Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 7

7-тӥ ЛЮКЕТ

1Кылзӥськисьёслы вань верано кылзэ вераса быдтэм бераз Иисус Капернауме пыриз.

2Огезлэн сю солдатъёсын кивалтӥсьлэн яратоно ляльчиез кулоно кадь ик висе вал.3Иисус сярысь кылӥз но иудей тӧроосты Со доры, солэсь ляльчизэ лыктыса мед бурмытоз вал шуыса, Солэсь курыны ыстӥз.4Иисус доры лыктыса, туж куризы: «Тон солы юртты вал, со ярамон адями,5со асьмелэсь калыкмес яратэ, асьмелы сӥнагога но пуктӥз ук».

6Иисус соосын ӵош мынӥз. Коркалы матэ вуэм бераз сю солдатэн кивалтӥсь Иисус доры эшъёссэ Солы вераны ыстӥз: «Кузёе! Эн сюлэмшугъяськы. Тон мынам коркам пырон понна мон ярамон адями ӧвӧл.7Соин ик асме ачим Тон доры мыныны ярамон адями ӧвӧл шуыса лыдъяй; кыл гинэ вера но, мынам ляльчие бурмоз.8Мон уго ачим но мурт киулын ужась адями. Но мынам киулам солдатъёс вань, огезлы шуисько: ”Мын”, – со мынэ; мукетызлы: ”Лыкты”, – со лыктэ; ляльчиелы шуисько: ”Лэсьты сое”, – со лэсьтэ».9Тае кылыса, Иисус паймиз но сьӧраз лыктӥсьёслы шуиз: «Тӥледлы верасько: Израильысь но таӵе осконэз Мон ӧй шедьты».10Ыстэм муртъёс корказы берытскыку, ляльчи бурмемын вал ни.

11Та бере Иисус Наин шуон городэ мынӥз; Соин ӵош тросэз дышетскисьёсыз, туж уно калык мынӥзы.12Со кар капкалы матэ вуыку, кулэм муртэ потто вал. Анаезлэн со одӥг гинэ пиез вал, анаез – палкышно; трос калык келяськыса мынӥз.13Кузё-Инмар сое адӟиз но жаляса шуиз: «Эн бӧрды».14Матаз лыктыса, кулэм мурт нуон маке борды йӧтӥськиз; нуисьёс дугдӥзы. Со шуиз: «Пияш! Тыныд верасько: султы».15Кулэм пи ӝутӥськыса пуксиз но вераськыны кутскиз; Иисус сое анаезлы сётӥз.16Ваньзы ик туж куалектӥзы но Инмарез данъяса шуизы: «Асьме куспысь быдӟым пророк султӥз. Инмар Ас калыкез доры вуылӥз».17Иисус сярысь таӵе ивор быдэс Иудеяе, котыр ёросъёсы вӧлмиз.

18Та сярысь дышетскисьёсыз ваньзэ Иоаннлы веразы.19Иоанн кыксэ дышетскисьёссэ ӧтиз, соосты со Иисус доры юаны ыстӥз: «Тон-а Со, Кудӥз лыктыны кулэ, яке милемлы мукетсэ-а витёно?»20Иисус доры лыктыса шуизы: «Иоанн Пылатӥсь милемыз Тон доры юаны ыстӥз: ”Тон-а Со, Кудӥз лыктыны кулэ, яке милемлы мукетсэ-а витёно?”»21Нош та вадесын Со трос муртэ висёнъёссылэсь, курадӟонъёссылэсь, периослэсь мозмытӥз, троссэ синтэмъёсты адӟись кариз.22Соослы ответ сётыса, Иисус шуиз: «Мар адӟиды, кылӥды, мынэлэ но Иоаннлы вералэ: синтэмъёс адӟыны кутско, чутъёс ветло, гижлочерен висисьёс чылкытало, пельтэмъёс кыло, кулэмъёс улӟо, куанеръёс Ӟеч Ивор тодыто.23Мон пумысен визь сынаськонлы сётскисьтэм мурт шудо».

24Иоаннлэн ыстэм муртъёсыз кошкем бере Иоанн сярысь калыклы вераны кутскиз: «Кыр дуннее мае учкыны ветлӥды? Тӧл шорын веттаськись камыш бодыез-а?25Мае бен тӥ учкыны ветлӥды? Небыт дӥськутэн дӥсяськем адямиез-а? Небыт дуно дӥськут нуллӥсьёс, узыр улӥсьёс эксэйёслэн юртазы уло.26Мае бен тӥ учкыны ветлӥды? Пророкез-а? Тӥледлы верасько: бен, пророклэсь но вылӥысьсэгес.27Та со ук, кин сярысь гожтэмын:

”Тани, Мон Тынад азьтӥд Кылчинме лэзисько,
со Тынад азяд Тыныд сюрес дасялоз”.

28Тӥледлы верасько: кышномуртлэсь вордӥськемъёс пӧлысь Иоанн Пылатӥсьлэсь бадӟымез одӥг но пророк ӧвӧл; нош Инмар Эксэйлыкын покчиез но солэсь бадӟымгес».29Сое кылзӥськыса улэм вань калык, выт бичасьёс но, кудъёсыз Иоанн дорын пылатӥськизы, Инмарез данъязы.30Нош фарисейёс но закон тодӥсьёс, со дорын пылатӥськытэк, Инмарлэсь соос понна чаклам эриксэ палэнтӥзы.

31Соку Кузё-Инмар шуиз: «Та выжыысь адямиосты кинэн ӵошатом? Кинлы соос укшало?32Соос укшало ульчаын пукись, ог-огзылы вазиськись нылпиослы, кинъёс шуо: ”Ми тӥледлы чипчирган шудӥмы, нош тӥ ӧд эктэ; ми тӥледлы ӝож гуръёс кырӟамы, нош тӥ ӧд бӧрдэ”.33Иоанн Пылатӥсь лыктӥз, нянь но уг сиы, вина но уг юы, но тӥ шуиськоды: ”Со пушкын пери”.34Адями Пи лыктӥз, Со сие но, юэ но, но тӥ шуиськоды: ”Таиз адями сиськыны, вина юыны яратэ, выт бичасьёслэн, сьӧлыкоослэн эшсы Со”.35Визьлыклэн вань нылпиосыз визьлыклэсь шонер луонзэ возьмато».

36Фарисейёс пӧлысь одӥгез Иисусэз дораз сиськыны ӧтиз. Со фарисейлэн корказ пырыса пуксиз.37Тани, та городысь одӥг сьӧлыко кышномурт Солэсь фарисей дорын сиськыса улэмзэ тодӥз но алавастр посудаен миро вайыса лыктӥз.38Бертӥз Солэн пыд дораз кариськиз но бӧрдыса Солэсь пыдъёссэ синкылиен гылтӥз, ас йырысьтыз йырсиеныз ӵушылыны кутскиз. Солэсь пыдъёссэ чупаз но мироен зыраз.39Тае адӟыса, Сое ӧтем фарисей ас понназ ачиз шуиз: «Со пророк ке луысал, тодысал – кин но кыӵе кышномурт Со борды йӧтӥське, – сьӧлыко мурт ук со».40Солы вазиськыса, Иисус шуиз: «Симон! Мынам тыныд маке но веранэ вань». Со шуиз: «Вера, Дышетӥсь».

41Иисус шуиз: «Одӥг пунэм сётъясьлэн кык пунэм тыроно муртэз вал: огез вить сю динарий, нош мукетыз – витьтон.42Тырыны номырзы но ӧвӧлысь, кыксылэсь но тыронзэс куштӥз. Вера, соос пӧлысь кудӥз сое юнгес яратоз?»43Симон ответ сётӥз: «Малпасько, кудӥзлэсь троссэгес куштӥз». Со шуиз: «Шонер тон малпаськод».44Кышномурт пала берыктӥськыса, Симонлы шуиз: «Адӟиськод-а тон та кышномуртэз? Мон тынад коркад лыктӥ но, тон Мынам пыдам вудэ ӧд сёты, нош со Мынэсьтым пыдъёсме синкылиен гылтӥз но йырысьтыз йырсиеныз ӵушылӥз.45Тон Монэ ӧд чупа, нош со Мон лыктэм дырысен уг дугды Мынэсьтым пыдъёсме чупамысь.46Тон Мынэсьтым йырме вӧйын ӧд зыра, нош со Мынэсьтым пыдъёсме мироен зыраз.47Соин ик тыныд шуисько: трос яратэмез понна солэн трос сьӧлыкъёсыз куштӥсько. Кинлы ӧжыт куштӥське, со ӧжыт яратэ».48Кышномуртлы шуиз: «Тынад сьӧлыкъёсыд куштӥсько».

49Соин ӵош сиськисьёс асьсэ понна вераськыны кутскизы: «Кин со, сьӧлыкъёсты но куштэ?»50Нош Со кышномуртлы шуиз: «Осконэд тонэ утиз. Каньылэн мын».


*а 7:27 Мал. 3:1


предыдущая глава Глава 7 следующая глава