Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 6

6-тӥ ЛЮКЕТ

1Отысь потыса, Иисус Аслаз улоно музъемаз бертӥз. Со бӧрсьы дышетскисьёсыз лыктӥзы.2Суббота нунал вуиз, Со сӥнагогаын дышетыны кутскиз; кылзӥськем муртъёс паймыса вераськизы: «Кытысен талы сётӥськемын? Кыӵе сыӵе визьлык Солы сётэмын? Кызьы таӵе паймымон ужъёс Солэн киыныз лэсьтӥсько?3Тӥрен ужась мурт ӧвӧл-а Со, Мариялэн пиез, Иаковлэн, Иосиялэн, Иудалэн, Симонлэн братсы ӧвӧл-а Со? Татын, асьме пӧлын ӧвӧл-а Солэн сузэръёсыз?» Озьы Со пумысен сьӧлыказы.4Иисус соослы шуиз: «Пророк сӥтэм-сантэм уг луы, луэ ке, луэ аслаз вордӥськем музъемаз, ӵыжы-выжыосыз дорын, аслаз дораз гинэ».5Татын Со нокыӵе но паймымон ужъёс лэсьтыны ӧз быгаты; кӧня ке висисьёсты гинэ вылазы кизэ поныса бурмытӥз.6Соослэн оскымтэзылы Со паймиз. Собере артысь бускель гуртъёстӥ дышетыса ветлӥз.

7Дас кыкназэс ик ӧтиз но соосты кыкен-кыкен лэзьылыны кутскиз, периосты улляса поттылыны кужым сётӥз.8Сюрес вылэ потыкузы, одӥг боды сяна, пуйы но, нянь но, кускерттоназы коньдон но басьтыны ӧз косы,9пыдазы огшоры пыдкутчан поныны косӥз, кык пумо дӥсян но басьтыны ӧз косы.10Соослы Со шуиз: «Кудаз ке корка пыриды, та интыысь кошкытозяды, отын ик улэ.11Кин ке тӥледыз пырыны ӧз ке лэзьы, тӥледыз ӧз ке кылзӥськы, соос дорысь потыкуды, соослэсь янгышъёссэс шарае поттон понна пыдысьтыды сюйзэ курткыса кельтэ. Зэм ик тӥледлы верасько: суд нуналэ, Содомен Гоморралы сярысь но, та городлы секытгес луоз».12Соос потӥзы но ӧпкельыса сьӧлыкъёслэсь куштӥськон сярысь тодытыса ветлӥзы.13Трос периосты улляса поттылӥзы, трос висисьёсты вӧйын зыраса бурмытылӥзы.

14Ирод эксэй Иисус сярысь кылӥз но, – Солэн нимыз тодмо вал ни, – «та Иоанн Пылатӥсь улӟыса султэм но, соин ик со пыр паймымон ужъёс лэсьтӥсько» шуиз.15Мукетъёсыз «Та Илия» шуизы. Нош мукетъёсыз шуизы: «Та пророк яке пророкъёс пӧлысь одӥгез».16Нош Ирод кылыса шуиз: «Иоанн со, мон солэсь йырзэ ӵогыса басьтӥ; со кулэмысь улӟыса султэм».17Та Ирод, Филипп вынызлэн Иродиада нимо кышноез понна, Иоаннэз кутытыса пытсэтэ ворсатӥз, малы ке шуоно та кышномуртэз со аслыз кышно кариз.18Иоанн Иродлы вера вал: «Выныдлэсь кышнозэ тыныд кышно карыны уг яра».19Иродиада со вылэ йыркуръяськыса, виемез потыса улӥз, но ӧз быгаты.20Ирод Иоаннлэсь кышкаса улӥз, со тодэ вал уго та пиосмурт шонер, дун-чылкыт улӥсь шуыса, соин ик сое утьыны тыршиз; солэсь кылзӥськыса трос лэсьтӥз, шумпотыса сое кылзӥськиз.21Тупамон нунал вуиз. Ирод, вордӥськем нуналзэ пусйыны шуыса, юон дыр кариз но аслэсьтыз кузёйыръёссэ, сюрс солдатэн кивалтӥсьёсты но Галилея музъемысь тӧроосты ӧтчаз.22Иродиадалэн нылыз пырыса эктӥз, Иродлы но, куноослы но со кельшиз. Эксэй нылашлы шуиз: «Кур, мар тыныд кулэ – ваньзэ сёто».23Кылзэ сётыса шуиз: «Мар гинэ тон мынэсьтым уд куры – ваньзэ сёто, ӝыны эксэйлыкме но сёто».

24Со ныл потыса анаезлэсь юаз: «Мар куроно?» Соиз шуиз: «Иоанн Пылатӥсьлэсь йырзэ».25Соку ик со дыртыса эксэй доры пыриз но солэсь куриз: «Иоанн Пылатӥсьлэсь йырзэ, тэркые поныса, али ик мыным сёт».26Эксэй куректонэ усиз. Но, куноосыз азьын кыл сётэмзэ тодаз вайыса, пумитъяськемез ӧз поты ини.27Соку ик эксэй аслэсьтыз мугор возьмасьсэ Иоаннлэсь йырзэ вайыны косӥз.28Со пытсэтэ пыриз, солэсь йырзэ ӵогыса тэркые понӥз но вайыса ныллы сётӥз, нош та ныл сое аслаз анаезлы сётӥз.29Та сярысь дышетскисьёсыз кылӥзы, лыктыса солэсь мугорзэ басьтӥзы но шайгуэ понӥзы.

30Апостолъёс Иисус доры люкаськизы но мар лэсьтэмзы, малы дышетэмзы сярысь ваньзэ Солы веразы.31Иисус соослы шуиз: «Асьтэ понна, калыктэм интые мыныса, ӧжытак шутэтске». Лыктӥсьёс, кошкисьёс трос луэмен, соослы сиськыны но маза уг луы вал.32Пыже пуксьыса, асьсэ понна калыктэм интые кошкизы.33Калык соослэсь кошкемзэс адӟиз, тросэз соосты тодмазы; вань городъёсысь пыдын мынӥсьёс татчы бызьыса азьлогес вуизы но Иисус котыре люкаськизы.34Потэм бераз Со трос калыкез адӟиз, Солы соос жаль потӥзы, возьмаськисьтэк кылем ыжъёс кадесь соос вал уго; Иисус соосты трос дышетыса улӥз.

35Огшап дыр ортчем бере дышетскисьёсыз Со доры лыктыса шуизы: «Та кыр инты, нош дыр трос ини,36Тон соосты артысь гуртъёсы, починкаосы лэзь, асьсэлы нянь мед басьтозы, соослэн номыр но сиёнзы ӧвӧл ук».37Соослэн пумитазы Иисус шуиз: «Тӥ соослы сиён сётэлэ». Солы соос шуизы: «Милемлы асьмелы мыныса, ог кык сю динарий тыр нянь басьтыса, соосты сюдоно ке шат?»38Нош Иисус соослэсь юаз: «Кӧня няньды тӥляд вань? Мынэлэ, учкелэ». Мыныса тодӥзы но шуизы: «Вить няньмы но кык чорыгмы вань».39Собере соосты Со ваньзэс люкрак вож гуждор вылэ пуктылыны косӥз.40Витьтон муртэн, сю муртэн чурен-чурен пуксьылӥзы.41Со вить нянез но кык чорыгез кутӥз, ин пала учкыса бакель кариз но, нянез тӥялтыса, дышетскисьёсызлы сётъяз, люкаськем калыклы соос мед люкылозы шуыса. Кык чорыгез но ваньмызлы люкиз.42Ваньзы сиизы, ваньзылэн кӧтсы тыриз.43Нянь юдэсъёсты, чорыглэсь кылем люкетъёссэ дас кык кудые тыраз люказы.44Нянь сиисьёс пӧлын ог вить сюрс пиосмурт вал.

45Ачиз калыкез келян дыръя дышетскисьёссэ, пыже пуксьыса, тупала, Вифсаида котыре, азьлогес выжыны косӥз.46Соосты келям бераз Ачиз гурезь йылэ вӧсяськыны тубиз.47Ӝыт пал пыжзы зарезь шорын вал ини, нош Со огназ музъем вылэ кылиз.48Со адӟиз тӧл пужит пельтэмен сэрен дышетскисьёсызлэсь ву вылын курадӟемзэс; ӵукна пал, ӟардон азьын, соос доры Со зарезь вылтӥ вамышъяса лыктӥз; вӧзтӥзы потыса кошкыны турттэ вал.49Солэсь зарезь вылтӥ вамышъяса лыктэмзэ адӟизы но, та пӧртмаськись, дыр, шуыса, черектӥськизы.50Сое адӟыса, ваньзы кышкатскизы. Соку ик соосын Со вераськыны кутскиз, соослы шуиз: «Йыг-йыг кариське, Мон со, эн кышкалэ».51Соослэн пыжазы пыриз; тӧл дугдӥз. Асьсэ куспын соос туж паймыса, абдраса улӥзы.52Сюлэмъёссы из кадь чурыт вылэмысь, нянь люкылыку луэм паймымон ужез адӟыса но, соос ӧз валатске.

53Тупала выжыса, Геннисарет музъеме вуизы, ярдуре дугдӥзы.54Иисус пыжысь потэм бере татын улӥсьёс соку ик Сое тодмазы но55та сярысь иворез быдэс шаеразы вуттӥзы. Солэсь кытынзэ тодэм беразы соку ик Со доры висисьёсты валесэнызы валче вайылыны кутскизы.56Кытчы гинэ Со ӧз вуы – гуртъёсы-а, городъёсы-а – котькытын но висисьёссэс кыре поттылӥзы, дӥсянэзлэн сӧзы бордаз ке но йӧтӥськыны мед лэзёз вал шуыса, Солэсь куриськизы; кинъёс Со борды йӧтӥськизы – бурмизы.


предыдущая глава Глава 6 следующая глава