Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 14

14-тӥ ЛЮКЕТ

1Кык нунал ортчыса, Пасха но Юмал Нянь Сиён праздник вуэ вал. Архиерейёс но книга тодӥсьёс Иисусэз кутыса виён вылысь кескич амал утчаса ветлӥзы.2Калык пушкын бугыръяськон медаз ӝутӥськы, та ужез праздник нуналэ ум лэсьтэ шуизы.

3Иисус Вифанияын гижлочерен висись Симонлэн корказ сиськыса кыллён дыръя Со доры кышномурт алавастр посудаен нардлэсь лэсьтэм чылкыт дуно миро вайиз, посудазэ пильыса, мирозэ Солэн йыр вылаз кисьтӥз.4«Малы мироез юнме арам каронэз?» шуыса, куд-огез, вожзэс поттыса, куспазы вераськизы.5«Сое куинь сю динарийлэсь но дуноенгес вузаса коньдонзэ кураськисьёслы сётъяны луысал ук». Озьы сое пыкылӥзы.6Нош Иисус шуиз: «Кельтэ сое, малы сое кепыр вайытӥськоды? Со Мон понна ӟеч уж лэсьтӥз.7Кураськисьёс ялан тӥ котырын уго, куке мылды потӥз, соку ик соослы тӥляд ӟеч каремды луоз, нош Мон ялан тӥледын огазьын ӧвӧл.8Со лэсьтӥз, мар быгатӥз: Мынэсьтым мугорме вӧйын зыраса ватыны дасяз.9Зэм ик тӥледлы верасько: быдэс дунне вылын, кытын гинэ та Евангелие тодытэмын луиз, сое буре вайыса, солэн мар каремез сярысь котькытын но верамын луоз».

10Иисусэз кутыса сётон вылысь Искариот Иуда, дас кык дышетскисьёсыз пӧлысь одӥгез, архиерейёс доры мынӥз.11Тае кылыса, соосыз шумпотӥзы; солы азвесь коньдон сётом шуизы. Со утчаськыса улӥз, кызьы ке но кельшись дыре Сое кутыса сётыны.

12Юмал нянь сиёнлэн нырысетӥ нуналаз, Пасха ыжпи вандыку, дышетскисьёсыз Солэсь юазы: «Кытын Пасха ыжпиез сиемед потэ? Ми мыныса дасясалмы».13Дышетскисьёсыз пӧлысь кыксэ ыстӥз но соослы Со вераз: «Мынэлэ городэ, пумитады кувшинэн ву нуись мурт шедёз, со сьӧры мынэлэ.14Кытчы со пыроз, коркалэн кузёезлы шуэ: ”Дышетӥсь юа: кудаз комнатаын Мон дышетскисьёсыным валче Пасха ыжпиез сиыны быгато?”15Со тӥледлы коркалэсь вӧлдыса дасям бадӟым палзэ возьматоз; отчы асьмелы дасялэ».16Солэн дышетскисьёсыз мынӥзы; городэ вуэм беразы адӟизы: ваньмыз вал озьы, кызьы Со вераз. Пасхалы ыжпиез вандыса дасязы.17Ӝыт вуиз но, дас кык дышетскисьёсыныз ӵош Со лыктӥз.18Сиськыса улон дыръязы Иисус шуиз: «Зэм ик тӥледлы верасько, тӥ пӧлысь, Монэн огазьын сиськисьёс пӧлысь одӥгез, Монэ вузаса сётоз».19Соос куректонэ усизы но огзы бӧрсьы огзы Солы вераны кутскизы: «Мон ӧвӧл-а?», мукетыз но: «Мон ӧвӧл-а?»20Ответ сётыса, Со тазьы вераз: «Дас кык пӧлысь одӥгез, Монэн ӵош тусьтые веттылӥсез.21Адями Пи мынэ ке но, кызьы Со сярысь гожтэмын вал, но Сое вузаса сётӥсь муртлы, кудӥз пыр Адями Пи вузаське, куректон луоз; со ӧй ке вордӥськысал, солы умойгес луысал».

22Сиськон дыръязы Иисус нянь басьтӥз, бакель кариз, тӥялтыса соослы сётъяз но шуиз: «Басьтэлэ, сиелэ, та Мынам Мугоры».23Чаша кутыса, тау карыса, соослы сётӥз; ваньзы ик отысь юизы.24Соослы шуиз: «Та Мынам трос адямиос понна кисьтӥськем Выль Сӥзён Виры.25Зэм ик тӥледлы верасько: Инмар Эксэйлыкын выль вина юон нуналозям виноград емышлэсьсэ винаез Мон уг ни юы».

26Вӧсь гуръёс чирдыса, Елеон гурезе кошкизы.27Иисус соослы вераз: «Та уе ваньды тӥ Мон бордысь куштӥськоды, гожтэмын уга: ”Ыж возьмасьсэ погырто но, ыжъёсыз пазьгиськозы”.28Улӟыса султэм берам Мон тӥледыз Галилеяысен азьпалто».29Петр Солы шуиз: «Ваньзы ке но куштӥськизы, мон уг куштӥськы».30Иисус солы шуиз: «Зэм ик тыныд верасько, та уе, атас кык пол чортытозь, куинь пол тон Мон бордысь куштӥськод».31Нош со эшшо но золгес вераз: «Тонэн ӵош мыным кулоно ке но луиз, Тон бордысь уг куштӥськы». Мукетъёсыз но тазьы ик веразы.

32Гефсимания шуон интые вуизы; Иисус дышетскисьёсызлы шуиз: «Мон вӧсяськытозь, тӥ татын пукелэ».33Сьӧраз Петрез, Иаковез но Иоаннэз басьтӥз; курадӟыны, куректыны кутскиз.34Соослы шуиз: «Мынам лулы кулоно кадь ик куректэ; татын улэ, сак улэ».35Ӧжытак палэнэ кошкиз но музъем вылэ выдыса, луысал ке, мед ортчысал Солэн та часэз шуыса, Со вӧсяськиз;36шуиз: «Авва, Атае! Тынад ваньзэ лэсьтэмед луэ. Мон вӧзтӥ ортчытыты вал та чашаез; но Мыным кызьы кулэ озьы эн кар, озьы кар, кызьы Тыныд кулэ».37Берен вуыкуз, адӟиз: ваньмыз умме усемын. Соку Со Петрлы шуиз: «Симон! Изиськод-а тон? Одӥг час но сак улэмед ӧз лу-а?38Визь сынаськонэ медад сюре шуыса, сак улэ, вӧсяське: дух сэзь, нош лулмугор кужымтэм».39Нош ик палэнэ кариськыса, со кылэз ик вераса вӧсяськиз.40Берен вуыкуз, адӟиз, нош ик ваньмыз умме усемын: синъёссэс ум нюртэм. Мар вераны но Солы соос ӧз тодэ ни.41Куинетӥ полаз лыктыкуз, соослы шуиз: «Тӥ ялан изиськоды, кыллиськоды на? Тырмиз, час вуиз; тани Адями Пиез сьӧлыкоос кие сёто.42Султэлэ, мыноме: тани Монэ вузась мурт матам лыктӥз ини».

43Соку ик, Со вераськон куспын, дас кык дышетскисьёсыз пӧлысь одӥгез, Иуда, вуиз. Соин ӵош, мечъёс, зыръёс кутыса, архиерейёслэн, книга тодӥсьёслэн, тӧроослэн лэзем трос адямиоссы лыктӥзы.44Иисусэз вузась мурт соослы тодмет сётыса шуиз: «Кинэ мон чупало, Со ик вань Со. Кутэ Сое, нуыкуды сак кариське».45Со куспын ик Иисус доры лыктыса шуиз: «Равви! Равви!» но чупаз Сое.46Соку ик Сое кырмизы, киулазы басьтӥзы.47Сылӥсьёс пӧлысь одӥгез, мечсэ поттыса, архиерейлэн ляльчиезлэсь пельзэ ӵогыса уськытӥз.48Соку Иисус соослы шуиз: «Йырвандӥсь мурт доры сямен мечъёсын, зыръёсын Монэ кутыны потӥды.49Вань нуналъёсы Мон тӥледын огазьын храмын вал, дышетыса улӥ, нош тӥ Монэ ӧд кутэ. Озьыен, Гожтэмъёсысь верамъёс мед быдэсмозы».50Соку, Сое кельтыса, ваньзы бызьыса кошкизы.

51Одӥг пинал пи, гольык мугорзэ шобретэн бинялтыса, Со сьӧрын ветлӥз; солдатъёс сое кутӥзы.52Нош со шобретсэ киязы кельтыса, гольык куен соослэсь пегӟиз.

53Иисусэз архиерей доры вайизы; со доры вань архиерейёс, тӧроос, книга тодӥсьёс люкаськизы.54Петр палэнэтӥ Со бӧрсьы мынӥз, архиерейлэн азбар дорозяз мынӥз, со пушкы пыриз; медоосын огазьын тылскем дурын шунтӥськыса пукиз.55Архиерейёсын валче сӥнедрионын вань пукисьёс, Иисусэз виыса сётон вылысь, Солэсь шекъёссэ утчазы, но ӧз шедьтэ.56Тросэз Со вылэ ӧрекчаськыса ӧвӧлтэмзэ веразы, но соослэн со верамъёссы тырмыт ӧз луы.57Куд-огез султӥзы но Со вылэ ӧрекчаськыса ӧвӧлтэмзэ вераса шуизы:58«Ми кылӥмы Солэсь тазэ киын лэсьтэм храмез куашкато но куинь нунал куспын мукетсэ, киын лэсьтымтэзэ храмез пукто шуэмзэ».59Таиз но верамзы тырмыт ӧз луы.60Соку архиерей, шоразы султыса, Иисуслэсь юаз: «Тон номыр но уд-а вераськы? Маин соос Тонэ янгыше уськыто?»61Нош Со шып улӥз, нокыӵе но ответ ӧз сёты. Архиерей нош ик Солэсь юаз: «Тон-а со Христос, Данъянолэн Пиез?»62Иисус шуиз: «Мон; тӥ адӟоды, Кужымлэн бурпалаз пуксьыса, ин пилемъёс вылын лыктӥсь Адями Пиез».63Соку архиерей дӥськутсэ шорияк кесьыса шуиз: «Малы кулэ на асьмелы адӟисьёс?64Тӥ кылӥды Инмарез сантэмамез; мар тӥ шуоды?» Ваньзы соос, янгыше уськытыса, «виыны кулэ Сое» шуизы.65Куд-огъёсыз Со вылэ сяланы кутскизы, ымнырзэ шобыртыса тышказы но Солы шуизы: «Тодмад ке, вера». Ляльчиос-медоос Солэн бамаз мыжгазы.

66Петр улӥын, азбарын улыку, архиерей дорын медоын улӥсь кышномурт отчы лыктӥз.67Шунтӥськыса сылӥсь Петрез адӟиз но со шоры учкыса шуиз: «Тон но Назаретысь Иисусэн огазьын вал».68Нош со танӥськыса шуиз: «Уг тодӥськы, уг валаськы мар тон вераськод». Азьпал азбаре потӥз; соку атас чортӥз.69Медо кышно сое нош ик адӟиз но татын сылӥсь муртъёслы вераны кутскиз: «Таиз соос пӧлысь».70Петр нош ик танӥськиз. Ӧжытак улыса, татын сылӥсьёс Петрлы нош ик вераны кутскизы: «Зэм ик, тон соос пӧлысь; тон Галилеяын вордӥськем мурт ук, вераськемед тынад соосын одӥг кадь».71Нош со кыл сётыса, танӥськыса шуиз: «Со Адямиез, Кудӥз сярысь тӥ вераськоды, уг тодӥськы».72Соку ик атас кыкетӥзэ чортӥз. Соку Петр тодаз вайиз Иисуслэсь «атас кык пол чортытозь, куинь пол тон Мон бордысь куштӥськод» шуэм кылзэ. Соку со бӧрдыны кутскиз.


предыдущая глава Глава 14 следующая глава