Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 2

2-тӥ ЛЮКЕТ

1Со нуналъёсы быдэс дуннеысь калыкез гожъян сярысь Август кесарьлэн косонэз потӥз.2Квириниялэн Сирияен кивалтыса улон дыръяз та нырысетӥез калыкез гожъян вал.3Ваньмыз, котькудӥз адями, аслаз городаз гожтӥськыны мынӥз.4Галилеяысь Назарет карысь Иосиф но Иудеяе, Давидлэн Вифлеем шуон городаз, мынӥз. Уго со Давидлэн юртысьтыз, выжыысьтыз вал.5Кышноеныз, Марияен, со гожтӥськыны мынӥз. Соку Мария секытэн вал.6Соос отын луон дыръя Солы нуны вайыны дыр вуиз.7Нырысетӥ Пиез вордскиз но, Сое кутэтэн бинялтыса, турын тыронэ понӥз, кунокуаын соослы инты ӧз сюры уго.

8Со шаерын пудо возьмасьёс уйин бусыын пудо уллёзэс возьмаса пуко вал.9Шӧдтэк шорысь соослы Кузё-Инмарлэн Кылчинэз возьматскиз но, Кузё-Инмарлэн пиштӥсь данлыкез соосты югдытӥз. Соос вераны луонтэм кышказы.10Нош Кылчин соослы шуиз: «Эн курдалэ; мон тӥледлы быдӟым шумпотон ивортӥсько, со вань адямиос понна луоз:11тӥ понна туннэ Давидлэн городаз Утись вордӥськиз, Со – Христос Кузё-Инмар.12Тани тӥледлы тодмет: турын тыронысь кутэтэн бинялтэм Нуныез тӥ шедьтоды».13Инмарез данъяса, Кылчинэн валче лыдъянтэм трос ин кужымъёс шуак вуыса вазиськизы:

14«Дан вылӥысь Инмарлы,
музъем вылын каньыллык,
адямиослы ӟеч эрик».

15Кылчинъёс соос дорысь Инме кошкем бере пудо возьмасьёс ог-огзылы шуизы: «Вифлееме мыныса учкоме, мар отын луиз, кудӥз сярысь асьмелы Кузё-Инмар ивортӥз».16Дыртыса вуизы но Марияен Иосифез, турын тыронын кыллись Нуныез шедьтӥзы.17Адӟем беразы веразы, мар ивортэмын вал соослы та Нуны сярысь.18Ваньзы кылзӥськем муртъёс пудо возьмасьёслэн верамзылы паймизы.19Нош Мария вань та кылъёсты сюлмаз утьыса возиз.20Пудо возьмасьёс ваньмыз понна, мае кылӥзы, мае адӟизы, кызьы соослы верамын вал, Инмарез данъяса, ушъяса, асьсэ доры бертӥзы.

21Тямыс нунал ортчыса, Нунылы вандӥськон сямез ортчытон дыр вуиз. Соку Солы Иисус ним сётӥзы. Анай пушкын кылдэмезлэсь азьвыл ик Кылчин Солы та нимез сётӥз вал.

22Чылкытатскон нуналъёс ортчем бере Моисейлэн законэзъя Сое Иерусалиме Кузё-Инмар азе султытыны вайизы.23Кузё-Инмарлэн законаз гожтэмын: анай пушкысь нырысь потэм котькудӥз пи нуны Кузё-Инмарлы сӥземын луыны кулэ.24Кузё-Инмарлэн законаз верамын на, кык кыр дыдыкъёсты яке кык дыдыкпиосты курбон сётыны кулэ шуыса.

25Соку Иерусалимын Симеон нимо адями улӥз. Со шонер улӥсь, Инмарлы туж оскыса, Израильлэсь буйгатсконзэ витись мурт вал. Святой Дух со вылын улӥз.26Солы Святой Дух пыр верамын вал, Кузё-Инмарлэсь Христоссэ адӟытэк, кулонэз уд адӟы шуыса.27Духен тыр луыса, со храме лыктӥз. Анай-атаез Иисус Нуныез законын гожтӥськем сямез быдэстон понна храме ваем бере28Симеон Сое кияз басьтӥз но Инмарлы тау карыса шуиз:

29«Аслад верам кылыдъя, Инмар Атае,
ляльчиедлы каньыллык сётыса, туннэ лэзиськод.
30Тынэсьтыд мозмытондэ мынам синъёсы адӟизы ни,
31Тон сое вань калыкъёслэн син азязы дасяд уго:
32Со язычникъёсты югдытӥсь луоз,
Израиль калыкедлы данлык луоз».

33Со сярысь верамлы Иосиф но, Солэн Анаез но паймизы.34-35Симеон соосты бакель кариз но Солэн Анаезлы, Мариялы, шуиз: «Тани, Та Нуны пыр Израильысь тросэз погралоз, тросэз ӝутӥськоз. Тросэзлэн сюлэм малпанъёссы мед усьтӥськозы шуыса, Со котырын трос ченгешонъёс луозы. Тынад аслад но лул пыртӥд палаш потоз».

36Татын вал на Анна нимо нылкышно пророк. Со Асир выжыысь Фануиллэн нылыз вал, туж бадӟым арлыдэ вуэм, ныл дыръяз бызьыса картэныз сизьым ар улэм мурт.37Ог тямыстон ньыль аресъем палкышно, со храм дорысь кошкылытэк, уй но нунал визяса, вӧсяськыса, Инмарлы ужаса-тыршыса улӥз.38Соку со матэ лыктӥз но, Кузё-Инмарез данъяса, Иерусалимын мозмытсконэз возьмаса улӥсьёслы ваньзылы Иисус сярысь вераса улӥз.

39Кузё-Инмарлэн законэзъя ма кулэ вал лэсьтыны ваньзэ лэсьтэм беразы соос Галилеяысь Назарет городазы берытскизы.40Нуны будӥз, лулыныз-сюлмыныз юнмаз, визьмын тыр луиз; Инмарлэн дэлетэз Со вылын улӥз.

41Арлы быдэ Солэн анай-атаез Пасха празднике Иерусалиме ветлӥзы.42Солы дас кык арес тырмон аре, азьло сямен ик, соос праздниклы Иерусалиме лыктӥзы.43Праздник нуналъёс ортчем бере бертыкузы, пинал Пи Иисус Иерусалиме кылиз. Тае Иосиф но, Солэн Анаез но ӧз шӧдэ,44Со мукетъёсын ӵош бертэ, кожазы. Нунал сюресэз ортчем беразы гинэ Сое ӵыжы-выжыоссы, тодмооссы пӧлысь утчаны кутскизы,45но ӧз шедьтэ. Сое утчаса, Иерусалиме берытскизы.46Куинь нунал ортчыса, Сое храмысь дышетӥсьёс пӧлысь шедьтӥзы. Соослэсь кылзӥськыса, юалляськыса Со пуке вал.47Ваньзы кылзӥськисьёс Солэн визьмызлы но, ответ сётэмъёсызлы но паймизы.48Сое адӟыса, чабкиськизы, Анаез Солы шуиз: «Пие! Мар Тон милемын лэсьтӥд? Тани Тынад атаед но, мон но, туж куректыса, Тонэ утчамы».49Соослы Со шуиз: «Малы тӥледлы Монэ утчаны кулэ вал? Оло, тӥ ӧд тодэ, Мыным отын луыны кулэ вал, кытын Мынам Атаелэн киыз улэ?»50Нош соос Солэсь верам кылзэ ӧз валалэ.51Соосын ӵош Со кошкиз, Назаретэ вуиз; соослэсь кылзӥськыса улӥз. Солэн Анаез ваньзэ та кылъёсты аслаз сюлэмаз возиз.52Иисус визьмын но, арлыдын но будӥз; Инмарлы но, адямиослы но Со яратыны ярамон вал.


*а 2:7 кунокуа – гостиница


предыдущая глава Глава 2 следующая глава