Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

ЛУКАЛЭСЬ ӞЕЧ ИВОР

Глава 1

1-тӥ ЛЮКЕТ

1Ми куспын зэмос луэм учыръёс сярысь тросэз веросъёс кылдытъяны кутскизы ни бере,2кудӥз сярысь милемлы самой кутсконысеныз ик Кылэз адӟемъёс но Солы служить каремъёс ивортӥзы, –3соку мон но малпай: ваньзэ кутсконысеныз ик пыр-поч эскерыны но радызъя тыныд гожтыны, гажано Феофил,4тон мед тодод, со дышетон, кудӥныз тон тодматскид, оскиськымон луэ шуыса.

5Иудеяын, Ирод эксэй луон нуналъёсы, Авиялэн черодысьтыз Захария нимо священник улӥз. Солэн Елисавета нимо кышноез Аарон выжыысь вал.6Инмар азьын кыкназы но соос шонер улӥзы, Кузё-Инмарлэсь вань курон-косонъёссэ, радъянъёссэ шекланытэк быдэсъяса улӥзы.7Соослэн нылпизы ӧй вал, Елисавета уго нылпи вайисьтэм вал. Кыксы но соос арескын мӧйыесь вал ини.8Одӥг пол, черодэз вуыса, Инмар азьын служить карыкуз,9пус чӧлтыса, кызьы каро вал священникъёс, солы Кузё-Инмарлэн храмаз ладанэн ӵындытыны пыроно луиз.10Ладанэн ӵындытон дыръя вань калык педлон вӧсяськылӥз.11Соку Захариялы Кузё-Инмарлэн Кылчинэз возьматӥськиз, со Кылчин, ладан ӝуатыса, курбон сётон ӝӧклэн бурпалаз сылӥз.12Сое адӟыса, Захария куалектӥз, кышканы кутскиз.13Нош Кылчин солы шуиз: «Эн курда, Захария, тынад вӧсяськемед кылэмын, кышноед Елисавета пи нуны ваёз, солы Иоанн ним сётод.

14Тыныд шумпотон, шулдыръяськон луоз,
солэн вордӥськемез понна тросэз шумпотозы.
15Уго со Кузё-Инмар азьын быдӟым луоз,
вина но, сур но уз юы,
анаезлэн пушказ ик Святой Духен тыр луоз.
16Троссэ Израиль пиосты Инмарзы Кузё-Инмар пала берыктоз.
17Атайёслэсь сюлэмъёссэс нылпиоссы пала берыктыны,
кылзӥськисьтэмъёсты шонер улӥсьёслэн
визьлыко сюрес вылазы берыктыны,
Кузё-Инмарлы калыкез дасян понна
Илиялэн кадь духен но кужымен
Кузё-Инмарлэн азьтӥз со мыноз».

18Захария Кылчинлы шуиз: «Кызьы мон сое тодом? Мон уго пересь ини, кышноелэн но аресэз бадӟым ини».19Кылчин солы ответ сётыса шуиз: «Мон – Гавриил, Инмар азьын сылӥсь, тонэн вераськыны но та ӟеч иворез тыныд вераны ыстэмын.20Тани, тон кылтэм улод. Ас дыраз быдэсмоно верам кылъёслы оскымтэед понна та быдэсмон нуналозь тынад вераськемед уз луы».21Со дыре калык Захарияез витьыса улӥз, паймиз солэн храмын ӝегамезлы.22Со потӥз но соослы номыр но верамез ӧз луы. Соос валазы, со храмын адӟон адӟиз шуыса. Соосын со кипусъёс пыр гинэ валэкъяськиз, вераськемез ӧз луы.23Служить карон нуналъёсыз йылпумъяськем бере дораз бертӥз.24Та нуналъёс бере солэн кышноез Елисавета нуны ваёно луиз. Вить толэзь ӵоже адямиослэсь ватыса улӥз. Елисавета шуиз:25«Адямиос пӧлын монэ медаз ни ултӥялэ шуыса, монэ жаляса, та виын тазьы лэсьтӥз Кузё-Инмаре».

26Куатетӥ толэзез мыныку, Инмар Гавриил Кылчинэз Галилеяысь Назарет каре,27Давид юртысь Иосиф нимо пиосмуртлы курам Ныл доры ыстӥз. Со Ныллэн нимыз – Мария.28Кылчин Со доры пырыса шуиз: «Шумпот, Дэлето! Кузё-Инмар Тонэныд; кышноос куспын Тон бакель каремын».29Сое адӟыса, солэн кылъёсызлэсь Со кепыраз, малы меда та таӵе ӟечкылан шуыса малпаз.30Кылчин Солы шуиз: «Эн кышка, Мария, Тон Инмар дорын дэлет басьтӥд.31Тани Тон секытэн луод, Пи ваёд но Солы Иисус ним сётод.32Со луоз быдӟым, Вылысь Инмарлэн Пиез шуыса нимаськоз. Солы Инмар Кузё-Инмар Давидлэсь, Солэн атаезлэсь, эксэй пуконзэ сётоз.33Пумтэм дауръёс ӵоже Иаковлэн юртэзлы Со эксэй луыса пукоз, Солэн Эксэйлыкезлэн пумыз уз луы».34Нош Мария Кылчинлы шуиз: «Кызьы та луыны быгатоз, куке Мон пиосмуртэз уг тодӥськы?»35Кылчин Солы ответ сётыса шуиз: «Святой Дух Тон вылэ васькоз, Вылысь Инмарлэн кужымез Тонэ шобыртоз. Соин ик Тынэсьтыд вордӥськем Дун-Сьӧлыктэм Инмар Пи шуыса нимаськоз.36Тани, Елисавета но, Тынад выжы-кумыед, нылпи вайисьтэм шуо вал, пересь даураз пи нуны ваёно луиз, солэн куатетӥ толэзез ни.37Уго Инмарлэн одӥгез но верам кылыз быдэсмытэк уз кыльы».38Соку Мария шуиз: «Тани Мон Кузё-Инмарлэн ляльчиез; тынад кылыдъя Мыным мед луоз». Собере Кылчин Со дорысь палэнскиз.

39Со нуналъёсы Мария султӥз но дыртыса гурезё шаере, Иудалэн городаз, мынӥз,40Захариялэн корказ пырыса, Со Елисаветаез ӟечкылаз.41Елисавета Мариялэсь ӟечкыламзэ кылэм бере солэн пушказ нуныез вырӟиз; Елисавета Святой Духен тыр луиз.42Бадӟым куараен вазиськыса шуиз: «Кышноос пӧлысь ваньмызлэсь золгес Тон бакель каремын, бакель каремын Тынад пушкысьтыд емышед но!43Кытысен та ӟечлык мыным: Кузё-Инмарелэн Анаез мон доры лыктӥз?44Уго Тынад ӟечкылан куараед кылӥськыку, нуны шумпотыса пушкам вырӟиз.45Шудо Оскем Мурт – Кузё-Инмарлэн Солы верамез быдэсмоз».

46Мария шуиз: «Мынам лулы Кузё-Инмарез данъя,
47духе Инмарлы, Утиселы, шумпотэ,
48Аслэсьтыз покчи ляльчизэ Со жаляса учкиз.
Та дырысен вань выжыос Монэ шудо мурт шуозы,
49Кужмо Мыным быдӟым ужъёс лэсьтӥз,
Солэн нимыз святой.
50Солэн гажан-жалянэз Солэсь кышкасьёс понна
выжыосысь выжые улоз.
51Со Ас киызлэсь кужымзэ возьматӥз,
сюлмазы вылӥ мылкыдо малпанэн улӥсьёсты пазьгиз.
52Кужмоосты пукон интыысьтызы уськытӥз,
нош востэмъёсты ӝутӥз.
53Сютэмъёсты ваньбуро кариз,
нош узырмемъёсты номыртэк но лэзиз.
54Аслэсьтыз ляльчизэ, Израилез, бордаз кариз,
жалянэз тодэ вайыса –
55кызьы шуиз вал атайёсмылы –
Авраамлы но солэн кидысэзлы пумтэм вапумозь».

56Мария куинь толэзь мында Елисавета дорын улэмез бере аслаз дораз бертӥз.

57Елисаветалэн нылпи ваён дырыз вуиз; со пи нуны вайиз.58Бускельёсыз, ӵыжы-выжыосыз Кузё-Инмарлэсь сое юн гажам-жалямзэ кылзӥзы но соин валче шумпотӥзы.59Тямысэтӥ нуналаз нунылы вандӥськон сямез ортчытыны лыктӥзы но, атаезлэн нимызъя солы Захария ним сётыны малпазы.60Талы пумит солэн анаез шуиз: «Ӧвӧл, сое Иоанн шуыса нимано».61Нош солы шуизы: «Тынад выжы-кумыед пӧлын та нимез нуллӥсь нокин но ӧвӧл».62Атаезлэсь пусъёс пыр юазы, кыӵе ним со сётысал шуыса.63Со пул куриз но гожтӥз: «Иоанн солэн нимыз». Ваньзы паймизы.64Соку ик солэн кылыз-ымыз усьтӥськиз но, Инмарез данъяса, со вераськыны кутскиз.65Со котырын улӥсьёс ваньзы кышкатскизы; Иудеялэн быдэс гурезё шаераз ваньмыз та сярысь вераськизы.66Ваньмыз кылэм муртъёс тае сюлмазы возизы но вераллязы: «Кыӵе пинал та луоз?» Кузё-Инмарлэн киыз со вылын улӥз.

67Солэн атаез, Захария, Святой Духен тыр луыса, азьпалзэ тодытыса шуиз:

68«Кузё-Инмар, Израильлэн Инмарез, дано:
Аслаз калыкез шоры гажаса учкиз но солы мозмытӥськон сётӥз.
69Аслаз ляльчиезлэн, Давидлэн, выжыысьтыз
милемлы утиськонлэсь сюрзэ ӝутӥз.
70Аслаз вашкала дырысь святой пророкъёсызлэн
кылынызы-ымынызы ивортӥз,
71тушмонъёсмылэсь, вань синазькыль
карисьёслэсь милемыз утёз;
72милям атайёсмылы гажан-жалянзэ возьматоз но
Аслэсьтыз святой сӥзён-косонзэ тодаз ваёз.
73Милям Авраам атаймы азьын
кыл сётыса вераз:
74милемды тушмонъёсмылэн киулысьтызы мозмытоз,
75улонмылэн вань нуналъёсаз Солы
дун-сьӧлыктэм мылкыдын, шонерлыкен
Солы кышкатэк служить карыны.
76Тон, нуны, Вылысь Инмарлэн пророкез шуыса нимаськод,
тон уго Кузё-Инмарлэн азьтӥз мынод
Солы сюрес дасяны,
77сьӧлыкъёссэс куштыса утиськон сярысь
Солэн калыкезлы валан сётыны,
78Инмармылэн сюлмысьтыз гажан-жалянэныз,
кудӥныз асьме доры йылысен
Шунды ӝужан лыктӥз,
79пеймытын, кулонлэн вужераз пуксисьёсты югдытыны,
пыдъёсмес тупаса улонлэн сюрес вылаз поттыны».

80Нуны будӥз, лулыныз-сюлмыныз юнмаз, Израиль калыклы возьматскон нуналыз вуытозь, кыр дуннеосын улӥз.


предыдущая глава Глава 1 следующая глава