Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 4

4-тӥ ЛЮКЕТ

1Иисус Иордан дурысь Святой Духен тыр луыса бертӥз. Дух Сое кыр дуннее нуиз.2Отын ньыльдон нунал ӵоже диавол Солэсь визьзэ сынаса улӥз. Со номыр но ӧз сиы, та нуналъёс ортчем бере, бӧрысь кӧтыз сюмаз.3Диавол Солы шуиз: «Инмар Пи ке Тон, та изэз нянь луыны кос».4Солы ответ сётыса, Иисус шуиз: «Гожтэмын, нянен гинэ уз улы адями, Инмарлэн котькуд кылыныз со улоз».5Сое ӝужыт гурезь йылэ тубытыса, диавол Солы син куспын дунне вылысь вань эксэйлыкъёсты возьматӥз,6Диавол Солы шуиз: «Вань та эксэйлыкъёсын кивалтыны Тынад кияд кужым сёто, соослэсь данзэс но, уго соос мыным сётэмын, нош мон кинлы сётэме потэ, солы сое сётӥсько.7Озьыен, Тон мыным йыбырттӥд ке, ваньмыз Тынад луоз».8Иисус солы ответ сётыса шуиз: «Кошкы Мон дорысь, шайтан; гожтэмын ук:

”Инмаредлы Кузё-Инмарлы йыбыртъя,
Солы Огназлы гинэ ужаса-тыршыса ул”».

9Соку диавол Иисусэз Иерусалиме нуиз, храмлэн липет йылаз Сое султытӥз но шуиз: «Инмар Пи ке Тон, татысен уллань тэтчы.10Гожтэмын ук:

”Тонэ Ас Кылчинъёсызлы утьыны косоз.
11Ки йылазы Тонэ нуозы,
пыдыныд из борды медад канжаськы”».

12Иисус солы ответ сётыса шуиз: «Верамын: ”Инмаредлэсь Кузё-Инмарлэсь визьзэ эн сына”».13Вань визь сынанъёссэ быдтэм бераз диавол Со дорысь огдырлы кошкиз.

14Духлэн кужмыныз тыр луыса, Иисус Галилеяе берытскиз. Со сярысь вераськонъёс котыр ёросъёсы вӧлмизы.15Соосты Иисус сӥнагогаязы дышетӥз, ваньзы Сое данъязы.

16Быдэ вуэм городаз, Назаретэ, лыктӥз. Со суббота нуналэ, огдышем сяменыз, сӥнагогае пыриз но лыдӟыны султӥз.17Солы Исаия пророклэсь книгазэ сётӥзы. Иисус книгаез усьтӥз но тазьы гожтэм интызэ шедьтӥз:

18«Кузё-Инмарлэн Духез Мон вылын улэ:
Кузё-Инмар Монэ вӧйын зырӟыса пуктӥз;
куанеръёслы Ӟеч Ивор вераны,
сюлмынызы чигиськыса улӥсьёсты бурмытыны,
тушмон киулэ сюремъёслы мозмытскон сярысь тодытыны,
синтэмъёсты адӟись карыны,
курадӟытэмъёсты эрике лэзьыны Монэ ыстӥз,
19Кузё-Инмарлэсь ӟечлыко арзэ тодытыны Со Монэ ыстӥз».

20Книгазэ ворсаз, отын ужасьлы сётӥз но пуксиз. Сӥнагогаын ваньзылэн синъёссы Со шоры мертчиськизы.21Иисус соослы вераны кутскиз: «Та гожтэм, кудзэ тӥ кылӥды, туннэ быдэсмиз».22Ваньзы Со сярысь умоен гинэ веразы. Солэн ымысьтыз потэм кылъёслэн дэлетсылы паймизы. Соку соос куспазы вераськизы: «Та Иосифлэн пиез ӧвӧл-а?»

23Иисус соослы шуиз: «Зэм ик, тӥ Мыным та визькылэз вералоды: ”Йӧнатӥсь! Астэ Ачид йӧнаты, татын но, Аслад вордӥськем шаерад, лэсьты сое, мар вал Капернаумын, кудӥз сярысь ми кылӥмы”».24Собере шуиз: «Зэм ик тӥледлы верасько: одӥгзэ но пророкез аслаз вордӥськем шаераз кабыл уг басьто.25Зэмзэ тӥледлы верасько: Израильын трос вал Илия дыръя палкышноос, куке куинь ар но куать толэзь ӵоже ин ворсаськыса улӥз; соин сэрен быдэс музъем вылын секыт сютэм ар луиз.26Огзы доры но, Сӥдон Сарепта карысь палкышно доры сяна, Илия лэземын ӧй вал.27Елисей пророк дыръя Израильын трос вал гижлочерен висись адямиос, нош огез но, Сирияысь Нееман сянаез, ӧз чылкыта».28Сӥнагогаысь ваньзы, тае кылыса, туж йыркуръяськизы.29Султӥзы но Сое городысьтызы улляса лэзизы. Городзы гурезь бамалын интыяськемын вал; Сое гурезь йылэ тубытӥзы отысен куштыса лэзён вылысь.30Нош Иисус пӧлтӥзы потыса кошкиз.

31Иисус Галилеяысь Капернаум каре вуиз. Отын суббота нуналэ соосты дышетыса улӥз.32Паймизы Солэн дышетонэзлы, Солэн верам кылаз кужымез шӧдӥське вал уго.33Сӥнагогаын перияськем адями вал, со бадӟым куараен кеськиз:34«Назаретысь Иисус, ми бордын Тынад мар ужед? Кошкы! Тон милемыз быдтыны лыктӥд; мон тодӥсько, кин Тон, Инмарлэн Святоез».35Иисус сое дугдытыса шуиз: «Чалмытскы. Пот со пушкысь». Пери со адямиез сӥнагога шоры погыртӥз но солэн пушкысьтыз чик вӧсь карытэк потӥз.36Ваньзы ик туж зол кышкатскизы но куспазы вераськизы: «Мар таӵе та, Со Аслаз эрикеныз, кужыменыз периосты потыны косэ но, соос пото?»37Иисус сярысь ивор котыр интыосы вӧлмиз.

38Сӥнагогаысь потыса, Иисус Симонлэн корказ пыриз. Симонлэн вармумиез пӧськылен туж курадӟыса кылле вал. Сое юрттыны куризы.39Кышномуртлэн матаз лыктыса, пӧськыльлы алыса вераз но, солэн пӧськылез быриз. Соку ик кышномурт султӥз но соослы юрттӥськыса улыны кутскиз.40Шунды пуксён вадес пӧртэм висёнъёсын висисьёссэс Иисус доры вайылӥзы. Котькудзы вылэ кизэ поныса, соосты Со бурмытъяз.41Тросэз пушкысь периос кесяськыса потылӥзы но шуизы: «Тон Христос, Инмарлэн Пиез». Аслэсьтыз Христос луэмзэ Со периослы вераны ӧз лэзьы.

42Нунал вордӥськиз; Со калыктэм интые потыса кошкиз. Калык Сое утчаз но, матаз лыктыса, дорысьтызы медаз кошкы шуыса, ӝегатыса возизы.43Нош Иисус соослы шуиз: «Мукет городъёслы но Инмар Эксэйлык сярысь Ӟеч Иворез Мон вераны кулэ, со понна ик Мон ыстэмын уго».44Галилеяысь сӥнагогаосын тодытыса-дышетыса улӥз.


*а 4:8 Кык. зак. 6:13

*б 4:11 Пс. 90:11-12

*в 4:19 Ис. 61:1-2


предыдущая глава Глава 4 следующая глава