ӝутӥськод?»7Соослы Со шуиз: «Тӥляд ужды ӧвӧл дырез, срокез тодыны, кудъёссэ Атае Аслаз киулаз кутыса возе.8Тӥ вылэ Святой Дух васькоз но, тӥ кужым басьтоды. Иерусалимын но, быдэс Иудеяын но, Самарияын но, быдэс музъемлэн пумысеныз пумозяз ик Мынам адӟисьёсы-ивортӥсьёсы тӥ луоды».

9Тае верам бераз соослэн син азязы ик Иисус ӝутскиз, но ӝоген пилем Сое азьысьтызы басьтӥз.10Солэн ӝутскон дыръяз дышетскисьёсыз инбам пала учкыса уло вал. Шӧдтэк шорысь тӧдьы дӥськутэн кык пиосмуртъёс соос азе лыктыса султӥзы но11шуизы: «Галилеяысь пиосмуртъёс! Мар тӥ инбам шоры учкыса сылӥськоды? Та, тӥ дорысь Инме ӝутскем Иисус, кызьы тӥ адӟиды Солэсь Инме ӝутскемзэ, Со озьы ик лыктоз».

12Соку апостолъёс Елеон шуон гурезьысь Иерусалиме берытскизы. Со гурезь Иерусалимлы матын, суббота нуналэ ортчыны лэзем сюрес кемын сылэ.13Берытскем беразы соос коркалэн бадӟым палаз тубизы. Соос пӧлын вал Петр, Иаков, Иоанн но Андрей, Филипп но Фома, Варфоломей но Матфей, Алфей Иаков, Зӥлот Симон но Иаков Иуда.14Ваньзы соос кышномуртъёсын огазьын, Иисуслэн Анаеныз Марияен, Иисуслэн братъёсыныз ӵош, огкылысь ялан вӧсяськыса улӥзы.

15Со нуналъёсы Петр дышетскисьёслэн шоразы султыса шуиз, –16нош люкаськонын ог сю кызь мурт вал: «Агай-вынъёс! Быдэсмиз Гожтэмысь веран, кудзэ Святой Дух Давид пыр Иисусэз кутыса басьтӥсьёслэн валтӥсьсы Иуда сярысь азьвыл ик тодытӥз.17Со асьме пӧлы пыртэмын вал, та ужез нуыны со люкет басьтӥз».18Сьӧд ужезлэн дуныныз Иуда музъем басьтӥз, нош куке со йыруллань луиз, солэн пушкыз кесиськиз но, вань пуш макеосыз кисьтӥськизы;19Иерусалимын вань улӥсьёслы та тодмо луиз, соин ик со музъем соослэн вордскем кылазы Акелдама, ”Вир музъем” шуыса нимамын вал.

20«Псалом книгаын тазьы гожтэмын:
”Солэн улон интыез тырттэм мед кылёз,
отын улӥсез медаз луы”;
”Солэсь ужан-тыршон интызэ мукетыз мед басьтоз”.

21-22Озьыен, Кузё-Инмар Иисус асьме пӧлын улон дыръя, – Иоаннлэн пылатонэз дырысен кутскыса Иисуслэн асьме дорысь ӝутскон нуналозяз, – асьмемын ӵош ветлӥсь пиосмуртъёс пӧлысь али асьмеос одӥгзэ бырйыны кулэ. Со асьмемын ӵош Иисуслэсь улӟыса султонзэ адӟемзэ ивортӥсь луыны кулэ».

23Кык муртэ бырйизы: Варсава шуон Иосифез, сое Иуст шуыса нимало вал, но Матфиез.24Собере соос тазьы шуыса вӧсяськизы: «Тон, Кузё-Инмармы, ваньмызлэсь сюлэмзэс Тодӥсь, та кык мурт пӧлысь возьматы одӥгзэ, кудзэ Тон бырйиськод25ужаны-тыршыны, апостол луонэз басьтыны, кудӥз бордысь аслаз интыяз мынон понна усиз Иуда».26Та пумысен пус чӧлтӥзы. Пуссы Матфий вылэ усиз. Со дас одӥг апостолъёс пӧлы пыртэмын вал.


*а 1:12 одӥг иськем мында кыстӥськись сюрес


предыдущая глава Глава 1 следующая глава