Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 5

5-тӥ ЛЮКЕТ

1Огпол Инмар кылэз кылон понна калык Иисус борды ӝиптӥськыса улӥз. Со Геннисарет зарезь дурын сылӥз.2Зарезь вылын сылӥсь кык пыжъёсты адӟиз. Чорыгасьёс, пыжысьтызы потыса, калтонъёссэс гылъяло вал.3Соку Со Симонлэн пыжаз пыриз но ярдурысь ӧжытак палэнэгес полысаны куриз. Со пуксьыса пыжысен калыкез дышетыны кутскиз.4Дышетыса дугдэм бераз Симонлы шуиз: «Мур азегес полыса, чорыг кутылыны калтондэс вуэ лэзе».5Солы ответ сётыса, Симон шуиз: «Дышетӥсь! Ми уйбыт тыршимы, нош номыр но ӧм кутэ; но Тынад косонэдъя калтонэз лэзё».6Тае лэсьтэм беразы туж трос чорыг кутӥзы, калтонзы ик ӟезиськылӥз.7Соослы юрттӥськыны мед лыктозы шуыса, мукет пыжысь эшъёссылы тодмет возьматӥзы. Лыктыса кыксэ ик пыжез тырмытӥзы, пумен выйыны кутскизы.8Тае адӟыса, Симон Иисус азе пыдес вылаз уськытскыса шуиз: «Кузё-Инмаре! Пот мон дорысь, мон сьӧлыко адями уго».9Со но, ваньзы соин ӵош вылэмъёс, калтыса кутэм чорыгзы трос луэмысь, туж куалектӥзы;10озьы ик Симонлэн эшъёсыз, Зеведей пиос, Иаков но Иоанн. Иисус Симонлы шуиз: «Эн курда; та дырысен тон адямиосты кутылод».11Кыксэ но пыжъёсты ярдуре поттӥзы; собере марзы вань, ваньзэ кельтыса, Со сьӧры мынӥзы.

12Иисус одӥгаз городын улыку, быдэс мугорзэ гижло басьтэм мурт лыктӥз но, Иисусэз адӟыса, пыдесъяськиз, сюлворыса Солэсь куриз: «Кузёе! Чылкытатэмед потӥз ке, Тынад монэ чылкытатэмед луоз».13Иисус, кизэ ӝутыса, со мурт борды йӧтӥськыса шуиз: «Мынам чылкытатэме потэ – чылкыта». Соку ик солэн гижлочерез быриз.14Иисус нокинлы но та сярысь вераны ӧз лэзьы, священник доры мыныны но, кызьы косӥз Моисей, чылкытамез понна курбон сётыны косӥз, – соослы тодытон понна.15Озьы ке но Иисус сярысь ивор паськыт вӧлмиз, Сое кылзыны но асьсэлэн висёнъёссылэсь йӧнатӥськыны туж трос калык Со котыре лыктӥз.16Нош Со, калыктэм интыосы кошкыса, отын вӧсяськыса улӥз.

17Одӥг нунал, дышетыса улыкуз, татын пукизы Галилеялэн вань гуртъёсысьтыз, Иудеяысь, Иерусалимысь лыктэм фарисейёс но законлы дышетӥсьёс. Кузё-Инмарлэн кужымез висисьёсты бурмытъяку возьматскылӥз.18Тани, кинъёс ке но валес вылын пери шуккем муртэ вайизы но, корка пыртыса, Иисус азе поныны тыршизы.19Трос калык люкаськемен сэрен пыртон инты шедьтытэк, корка йылэ тубизы но липет пыр валесэныз валче коркалэн шораз Иисус азе лэзизы.20Соослэсь осконзэс адӟыса, со муртлы Иисус шуиз: «Тынад сьӧлыкъёсыд куштӥсько».21Книга тодӥсьёс, фарисейёс куспазы вераськыса шуизы: «Кин со Инмарез сантэмась? Одӥг Инмар сяна, кин сьӧлыкъёсты куштыны быгатэ?»22Соослэсь малпанзэс шӧдӥз но, соослы ответ сётыса, Иисус шуиз: «Мар тӥ сюлмады малпаськоды?23Мае капчигес вераны: ”Тынад сьӧлыкъёсыд куштӥсько” яке шуыны: ”Султы но ветлы”?24Адями Пилэсь музъем вылын сьӧлыкъёсты куштыны кужым ваньзэ тӥ мед тододы шуыса, – пери шуккем муртлы Со шуиз: «Тыныд верасько: султы, басьты валестэ но гуртад берт».25Соку ик соос азьын со султӥз, валессэ басьтӥз но, Инмарез данъяса, дораз бертӥз.26Ваньзы туж кышказы, Инмарез данъязы; кышканэз адӟем муртъёс шуизы: «Паймымон ужъёсты ми туннэ адӟимы».

27Та бере Иисус потӥз но, выт бичан интыын пукись Левий нимо выт бичасез адӟыса, солы шуиз: «Мон сьӧры мын».28Со маиз вань, ваньзэ кельтӥз, султӥз но Со сьӧры кошкиз.29Иисус понна Левий аслаз корказ бадӟым сиён-юон ортчытӥз. Отын трос выт бичасьёс, мукет адямиос но вал, ваньзы соосын ӵош сиськизы.30Нош фарисейёс но книга тодӥсьёс ӟургетыса улӥзы, Иисуслэн дышетскисьёсызлы шуизы: «Малы тӥ выт бичасьёсын, сьӧлыкоосын ӵош сииськоды, юиськоды?»31Иисус соослы ответ сётыса шуиз: «Висисьтэмъёслы эмъясь кулэ ӧвӧл, висисьёслы кулэ.32Шонер улӥсьёсты ӧтьыны Мон ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ».

33Иисуслы шуизы: «Малы Иоаннлэн дышетскисьёсыз ӵем визяло, вӧсясько, озьы ик фарисейёслэн но, нош Тынадъёсыз сиё но, юо но?»34Иисус соослы шуиз: «Эмеспи соос пӧлын улон дыръя быгатӥськоды-а сюанчиосты визяса пукытыны?35Но вуозы нуналъёс, – соос дорысь эмеспи басьтӥськоз, соку, со нуналъёсы, соос визялозы но».36Иисус соослы мадён вераз: «Нокин но выль дӥськут бордысь ӟезьыса вуж дӥськут вылэ кышъет уг пукты: уго соку со выльзэ ӟезёз, вужез борды но вылез бордысь кышъет уз тупа.37Выль винаез но нокин вужмем сепысъёсы уз лэзьы, малы ке шуоно выль вина сепысъёсыз кесёз но ачиз кисьтӥськоз, сепысъёс но арам луозы.38Выль винаез выль сепысъёсы лэзьыны кулэ; соку соиз но, таиз но быдэс кылёзы.39Вуж винаез юэм бераз нокинлэн но выль винаез юэмез уз поты, уго со шуоз: ”Вужез ӟечгес”».


предыдущая глава Глава 5 следующая глава