Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 4

4-тӥ ЛЮКЕТ

1Зарезь дурын нош ик дышетыны кутскиз; Со доры трос калык люкаськиз, соин ик Со зарезь вылысь пыже пыроно луиз, отын Со пукиз, нош вань калык зарезь дурысь музъем вылын сылӥз.2Трос мадёнъёс пыр соосты Со дышетӥз. Дышетыса Со тазьы вераз:3«Кылзӥськелэ: тани кизись кизьыны потэм.4Кизьыкуз озьы луэм: куд-огез кидысэз сюрес дуре усем, тылобурдоос лыктӥллям но кокчаса быдтӥллям.5Куд-огез ӧжыт сюё, изо интые усиллям но ӝоген удаса потӥллям, малы ке шуоно отын сюез лазег вылэм;6шунды потэм но, шуяллям; выжызы ӧвӧл бере, куасьмиллям.7Куд-огез бышкись будосъёс пӧлы усиллям, бышкись будос ӝужам но кидысэз ӝокатэм, соин ик со емыш но сётымтэ.8Нош куд-огез, ӟеч музъеме усемез, пушъем, будэм но, кудӥз куамын, кудӥз куатьтон, кудӥз сю емыш сётэм».9Собере соослы шуиз: «Кылыны пельыз вань мурт – мед кылоз!»

10Калык кошкем бере Солэн вӧзаз дас кык дышетскисьёсыныз огазьын сылӥсьёс Солэсь та мадён сярысь юазы.11Иисус соослы шуиз: «Тӥледлы Инмар Эксэйлыклэсь ватӥськыса улӥсь зэмлыксэ тодон сётэмын, нош педлосьёслы ваньмыз мадёнъёс пыр гинэ тодытӥське.12Соин ик соос

синмынызы учко но – уг адӟо,
пельынызы кыло но – уг валало;
берытскизы ке, соослэн сьӧлыкъёссы куштӥськозы».

13Соослы шуиз: «Та мадёнэз уд валаське шат? Кызьы меда валалоды вань мадёнъёсыз?14Кизись мурт кыл кизе.15Сюрес дуре кизиськемез возьматэ сыӵе муртъёсты: соос пушкы кыл кизиське, кылэм беразы ик соос доры шайтан лыктэ но сюлмазы кизиськем кылэз лушкаса кошке.16Тазьы ик изо интые кизиськемез возьматэ сыӵе муртъёсты: соос кылэз кыло но соку ик сое шумпотыса кабыл басьто,17нош пушказы выжызы ӧвӧл, мылкыдзы вошъяськись; бӧрысь куректон дыръёс вуо ке, яке кыл понна улляны кутско ке, соку ик соос канжаськыса усьыло.18Бышкись будосъёс пӧлы кизиськемез возьматэ кылэз кылӥсь муртъёсты,19но та даурлэн сюлмаськонъёсыз, узырлыклы синмаськон но мукет кулэяськонъёс соос пушкы пыро но кылэз ӝокато, соин ик со емыштэк кыле.20Нош ӟеч музъеме кизиськемез возьматэ сыӵе муртъёсты: соос кылэз кылзо, сюлмазы поно но емыш ваё: одӥгез куамын, мукетыз куатьтон, куд-огез сю полэс».

21Соослы Иисус шуиз: «Сюсьтылэз посуда улэ яке кровать улэ пуктыны ваё шат? Сюсьтыл пуктонэ пуктон понна ӧвӧл-а?22Нокыӵе но лушкемлыклэн шарае потытэк кылемез уг луы; нокыӵе ватӥськемлэн но кыре потытэк кылемез уг луы.23Кылыны пельыз вань мурт – мед кылоз!»

24Соослы Иисус шуиз: «Чаклалэ кылэмдэс: кыӵе мертэтэн мерталоды, сыӵе мертэтэн ик тӥледлы но мертаськоз, тӥледлы, кылзӥсь муртъёслы, ватсаськоз на.25Кинлэн вань, солы сётэмын луоз, нош кинлэн ӧвӧл, маиз вань, соиз но басьтэмын луоз».

26Иисус шуиз: «Инмар Эксэйлык адямилэн музъеме куштэм кидысэзлы укша.27Изе но, султэ но, уйин но, нуназе но, кызьы уда, кызьы ӝужа кидыс – со уг тоды.28Уго музъем ачиз нырысь вож узьым поттэ, собере – шеп, шепе тыраз ю люка.29Емышез кисьма ке, соку ик сюрло келя, уго аран дыр вуиз».

30Иисус шуиз: «Маин ӵошатомы Инмар Эксэйлыкез? Яке кыӵе мадёнэн сое возьматомы?31Со горчица кидыс выллем: музъеме кизьыку, дунне вылысь вань кидысъёслэсь со векчи;32нош кизем бере удаса пушъе но вань шепо будосъёслэсь ӝужыт луэ, бадӟымесь вайёс лэзе, соку солэн саюлаз инмысь тылобурдоослэн пегӟыса улэмзы луэ».

33Кылзыны кужымзы тырмытозь, та выллем трос мадёнъёсын Иисус кыл вераса дышетӥз.34Мадёнъёстэк соослы Со номыр но ӧз вера, нош дышетскисьёсызлы, асьсэ понна кыльыку, ваньзэ валэктыса вералляз.

35Со нуналэ ӝыт Иисус соослы шуиз: «Тупала выжоме».36Калыкез лэзем беразы Сое, пыжын пукисез, сьӧразы басьтӥзы. Соин ӵош мукет пыжъёс но вал.37Шимес тӧлпери ӝутскиз; тулкымъёс пыж борды шуккиськылӥзы, соин сэрен пыже тыраз ву люкаськиз.38Со кӧлӥз пыжлэн бер люкетаз, йыролтэс вылын. Сое сайкатыса шуизы: «Дышетӥсь! Быриськомы ни, Тыныд нокыӵе но уг поты шат?»39Султыса Со тӧлэз дугдыны косӥз, зарезьлы алыса шуиз: «Чалмытскы, дугды». Тӧл дугдӥз но, туж чалмыт луиз.40Собере соослы Со шуиз: «Малы тӥ сокем кышкасесь? Малы тӥляд осконды ӧвӧл?»41Туж кышкаса-куалекъяса, соос куспазы вераськизы: «Кин Со сыӵе – тӧл но, зарезь но Солэсь кылзӥсько?»


*а 4:12 Ис. 6:9-10


предыдущая глава Глава 4 следующая глава