Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 15

15-тӥ ЛЮКЕТ

1Ӵукна вазь ик архиерейёс тӧроосын, книга тодӥсьёсын, быдэс сӥнедрионэн огазьын кенеш ортчытӥзы. Иисусэз думылӥзы но Пилат кие нуыса сётӥзы.2Пилат Солэсь юаз: «Тон иудейёслэн Эксэйзы-а?» Иисус ответ сётыса шуиз: «Тон шуиськод».3Архиерейёс Сое оломаин но янгыше уськытыны выризы.4Пилат нош ик Солэсь юаз: «Тон нокыӵе ответ уд-а сётӥськы? Адӟиськод, Тыныд пумит кӧня янгыше уськытонъёс верало».5Нош Иисус талы но ответ ӧз сёты, та Пилатэз паймытӥз.

6Праздниклы быдэ Пилат, калык куремъя, пытсэтэ сюрем муртъёс пӧлысь одӥгзэ мозмытэ вал.7Со дыре пытсэтын пукиз Варавва нимо мурт. Аслаз эшъёсыныз калык бугыръяськон дыръя соос адямиез вииллям вылэм.8Калык кесяськыса, соос понна котьку но лэсьтӥськись ужзэ мед быдэстоз вал шуыса, Пилатлэсь курыны кутскиз.9Ответ сётыса, соослы со шуиз: «Яралоз-а тӥледлы, иудейёслэсь Эксэйзэс лэзи ке?»10Со тодэ вал уго, архиерейёс Сое вожъяськеменызы сэрен кутыса сётӥзы шуыса.11Нош архиерейёс калыкез ӝутказы, соослы Варавваез эсьмаса мед лэзёз шуыса.12Ответ сётыса, Пилат нош ик соослы шуиз: «Иудейёслэн Эксэйзы шуон муртэныды монэ мар карыны косӥськоды?»13Соос нош ик кесяськыны кутскизы: «Кортӵога Сое!»14Пилат соослы шуиз: «Кыӵе урод уж Со лэсьтӥз?» Нош соос уката но золгес кесяськыны кутскизы: «Кортӵога Сое!»15Соку Пилат, калыклы яран вылысь, Варавваез мозмытӥз, нош Иисусэз жугытыса кортӵоганы сётӥз.

16Солдатъёс Сое пыдлось азбаре, претория шуон интые, нуизы. Отчы быдэс полкез люказы.17Вылаз нап-горд басмалэсь шобыр дӥсязы, йыр вылаз тёрнпулэсь йыркерттэт пуныса изьыязы.18Ӟечкыланы кутскизы: «Шумпот, иудейёслэн Эксэйзы».19Бодыен йыраз тышказы, Со вылэ сялазы, пыдесъяськыса Солы йыбыртъязы.

20Ултӥямзы бере эксэй шобырзэ вылысьтыз кылизы, Аслэсьтыззэ ик дӥськутсэ дӥсязы но Сое кортӵоганы нуизы.21Бусыысь бертӥсь кириней пи Симонэз, Александрлэсь но Руфлэсь атайзэс, татӥ ортчись муртэ, Солэсь кироссэ нуытӥзы.22Сое Голгофа шуон интые вайизы, кудӥз «Кымес инты» шуэм луэ.23Солы смирнаен сурам вина юыны сётӥзы, нош Со ӧз басьты.24Сое кортӵогасьёс, пус чӧлтыса, Солэсь дӥськутсэ люкылӥзы, кинлы мар басьтоно.25Куинетӥ час вал, Сое кортӵогазы.26Сое янгыш каронзы тазьы гожтӥськиз: «Иудейёслэн Эксэйзы».27Соин ӵош кык йырвандӥсьёсты кортӵогазы, одӥгзэ – бурпалаз, мукетсэ – паллян палаз.28Священной Гожтэмысь «законтэк улӥсьёсын оградэ пыртэмын луоз» шуэм кыл зэм луиз.29Вӧзтӥз ортчисьёс, йыръёсынызы сэзъяса, лек кылъёс вераса шуизы: «Эй! Храмез сэрттыса куиньмойскын Пуктӥсь!30Уть Астэ Ачид но васькы киросысь».31Таос кадь ик мыскылляськыса, архиерейёс но книга тодӥсьёс ог-огзылы шуизы: «Мукетъёссэ мозмытылӥз, нош Ассэ мозмытэмез уг луы!32Израильлэн Эксэез Христос киросысьтыз табере мед васькоз, адӟимы ке, ми но оскомы». Соин ӵош кортӵогаськем муртъёс но Сое урод кылъёсын куаретӥзы.

33Куатетӥ часын быдэс дунне вылын пеймыт луиз. Озьы укмысэтӥ час котырозь улӥз.34Укмысэтӥ часын Иисус бадӟым куараен кеськыса вераз: «Элои, Элои! ламма савахфани?» «Инмаре, Инмаре! Малы Тон Монэ кельтӥд?» шуэм кыл луэ со.35Татын сылӥсьёс пӧлысь куд-огез тае кылыса шуизы: «Тани, Илияез ӧте».36Одӥгез бызьыса мынӥз, губкаез уксусэн тырмытӥз, боды йылэ шедьытыса, Солы юыны сётӥз но шуиз: «Дугдэ ай, учком, Илия Сое киросысь басьтыны лыктоз-а».37Иисус кужмо куараен вазиськиз но, лулыз потӥз.38Храм пушкысь катанчи йылысеныз улӥозяз шорияк кесиськиз.39Солэн ваче пумитаз сылӥсь сю солдатэн кивалтӥсь Солэсь куара сётыса лул потэмзэ адӟем бераз «зэм ик, та Адями Инмар Пи вал» шуиз.40Татын кышномуртъёс но вал, соос палэнысен учкыса сылӥзы; соос пӧлын вал Магдалина Мария, покчи Иаковлэн но Иосиялэн анайзы Мария, но Саломия.41Соос Иисус сьӧрын Галилея музъемын но служить карыса ветлӥзы. Соин ӵош трос мукетъёс но Иерусалиме лыктэмын вал.

42Ӝыт вуиз. Соку пятница, субботалэн азьвыл нуналэз вал.43Аримафеяысь кенешлэн нимо-дано муртэз Иосиф лыктӥз. Со ачиз но Инмар Эксэйлыклэсь лыктэмзэ витьыса улӥз. Кышканзэ куштыса, Пилат доры пыриз но Иисуслэсь Мугорзэ куриз.44Солэсь кулэмзэ тодыса, Пилат паймиз. Дораз сю солдатэн кивалтӥсез ӧтьыса, солэсь юаз: «Кемалась-а кулӥз?»45Сю солдатэн кивалтӥсьлэсь тодэм бераз Мугорзэ Иосифлы сётӥз.46Иосиф, дун тырыса, тӧдьы дэра басьтӥз, кирос бордысь Сое басьтыса, дэраен шобыртӥз но шайгуэ понӥз. Шайгуэз гурезьысь из пушкы гудӟыса лэсьтэмын вал; шайгулэсь ӧссэ изэн пыкъяз.47Магдалина Мария но Иосий Мария учкыса улӥзы, кытчы Иисусэз ватӥзы.


предыдущая глава Глава 15 следующая глава