Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАРКЛЭСЬ ӞЕЧ ИВОР

Глава 2

2-тӥ ЛЮКЕТ

1Кӧня ке нунал ортчыса, Иисус нош ик Капернауме лыктӥз; тодмо луиз, Со коркан шуыса.2Со куспын ик трос калык люкаськиз, ӧс дорын но буш инты ӧй вал ини. Иисус соосты дышетыса улӥз.3Ньыль ӵошен ӝутыса, Со доры пери шуккем муртэз вайизы.4Трос калык люкаськемен сэрен Солэн матаз лыктэмзы ӧз луы; коркалэсь липетсэ усьтыса, валесэныз валче пери шуккем муртэ Со доры васькытӥзы.5Соослэсь оскемзэс адӟыса, Иисус висисьлы шуиз: «Пияш! Тынад сьӧлыкъёсыд куштӥсько».

6Татын пуко вал книга тодӥсьёс пӧлысь куд-огъёсыз, сюлмазы соослэн таӵе малпан вал:7«Малы Со сокем Инмарез сантэма? Одӥг Инмар сяна, кин сьӧлыкъёсты куштыны быгатэ?»8Иисус соку ик таослэсь таӵе малпанзэс Ас духеныз тодӥз но соослы шуиз: «Малы тӥ сюлмады сыӵе малпанэн улӥськоды?9Мар капчигес? Пери шуккем муртлы ”сьӧлыкъёсыд куштӥсько” шуыны-а, яке ”султы, басьты валестэ но ветлы” шуыны-а?10Адями Пилэсь музъем вылын сьӧлыкъёсты куштыны кужым ваньзэ тӥ мед тододы шуыса, – висись муртлы шуиз:11«Тыныд верасько: султы, басьты валестэ но гуртад берт».12Со соку ик султӥз, валессэ басьтыса, калык азьтӥ потӥз, ваньзы талы паймизы но Инмарез данъяса шуизы: «Милям таӵеез ноку но адӟылэммы ӧй вал на».

13Иисус нош ик зарезь дуре потӥз; вань калык Со доры мынӥз, Со соосты дышетыса улӥз.14Ортчыкуз, выт бичан дорын пукись Алфей пи Левиез адӟыса, солы шуиз: «Мон сьӧры мын». Соиз султӥз но Со сьӧры кошкиз.15Иисус солэн корказ сиськыса улон дыръя Соин ӵош дышетскисьёсыз, озьы ик выт бичасьёс но сьӧлыкоос огазьын сиськизы; трос кузя соос вал, соос Со сьӧрын ветлӥзы.16Книга тодӥсьёс но фарисейёс, Солэсь выт бичасьёсын, сьӧлыкоосын валче сиськемзэ адӟыса, Солэн дышетскисьёсызлы шуизы: «Кызьы со озьы, выт бичасьёсын, сьӧлыкоосын Со огазьын сие-юэ?»17Тае кылыса, Иисус соослы шуиз: «Висисьтэмъёслы эмъясь кулэ ӧвӧл, висисьёслы кулэ; шонер улӥсьёсты ӧтьыны Мон ӧй лыкты, сьӧлыкоосты ӧпкельыса сьӧлыкъёссылэсь куштӥськонэ ӧтьыны лыктӥ».

18Иоаннлэн дышетскисьёсыз но фарисейёслэн дышетскисьёссы визяса улӥзы. Иисус доры лыктыса шуо: «Малы Иоаннлэн но, фарисейёслэн но дышетскисьёссы визяло, нош Тынад дышетскисьёсыд визез уг утё?»19Иисус соослы шуиз: «Эмеспи соос пӧлын улон дыръя сюанчиос быгато-а визяны? Эмеспи соос пӧлын улон дыръя соос визяны уг быгато.20Но вуозы нуналъёс, – соос дорысь эмеспи басьтӥськоз, соку, со нуналъёсы, соос визялозы но.

21Нокин но пӧсьтэм дӥськутэз гужатымтэ дэраен уг кышъя, малы ке шуоно выль кышъет вужез бордысь ӟезиськоз, соку пасез уката но уродгес луоз.22Выль винаез нокин но вужмем сепысъёсы уг лэзьы, малы ке шуоно выль вина сепысъёсыз кесёз но, соку вина кисьтӥськоз, сепысъёс но арам луозы; выль винаез выль сепысъёсы лэзьыны кулэ».

23Одӥгаз суббота нуналэ Солы кизем ю бусы вамен потоно луиз; мынон куспетӥзы Солэн дышетскисьёсыз ю шепъёсты чигылыны кутскизы.24Соку фарисейёс Солы шуизы: «Учкы, мар соос суббота нуналэ даурто, – лэсьтыны ярантэм ужез лэсьто?!»25Соослы Иисус шуиз: «Давидлэн но соин ӵош луэмъёслэн кӧтсы сюман дыръя Давидлэн ма каремез сярысь ноку но лыдӟемды ӧвӧл шат?26Кызьы со Авиафар архиерей дыръя Инмар корка пырем но священникъёслы гинэ сиыны ярано курбон нянез сием, асэныз валче ветлӥсьёслы но сётэм?»27Соослы Иисус вераз: «Суббота адями понна, адями суббота понна ӧвӧл;28соин ик Адями Пи субботалы но кузё луэ».


предыдущая глава Глава 2 следующая глава