Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 6

6-тӥ ЛЮКЕТ

1Пасха бере одӥгаз суббота нуналэ Иисуслы кизем ю бусы вамен потоно луиз, Солэн дышетскисьёсыз ю шепъёсты чигылӥзы но киынызы куадаса сиизы.2Фарисейёс пӧлысь куд-огез соослы шуизы: «Малы суббота нуналэ лэсьтыны ярантэм ужез лэсьтӥськоды?»3Иисус соослы ответ сётыса шуиз: «Ӧд лыдӟе шат, мар кариз Давид, куке солэн аслаз но, соин ӵош луэмъёслэн но кӧтсы сюмаз?4Кызьы со Инмар корка пыриз но курбон нянез басьтӥз, кудзэ священникъёслы сяна, нокинлы но сиыны уг яра вал, – ачиз но сииз, асэныз валче ветлӥсьёслы но сётӥз».5Собере Иисус соослы шуиз: «Адями Пи субботалы но кузё луэ».

6Мукетаз субботае Иисус, сӥнагогае пырыса, дышетыны кутскиз. Отын бур киыз куасьмем мурт вал.7Иисусэз янгыше уськытон вылысь книга тодӥсьёс но фарисейёс Со сьӧрын чакласа улӥзы: суббота нуналэ уз бурмыты-а?8Соослэсь малпанзэс тодыса, киыз куасьмем муртлы Иисус шуиз: «Султы, пот шораз». Со султӥз но шораз потӥз.9Соку Иисус соослы шуиз: «Тӥлесьтыд Мон юало: суббота нуналэ мар лэсьтыны яра? Ӟеч уж яке урод уж? Лулэз утьыны яке быдтыны?» Соос шып улӥзы.10Ваньзы шоры учкиз но со муртлы шуиз: «Кидэ шонер кар». Со озьы ик кариз; киыз мукетыз кадь ик йӧн луиз.11Соос урмизы, мар меда Иисусэн кароно шуыса, куспазы вераськизы.

12Со нуналъёсы Иисус гурезь йылэ вӧсяськыны тубиз, быдэс уй Инмарлы вӧсяськыса улӥз.13Нунал вуэм бере Аслэсьтыз дышетскисьёссэ Со ӧтиз но соос пӧлысь дас кыксэ бырйиз, соосты апостолъёс шуыса нимаз:14Симонэз Петр шуыса нимаз, солэсь Андрей вынзэ, Иаковез но Иоаннэз, Филиппез но Варфоломеез,15Матфеез но Фомаез, Алфейлэсь Иаков пизэ но Зӥлот шуон Симонэз,16Иаковлэсь Иуда пизэ но Искариот Иудаез. Таиз Инмар Пиез вузаса сётӥсь луиз.

17Соосын ӵош васькыса, Иисус ӵошкыт интые султӥз. Тросэз дышетскисьёсыз, озьы ик быдэс Иудеяысь но Иерусалимысь, зарезь котырысь Тир но Сӥдон ёросъёсысь лачак калык отын вал.18Сое кылзӥськыны, висёнъёссылэсь йӧнатскыны соос лыктӥзы. Перияськем муртъёсты но Со бурмытылӥз.19Вань калык Со борды йӧтӥськыны тыршиз, малы ке шуоно Со бордысь кужым потыса, ваньзэс бурмытъяз.20Синъёссэ дышетскисьёсыз пала ӝутыса, Иисус шуиз:

«Покчи мылкыдоос шудоесь: тӥляд Инмар Эксэйлыкты вань.
21Али сютэм улӥсьёс шудоесь: тӥляд кӧтты тыр луоз.
Али бӧрдӥсьёс шудоесь: тӥ серекъялоды.

22Шудоесь тӥ, куке тӥледыз Адями Пи понна адямиос адӟонтэм каризы ке, куке тӥледыз люкизы ке, курлазы ке, нимдэс саптаса куштӥзы ке.23Шумпотэлэ со нуналэ, шулдыръяськелэ, уго Инмын басьтоно медды-кузьымды туж бадӟым. Соослэн атайёссы но пророкъёсты тазьы ик карылӥзы.

24Куректон-кайгу тӥледлы, узыръёс!
Шумпотыса улондэс тӥ басьтӥды ни.
25Куректон-кайгу тӥледлы, али тыр улӥсьёс!
Сиемды потоз уго.
Куректон-кайгу тӥледлы, али серекъяса улӥсьёс!
Бӧрдоды, викышъялоды ай.

26Куректон-кайгу тӥледлы, куке вань адямиос тӥ сярысь ушъяса вералозы. Соослэн атайёссы озьы каризы ӧрекчи пророкъёсын.

27Тӥледлы, кылзӥськисьёслы, верасько: тушмонъёстэс яратэлэ, тӥледыз кӧтвеськантэм карисьёстылы ӟеч каре,28тӥледыз каргасьёсты бакель каре, тӥледыз ултӥясьёс понна вӧсяськелэ.29Бамад чабкись муртлы мукет палзэ но пукты. Выл дӥсьтэ талась муртлы эн люкеты дэремдэ но басьтыны.

30Котькинлы, курись муртлы, сёт, тынэсьтыд басьтэм муртлэсь берен эн кур.31Адямиослы озьы лэсьтэ, кызьы асьтэлы соослэсь лэсьтэмзэс кулэ кариськоды.32Асьтэдыз яратӥсьёсты яратӥськоды ке, со понна тӥледлы кыӵе берекет луоз! Сьӧлыкоос но уго соосты яратӥсьёсты ярато.33Асьтэлы ӟеч лэсьтӥсьёслы ӟеч лэсьтӥськоды ке, со понна тӥледлы кыӵе берекет? Сьӧлыкоос но уго озьы ик каро.34Пунэмен сётӥськоды ке сыӵеослы, кинъёслэсь пунэм тыронзэс берен басьтом шуыса оскиськиськыса улӥськоды ке, со понна кыӵе тӥледлы берекет? Уго сьӧлыкоос но сьӧлыкоослы пунэмен сёто берен сомында ик басьтон вылысь.35Нош тӥ тушмонъёстэс яратэлэ, ӟеч уж лэсьтэлэ, пунэмен сётэ, берен номыр но басьтыны малпатэк. Тӥляд туж бадӟым медды-кузьымды луоз, Вылысь Инмарлэн нылпиосыз луоды. Со уго тау карисьтэмъёслы но, лекъёслы но ӟеч.36Кыӵе тӥляд атайды жалясь сюлэмо, тӥ но жалясь сюлэмоесь луэлэ.

37Судить эн каре, тӥ но судить каремын уд луэ. Эн курлалэ, тӥ но курламын уд луэ. Простить каре, тӥ но простить каремын луоды.38Сётэлэ, тӥледлы но сётӥськоз: тыр мертэтэн мертаса, сэзъяса, туйылыса, пачыл карыса тӥледлы, тӥляд кияды сётӥськоз. Уго кыӵе мертэтэн мерталоды, сыӵеен ик тӥледлы но мертаськоз».39Соослы мадён но вераз: «Быгатэ-а синтэм мурт синтэмез валтыса нуыны? Кыксы ик гуэ уз усе-а?40Дышетскись дышетӥсезлэсь вылынгес уг луы; пумен визь люкаса но, дышетскись дышетӥсез кадь гинэ луоз.41Малы тон мукет муртлэн синмысьтыз жагез шоры учкиськод, нош аслад синмысьтыд корзэ уд шӧдӥськы?42Яке, кызьы тон мукет муртлы шуыны быгатод: ”Братэ! Вай синмысьтыд жагзэ потто”, куке аслад синмысьтыд корзэ уд адӟиськы? Чеберъяськись! Нырысь аслад синмысьтыд корзэ потты, соку адӟод, кызьы мукет муртлэн синмысьтыз жагзэ поттоно.43Ӟеч писпу урод емыш уг сёты; урод писпу но ӟеч емыш уг сёты.44Котькыӵе но писпуэз емышезъя тодманы луэ, малы ке шуоно смоква емышез тёрнпуысь уг бичало, виноградэз но емыш сётӥсьтэм куакысь уг окто.45Ӟеч адями ас сюлмызлэн ӟеч шыкысысьтыз ӟечсэ поттэ, нош лек адями сюлмызлэн лек шыкысысьтыз лексэ поттэ. Уго сюлэм пачылмыку, кыл вера.

46Малы тӥ Мыным вазиськиськоды: ”Кузё-Инмаре! Кузё-Инмаре!”, нош асьтэос Мынэсьтым косэмме уд лэсьтӥське?47Котькудӥз Мон доры лыктӥсь, Мынэсьтым кылме кылзӥськись но соосты быдэсъясь мурт, тӥледлы верало, кинлы со укша, –48гу гудӟыса пыдло пырем но коркаезлэсь инъетсэ из вылэ пуктэм муртлы со укша. Ву будыса та корка вылэ урдскем но вырӟытэмез луымтэ, малы ке шуоно со из вылэ пуктэмын вылэм.49Нош кылзӥськись но быдэсъясьтэм адями корказэ сюй вылэ инъеттэк пуктэм муртлы укша. Корка вылэ ву урдскем но, соку ик со куашкам; та коркалэн куашкамез туж шимес вылэм».


предыдущая глава Глава 6 следующая глава