Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 13

13-тӥ ЛЮКЕТ

1Храмысь потыкуз, дышетскисьёсыз пӧлысь одӥгез Солы шуиз: «Дышетӥсь! Учкы, кыӵеесь изъёс, кыӵеесь юртъёс!»2Иисус солэн пумитаз шуиз: «Адӟиськод-а та бадӟымесь юртъёсты? Ваньмыз соос куашкатэмын луозы, татчы из вылэ из но уз кыльы».

3Иисус Елеон гурезьын храм вадьсын пукыкуз, Петр, Иаков, Иоанн но Андрей ас понназы кылён дыръя Солэсь юазы:4«Вера милемлы, ку та луоз, ваньмыз таос луон азьын кыӵе тодмет луоз?»5Ответ сётыса, Иисус тазьы вераны кутскиз: «Чакласькелэ, нокин но визьдэс медаз туга;6малы ке шуоно тросэз Мынам нимыным лыктозы но, ”та – Мон” шуыса, тросэзлэсь визьзэ тугалозы.7Ожъёс, ожмаськонъёс сярысь иворъёс кылӥды ке, эн кышкатске, ваньмыз та луоно уго; но та пумыз ӧвӧл на.8Калык калыклы, эксэйлык эксэйлыклы ваче пумит султозы; интыен-интыен музъем зуркалоз, сютэм аръёс, куалекъяса улон дыръёс луозы. Та – висёнъёслэн кутсконзы.9Нош тӥ чакласькыса улэлэ; тӥледыз Мон понна судэ сётозы, сӥнагогаосын жугозы, кивалтӥсьёс, эксэйёс азе султытозы, соос азьын тӥ Мон сярысь тодытоды.10Азьвыл вань калыкъёс пӧлын Евангелие тодытэмын луыны кулэ.11Тӥледыз кутыса нуыкузы, мар вералом шуыса, азьло ик эн сюлмаське, эн малпаське; со дыре тӥледлы мар сётӥськиз, сое ик вералэ: соку тӥ уд вералэ, Святой Дух вералоз уго.12Братэз братсэ кутыса виыны сётоз, атаез – нылпиоссэ; нылпиос анай-атайёссылы пумит султозы но соосты виёзы.13Мынам нимы понна ваньмыз тӥледыз адӟемпотостэм карозы; нош пумозяз чидам мурт – утиськоз.

14Даниил пророк пыр верам юрӟым куашканэз адӟиды ке, кытын сылыны уг яра – лыдӟись мурт мед валалоз, – соку Иудея музъеме учырамъёс гурезьёсы мед пегӟозы.15Нош липет йылэ учырам мурт, коркам пырыса марме ке но басьто шуыса, отысь медаз васькы.16Бусые учырам мурт но, дӥськутме басьто шуыса, берен медаз ни берытскы.17Кайгу луоз со нуналъёсы нуны ваёноослы, нуны нонтӥсьёслы!18Вӧсяськелэ, пегӟоно нуналды толалтэ медаз учыра шуыса.19Со нуналъёсы сыӵе куректон луоз, кыӵеез Инмарлэн дуннеез кылдытэм дырысеныз туннэ нуналозь ӧй на вал, уз но луы.20Кузё-Инмар со нуналъёсыз ӧй ке вакчиятысал, одӥг улэп мурт но ӧй утиськысал; но Аслэсьтыз быръем адямиоссэ утён понна Кузё-Инмар вакчиятӥз со нуналъёсыз.21Соку тӥледлы кин ке но ”тани татын Христос” яке ”тӥни отын” шуиз ке, эн оскелэ.22Соку султозы пӧяськись христосъёс, ӧрекчи пророкъёс, паймымон тодметъёс но паймымон ужъёс лэсьтыса, луиз ке, быръем муртъёслэсь но визьзэс туганы соос тыршозы.23Нош тӥ утиськелэ; тани Мон тӥледлы ваньзэ тае азьвыл ик верай.24Со нуналъёсы, со куректон-курадӟонъёс бере, шунды пеймытомоз, толэзь но аслэсьтыз югытсэ уз сёты ни,25инмысь кизилиос усёзы, ин кужымъёс вырӟозы.26Соку пилемъёс вылын быдӟым кужымен, пиштӥсь данлыкен лыктӥсь Адями Пиез адӟозы.27Соку Со Аслэсьтыз Кылчинъёссэ ыстоз но дуннелэн ньыль палысьтыз, музъем пумысь но, ин пумысь но Аслэсьтыз быръем адямиоссэ люкалоз.

28Смоквапулэсь адӟем каре: улвайёсыз небӟыса, куар поттыны кутско ке, гужем матын ни шуыса тодӥськоды.29Озьы ик тӥ но, та тодметъёслэсь быдэсмемзэс адӟиды ке, тодэлэ, матэ, ӧс выжые, вуиз ини шуыса.30Зэм ик тӥледлы верасько: та выжы бырытозь, ваньмыз но та луоз.31Ин но музъем бырозы, нош Мынам кылъёсы уз быре.32Нош со нуналэз, со часэз, Атай сяна, Инмысь Кылчинъёс но, Пи но, нокин но уг тоды.33Эскериське, сак улэ, вӧсяськелэ, уд тодӥське уго, ку со дыр вуоз.34Юртсэ ляльчиосызлы утьыны кельтыса, котькудзылы уж сётыса, капка возьмасьлы сак луыны косыса, сюрес вылэ потӥсь муртлы со укша.35Озьыен, сак улэ, уд тодӥське уго, ку бертоз коркалэн кузёез – ӝыт-а яке уйшор уе-а, атасъёс чоръяны кутскыку-а яке ӵукна-а;36шӧдтэк шорысь бертыса, изён дыръяды со тӥледыз медаз пумита.37Нош мае верасько тӥледлы, верасько ваньмызлы: сак улэлэ».


предыдущая глава Глава 13 следующая глава