Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 7

7-тӥ ЛЮКЕТ

1Со котыре Иерусалимысь вуэм фарисейёс но куд-ог книга тодӥсьёс люкаськизы.2Солэн куд-ог дышетскисьёсызлэсь кырсь, миськымтэ, киынызы нянь сиемзэс адӟизы но пыкылыны кутскизы.3Уго фарисейёс, вань иудейёс сямен ик, вашкала пересьёслэсь косэмзэс кылзӥськыса, кизэс чылк-чылк миськытэк нянь уг сиё.4Базарысь бертэм беразы но мисьтӥськытэк уг сисько. Вань на трос мукетыз, кудзэ соос быдэсъяно кариськизы: тусьтыосты, кружкаосты, пуртыосты, скамьяосты гылтон.5Собере фарисейёс но книга тодӥсьёс Солэсь юазы: «Малы Тынад дышетскисьёсыд, вашкала пересьёслэсь косэмзэс кылзӥськытэк, миськымтэ киынызы нянь сиё?»6Соослэн пумитазы Со шуиз: «Тӥ сярысь, чеберъяськисьёс сярысь, азьпалзэ тодытыса, Исаия пророк ӟеч вераз, солэн гожтэмын:

”Кылынызы та муртъёс Монэ сӥлы каро,
нош сюлмынызы Мынэсьтым кыдёкын уло.
7Адямиослэн малпам дышетонъёссылы,
курон-косонъёссылы дышетыса,
Монэ юнме гинэ сӥлы каро”.

8Уго, Инмарлэсь курон-косонъёссэ палэнтыса, тӥ адями косэмез быдэсъян борды басьтӥськиськоды, тусьтыосты, кружкаосты гылтон но трос мукет со выллем ужъёсты лэсьтӥськоды».9Соослы Иисус шуиз: «Ӟеч-а луоз, Инмарлэсь курон-косонзэ палэнтыса, пельысь пеле вуэм верандэс быдэсъяса улыны?10Моисей вераз ук: ”Атайдэ но, анайдэ но сӥлы кар”, нош ”атайзэ яке анайзэ урод кылын верась мурт кулонэн мед кулоз”.11Нош тӥ шуиськоды: ”Кин атаезлы яке анаезлы шуиз ке: ”Тӥледлы сётонозэ мон Инмарлы курбон (кузьым) сётыны сӥзи ни”,12со муртлы аслаз атаезлы яке аслаз анаезлы тӥ уд ни лэзиське номыр но лэсьтыны.13Асьтэлэн тупатэм сямъёсыныды Инмар кылэз палэнтӥськоды; мукет та выллем ужъёс лэсьтӥськоды».

14Вань калыкез котыраз ӧтьыса шуиз: «Ваньды ик Монэ кылзӥське но валатӥське.15Адями пушкы педлось пырем номыр но саптаны уг быгаты сое, нош мар потэ со пушкысь, со сапта адямиез.

16Кылыны пельыз вань мурт – мед кылоз!»17Калык пӧлысь корка пырем бераз дышетскисьёсыз Солэсь та мадён сярысь юазы.18Со шуиз: «Тӥ но сыӵе ик валасьтэмесь-а? Оло, уд валаське, ”адями пушкы педлось пырыса номыр но сое саптаны уг быгаты” шуэмез?19Малы ке шуоно со солэн сюлмаз уг пыры, кӧт пушказ пыре; отысь педло потэ, озьы котькыӵе но сиён сузяське».20Собере шуиз: «Адями пушкысь потэмез адямиез сапта;21малы ке шуоно пушкысь, адями сюлэмысь пото уродэсь-лекесь малпанъёс, азон-калгон сьӧлыке пырон, азыса-калгыса улон, адями виылон,22лушкаськонъёс, кузьым октон, уродлык, кескич, азыса-калгыса юрӟым улон, кӧтпӧсен улон, Инмарез сантэман, вылтӥяськон, визьтэмъяськон.23Вань та уродлык пушкысь потэ но адямиез сапта».

24Отысь потыса, Иисус Тирен Сӥдон ёросъёсы лыктӥз; корка пырыса, Солэн нокинэ но Ассэ тодматэмез уг поты вал, но ватӥськемез ӧз луы.25Со сярысь одӥг кышномурт кылыса лыктӥз но, Солэн дораз вуыса, азяз пыдесъяськиз – со кышнолэн нылызлэн пушказ пери пуке вылэм.26Но со кышномурт язычница вал, Сирофиникия музъемысь вал со. Нылыз пушкысь периез улляса мед поттоз шуыса, со Иисуслэсь куриськиз.27Нош Иисус солы шуиз: «Нырысь ик нылпиос кӧтсэс мед тырозы; нылпиослэсь няньзэс басьтыса, пуныослы куштыны ӟеч ӧвӧл ук».28Та кышномурт Солэн пумитаз шуиз: «Зэм, озьы, Кузёе; но пуныос но ӝӧк улын нылпиослэсь нянь пырыоссэс сиё ук».29Кышномуртлы Со шуиз: «Табере гуртад берт, та кылыд понна нылыд пушкысь пери потӥз ни».30Дораз бертыса, со адӟиз: нылыз пушкысь пери потэм, нылыз валесын кылле.

31Иисус Тирен Сӥдон каръёс котырысь кошкиз но, Дас каро музъем пыр потыса, нош ик Галилей зарезь дуре мынӥз.32Со доры пельтэм, могаса вераськись муртэ вайизы но, вылаз кизэ мед поноз вал шуыса, Солэсь куризы.33Иисус сое калык пӧлысь палэнэ нуиз, чиньыоссэ солэн пеляз понӥз но сялӟыса кыл бордаз йӧтӥськиз,34инме учкиз но лулӟиськыса солы шуиз: «Еффафа», со «усьтӥськы» шуэм луэ.35Соку ик солэн пельызлэн кылонэз усьтӥськиз, кылызлэн вераськон могӟетэз быриз но, со чылкыт вераськыны кутскиз.36Та сярысь нокинлы но вераны ӧз лэзьы. Но макем Со алӥз, сокем соос шараяса ветлӥзы.37Туж паймыса веразы: «Ваньзэ ӟеч каре: пельтэмъёсыз – кылӥсь, кылтэмъёсыз вераськись каре».


*а 7:7 Ис. 29:13


предыдущая глава Глава 7 следующая глава