Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 10

10-тӥ ЛЮКЕТ

1Иисус отысь кошкиз, Иордан шур сьӧрысь Иудея музъеме вуиз. Нош ик Со доры калык люкаськиз; огдышем сяменыз соосты Со нош ик дышетыса улӥз.2Со доры фарисейёс лыктӥзы но визьзэ сынаса юазы: «Яра-а пиосмуртлы кышноеныз люкиськыны?»3Ответ сётыса, Со вераз: «Мар лэсьтыны тӥледлы Моисей косӥз?»

4Соос шуизы: «Моисей люкиськон сярысь гожтэт гожтыса люкиськыны лэзиз».5Иисус соослэн пумитазы шуиз: «Сюлэмды чурыт луэмен, со та курон-косонэз тӥледлы гожтӥз.6Дуннеез кылдытонлэн кутсконаз ик Инмар пиосмуртэн кышномуртэз кылдытӥз.7Соин ик пиосмурт аслэсьтыз атайзэ, анайзэ кельтоз но8аслаз кышноез борды лякиськоз, кыкназы одӥг лулмугор луозы; табере соос кык ӧвӧл, одӥг лулмугор ини.9Озьыен, мае Инмар огазеяз, сое адями медаз люкы».10Коркасен дышетскисьёсыз Солэсь нош ик со сярысь ик юазы.11Соослы Со шуиз: «Кин, кышноеныз люкиськыса, мукетсэ кышно басьтэ ке, со пыр со азон-калгон сьӧлыке пыре.12Кышномурт, картэзлэсь люкиськыса, мукетызлы бызе ке, со азон-калгон сьӧлыке пыре».

13Со доры нылпиосты вайылӥзы, соос борды киыныз мед йӧтӥськоз вал шуыса; нош дышетскисьёсыз вайылӥсьёсты пырыны лэзьытэк улӥзы.14Тае адӟыса, Иисуслэн туж вожез потӥз но соослы шуиз: «Мон доры нылпиосты ветлыны лэзе, эн люкетэ соослы, таӵеослэн Инмар Эксэйлыксы вань уго.15Зэм ик тӥледлы верасько: кин Инмар Эксэйлыкез пичи пинал кадь кабыл ӧз ке басьты, со отчы уз пыры».16Соосты ваньзэс ӟыгыртӥз, вылазы кизэ поныса, бакель кариз.

17Сюрес вылэ потыку, Со доры кыӵе ке но мурт бызьыса лыктӥз но, Солэн азяз пыдесъяськыса, Солэсь юаз: «Ӟеч Дышетӥсь! Быронтэм улонэз басьтон понна мон мар карыны кулэ?»18Иисус солы шуиз: «Малы тон Монэ ”ӟеч” шуиськод? Одӥг Инмар сяна, нокин но ӟеч ӧвӧл.19Таӵе курон-косонъёсты тодӥськод: азон-калгон сьӧлыке эн пыры; эн виы; эн лушкаськы; ӧрекчаськыса ӧвӧлтэмзэ эн вера; эн ултӥя; атайдэ но, анайдэ но сӥлы кар».20Нош со ответ сётыса шуиз: «Дышетӥсь, ваньзэ тае мон пинал дырысеным ик быдэсъяй».21Иисус со шоры учкиз, сюлмаз кельшиз, собере солы шуиз: «Одӥгез тыныд уг тырмы: мын, маид вань, ваньзэ вуза но кураськисьёслы сётъя, со понна тынад узырлыкед Инмын луоз; лыкты но, киростэ басьтыса, Мон сьӧры мын».22Та кылэз кылыса, солэн мылкыдыз лапказ, ӝоже усьыса кошкиз, солэн бадӟым юртъерез вал уго.

23Иисус, котырак учкыса, дышетскисьёсызлы шуиз: «Макем секыт трос узырлыксы ванё муртъёслы Инмар Эксэйлыке пырыны».24Солэсь кылъёссэ кылыса, дышетскисьёсыз куалектӥзы. Соослэн пумитазы Иисус нош ик вераз: «Пиналъёс! Кыӵе секыт ваньбурлы оскиськыса улӥсь муртъёслы Инмар Эксэйлыке пырыны!25Узыр муртлы Инмар Эксэйлыке пырон сярысь, верблюдлы капчигес вень пась пыр потыны».26Соос нош туж-туж паймизы но асьсэ куспын вераськизы: «Кин бен утиськыны быгатоз?»27Иисус соос шоры учкыса шуиз: «Адямиослы со луонтэм, нош Инмарлы луоно; Инмарлы номыр но луонтэмез ӧвӧл уго».

28Петр Солы вераны кутскиз: «Тани ми ваньзэ кельтӥмы но Тон сьӧры мыныны потӥмы».29Иисус солы ответ сётыса шуиз: «Зэм ик тӥледлы верасько: кин Мон понна, Евангелие понна корказэ, я агай-вынъёссэ, я сузэр-апайёссэ, я атайзэ, я анайзэ, я кышнозэ, я нылпиоссэ, я музъемзэ кельтӥз ке,30али, таӵе дыре, уллянъёс пӧлын улыса, сю пол тросгес коркаос, агай-вынъёс, сузэр-апайёс, атайёс, анайёс, нылпиос, музъем басьтытэк одӥгез но уз кыльы, вуоно даурын но быронтэм улон басьтытэк уз кыльы.31Азьпалаз мынӥсьёс тросэз пумаз кылёзы, но пумаз мынӥсьёс азьпала потозы».

32Сюрес вылын дыръязы, Иерусалиме тубыкузы, Иисус соослэн азьпалазы мынӥз, соос туж куалектэмын вал, Со бӧрсьы кышкаса мынӥзы. Дас кыксэс ик дораз ӧтьыса, нош ик Асэныз мар луоно сярысь вераны кутскиз:33«Тани асьмеос Иерусалиме тубиськомы, Адями Пиез архиерейёс, книга тодӥсьёс кие сётозы, Сое виыны судить карозы, Сое язычникъёс кие сётозы,34сантэмалозы Сое, жугозы Сое, Со вылэ сялалозы, виёзы Сое; куинетӥ нуналаз Со улӟыса султоз».

35Соку Иисус доры Зеведей пиос, Иаковен Иоанн, лыктыса шуизы: «Дышетӥсь! Милям потэ, Тон мед лэсьтод милемлы сое, мае ми курим».36Соослы Со шуиз: «Мар лэсьтэмме тӥ кулэ кариськоды?»37Соос Солы шуизы: «Лэзь вал милемыз Тынад данлыкад, огмес бурпалад пуксьыны, мукетмес – паллян палад».38Нош Иисус соослы шуиз: «Мар куремдэс асьтэос уд тодӥське. Луоз-а тӥляд Мынэсьтым юоно чашаме юэмды, пылатонэн, кудӥныз Мон пылатӥськисько, пылатӥськемды?»39Соос ответ сётӥзы: «Быгатӥськом». Нош Иисус соослы шуиз: «Мынэсьтым юоно чашаме юоды, пылатонэн, кудӥныз Мон пылатӥськисько, пылатӥськоды,40нош бурпалам, я паллян палам пуктыны – Мынам эрике ӧвӧл; отчы пуксёзы соос, кинъёслы со дасямын».41Тае кылыса, дасназы ик Иаковен Иоаннлы йыркуръяськыны кутскизы.42Иисус соосты ӧтьыса вераз: «Тодӥськоды ук, калыкъёслэн кивалтӥсьёссы шуыса лыдӟиськисьёс соосын кузёясько, кузёйыръёссы соосты киулазы возё.43Нош тӥ куспын озьы медаз луы: тӥ куспын кинлэн ассэ бадӟым каремез потэ, тӥледлы со ляльчи мед луоз;44тӥ куспын кинлэн ваньмызлэсь вылӥын луэмез потэ, со ваньмызлы ляльчи мед луоз.45Адями Пи но уго Ас вылаз ужатыны ӧз лыкты, Со Ачиз адямиослы ужаны-тыршыны, Аслэсьтыз лулзэ сётыса, троссэ сьӧлыкъёслэсь мозмытыны лыктӥз».

46Иерихонэ лыктӥзы. Иисус Аслаз дышетскисьёсыныз, трос калыкен ӵош Иерихонысь потон дыръяз сюрес дурын кураськыса пуке вал Тимейлэн Вартимей нимо синтэм пиез.47Та Иисус Назорей шуыса кылӥз но кесяськыны кутскиз: «Давидлэн Пиез Иисус! Жаля монэ».48Тросэз сое чус кариськыны косӥзы, нош со эшшо но юнгес кесяськыны кутскиз: «Эй, Давидлэн Пиез! Жаля монэ».49Иисус дугдӥз но сое дораз ӧтьыны косӥз. Синтэм муртэ ӧтьыса шуизы: «Эн кышка, султы, тонэ ӧте».50Вылысьтыз дӥсьсэ куштӥз, султӥз но Иисус доры лыктӥз.51Ответ сётыса, Иисус солэсь юаз: «Мар тыныд Мынэсьтым кулэ?» Синтэм мурт Солы шуиз: «Дышетӥсь! Синмы мед усьтӥськысал».52Иисус солы шуиз: «Мын, тынад осконэд тонэ утиз». Со соку ик адӟыны кутскиз, собере со Иисус сьӧры сюрес кузя кошкиз.


предыдущая глава Глава 10 следующая глава