Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 12

12-тӥ ЛЮКЕТ

1Иисус соослы мадёнъёсын вераны кутскиз: «Одӥг адями виноград бакча мерттэм но кенерен котыртэм, вина виятон гу гудӟем, каланча пуктэм, сое виноград будэтӥсьёс кие сётэм но ачиз кошкем.2Дыр вуэм но, виноград будэтӥсьёс доры, виноград емыш вайыны ляльчизэ ыстэм.3Нош виноград будэтӥсьёс сое кутӥллям но жугиллям, номыр но сётытэк келяллям.4Нош ик соос доры мукетсэ ляльчизэ ыстэм. Таизлэсь йырзэ изэн пась кариллям но сантэмаса келяллям.5Собере мукетсэ ляльчизэ ыстэм: тазэ вииллям; трос мукетъёссэ я жугыса лэзиллям, я виылӥллям.6Пумаз ини ыстэм аслэсьтыз одӥг гинэ яратоно пизэ но шуэм: ”Пиелэсь возьдаськозы”.7Нош виноград будэтӥсьёс ог-огзылы шуиллям: ”Та атай юртлы кузёе кылёно. Ойдолэ, мыныса сое виёме, солы сюроно ваньбур асьмелы луоз”.8Кутыса сое вииллям но виноград бакча сьӧры куштӥллям.9Виноград бакчалэн кузёез мар бен кароз? Лыктоз но виноград будэтӥсьёсты виылоз, виноград бакчазэ мукетъёслы сётоз.10Священной Гожтэмысь лыдӟемды ӧвӧл шат таӵе веранэз:

”Корка пуктӥсьёслэн кулэтэм карыса
куштэм иззы
корка сэреглэн улаз инъет йыр луыса пуксиз;
11та – Кузё-Инмарлэсь,
паймымон луэ асьмелэн син азямы”?»

12Иисусэз кутыны тыршизы, но калыклэсь кышказы; уго валатскизы, соос сярысь та мадён верамын шуыса; Собере Сое кельтыса, Со дорысь кошкизы.

13Кыл пыр янгыш карыса кутон вылысь Со доры куд-ог фарисейёсты но Иродлэсь адямиоссэ ыстӥзы.14Соос лыктыса Иисуслы шуизы: «Дышетӥсь! Ми тодӥськомы, Тон шонер лэсьтӥсь шуыса, кинлы но солы гинэ кельшыны турттыса уд улӥськы. Нокыӵе но ымныр шоры уд учкиськы, но Инмарлэн сюресэзлы шонер дышетӥськод. Яра-а кесарьлы выт тырыны, уг яра-а? Оло тыроно милемлы, оло ӧвӧл?»15Нош Со, соослэсь чеберъяськись луэмзэс тодыса, соослы шуиз: «Малы тӥ Мынэсьтым визьме сынаськоды? Вае Мыным динарий, Мон сое учко».16Соос вайизы. Соку соослы шуиз: «Кинлэн татын тусбуез суредамын, кинлэн та гожтӥськемез?» Соос шуизы: «Кесарьлэн».17Соослы ответ сётыса, Иисус шуиз: «Кесарьлэсьсэ кесарьлы сётэлэ, Инмарлэсьсэ – Инмарлы». Паймыса кылзӥзы Сое.

18Собере Иисус доры «улӟыса султон ӧвӧл» шуыса дышетӥсь саддукейёс лыктӥзы но Солэсь юазы:19«Дышетӥсь! Моисей милемлы гожтӥз: ”Кинлэн ке агаез кулыса кышнозэ нылпитэк кельтӥз ке, солэн выныз солэсь кузпалзэ аслыз кышно мед кароз но агаезлэсь выжызэ мед утёз”.20Сизьым агай-вынъёс вал: нырысетӥез кышнояськиз но нылпи кельтытэк кулӥз.21Кыкетӥез сое кышнолы вайиз, но кулӥз, со но нылпи ӧз кельты; озьы ик куинетӥез но.22Сизьымназы ик сое кышно каризы, нош нылпи ӧз кельтэ. Ваньзы бере та кышномурт но кулӥз.23Улӟыса султон нуналэ кулэмъёс улӟыса султӥзы ке, кудзылы со кышно луоз? Сизьымназы но сое кышно каризы вал уго».

24Иисус соослы ответ сётыса шуиз: «Тазьы-а тӥ Гожтэмъёсты но, Инмар кужымез но тодымтэеныды янгышаськоды?25Кулэмысь улӟыса султон бере уз но кышнояське, уз но бызе, Инмысь Кылчинъёс кадь улозы.26Кулэмъёслэн улӟыса султонзы сярысь Инмарлэсь куак дорысен Моисейлы ”Мон – Авраамлэн Инмарез, Исааклэн Инмарез, Иаковлэн Инмарез” шуэмзэ Моисейлэн книгаысьтыз ӧд лыдӟе шат?27Инмар – кулэмъёслэн Инмарзы ӧвӧл, Со – улэпъёслэн Инмарзы. Озьыен, тӥ туж зол янгышаськоды».

28Книга тодӥсьёс пӧлысь одӥгез та ченгешонэз кылӥз но, Иисуслэсь ӟеч ответ сётылэмзэ адӟыса, Со доры лыктыса юаз: «Вань курон-косонъёс пӧлысь кудӥз самой бадӟымез?»29Иисус солы ответ сётӥз: «Вань курон-косонъёс пӧлысь самой бадӟымез таӵе: ”Кылзы, Израиль! Асьмелэн Инмармы Кузё-Инмар – одӥг Кузё-Инмар;30Инмардэ Кузё-Инмарез вань сюлмыныд, вань лулыныд, вань визьмыныд, вань кужмыныд яраты”. Та самой бадӟымез курон-косон!31Кыкетӥез но таиз кадь ик: ”Матысьтэ астэ ачид кадь ик яраты”. Таослэсь бадӟымез курон-косон ӧвӧл».32Книга тодӥсь Солы шуиз: «Умой, Дышетӥсь! Зэмез верад Тон: Инмар одӥг гинэ, Со сяна, мукетыз ӧвӧл;33Сое вань сюлмын, вань визьмын, вань лулын, вань кужымен, матысьтэ но астэ ачид кадь ик яратон – тылын сутӥськись котькыӵе курбонъёслэсь, мукет курбон сётонъёслэсь бадӟымгес».34Иисус, талэсь визьмо ответ сётыны быгатэмзэ кылыса, солы шуиз: «Инмар Эксэйлыклэсь кыдёкын ӧвӧл ни тон». Та бере нокин но Солэсь юалляськыны ӧз дӥсьты ни.

35Храмын дышетыса улыкуз, Иисус шуиз: «Малы нош книга тодӥсьёс Христос Давидлэн Пиез шуыса верало?36Давид ачиз Святой Духен тыр луыса вераз:

”Кузё-Инмар мынам Кузё-Инмарелы шуиз:
Тынэсьтыд тушмонъёстэ пыд улад понытозям,
Мынам бурпалам пук”.

37Озьыен, ачиз Давид Сое Кузё-Инмар шуэ, кызьы Со солэн Пиез луоз?» Трос муртъёс Сое шумпотыса кылзӥськизы.

38Аслаз дышетоназ Со вераз: «Чаклаське книга тодӥсьёслэсь, кузь дӥськутэн ветлыны, калык люкаськон интыосын асьсэды ӟечкыламез яратӥсьёслэсь,39сӥнагогаосын калыклэн азьпалаз пукыны, сиён-юонъёс дыръя нырысетӥ радъёсын кылльыны яратӥсьёслэсь.40Соос, палкышноослэсь юртъерзэс сиисьёс, калык адӟиськон азьын кема вӧсяськисьёс, – чидантэм секытлы судить каремын луозы».

41Иисус ваньбур тырон шыкыс шоры пуксиз но учкыса улӥз, кызьы отчы калык коньдон тыре. Тросэз узыр муртъёс тросэн тыризы.42Куанер улӥсь палкышно лыктыса кык лепта понӥз. Кык лепта одӥг кодрант луэ.43Иисус дышетскисьёссэ матаз ӧтьыса шуиз: «Зэм ик тӥледлы верасько, та куанер палкышно ваньбур тырон шыкысэ тырисьёс пӧлысь ваньмызлэсь уно понӥз;44уго ваньмыз мултэсэз ваньысь тыризы, нош со куанер улыса но, кӧтсэ тырон понна маиз вань – ваньзэ понӥз».


*а 12:11 Пс. 117:22-23

*б 12:36 Пс. 109:1


предыдущая глава Глава 12 следующая глава