Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАТФЕЙЛЭСЬ ӞЕЧ ИВОР

Глава 4

4-тӥ ЛЮКЕТ

1Собере Дух Иисусэз кыр дуннее нуиз, диавол Солэсь визьзэ мед сыналоз шуыса.2Ньыльдон нунал но ньыльдон уй визям бераз, кӧтыз сюмаз.3Со доры визь сынась лыктыса шуиз: «Инмар Пи ке Тон, вера, та изъёс нянь мед луозы».4Нош Иисус солы ответ сётыса шуиз: «Гожтэмын:

”Нянен гинэ уз улы адями,
Инмарлэн ымысьтыз потэм котькудӥныз кылыныз улоз со”».

5Собере Сое диавол святой городэ нуиз, храмлэн липет йылаз султытӥз6но шуиз: «Инмар Пи ке Тон, тэтчы уллань; гожтэмын ук:

”Инмар Тонэ Аслаз Кылчинъёсызлы утьыны косоз,
Тонэ ки йылазы соос ӝутыса нуозы,
пыдыныд из борды медад канжаськы шуыса”».

7Иисус солы шуиз: «Гожтэмын озьы ик: ”Инмаредлэсь Кузё-Инмарлэсь визьзэ эн сына”».8Табере диавол Сое туж ӝужыт гурезь йылэ нуиз но дунне вылысь вань эксэйлыкъёсты но соослэсь данзэс возьматӥз,9со Солы шуиз: «Пыдесъяськыса мыным йыбырттӥд ке, ваньзэ тае мон Тыныд сёто».10Соку Иисус солы шуиз: «Кошкы Мон дорысь, шайтан; гожтэмын ук:

”Инмаредлы Кузё-Инмарлы йыбыртъя,
Солы Огназлы гинэ ужаса-тыршыса ул”».

11Соку диавол Со дорысь кошкиз; собере Кылчинъёс Со доры лыктӥзы, Солы служить каризы.

12Иоанн пытсэтэ сюремын шуыса, Иисус кылӥз но Галилеяе кошкиз.13Назаретысь кошкем бераз Со Завулонэн Неффалимлэн ёросысьтызы зарезь дурысь Капернаум каре улыны интыяськиз.14Мед быдэсмоз Исаия пророк пыр веран, кудӥз шуэ:

15«Завулон музъем, Неффалим музъем,
зарезь дуре мынон сюрес вылын,
Иордан сьӧрын, язычникъёслэн Галилеязы,
16Пеймыт азьын пукись калык быдӟым югытэз адӟиз,
кулонлэн шаераз но вужераз пукисьёслы югыт пиштыны кутскиз».

17Та дырысен Иисус тодытыса вераны кутскиз: «Ӧпкельыса сьӧлыкъёстылэсь куштӥське, уго матэ вуиз Ин Эксэйлык».

18Иисус, Галилей зарезь дуртӥ ортчыкуз, кык агай-вынъёсты адӟиз: Петр шуон Симонэз но солэсь Андрей вынзэ зарезе калтон куштыса улон дыръязы. Соос чорыгаса улӥсьёс вал.19Соослы шуиз: «Ойдолэ Мон сьӧры, Мон тӥледыз адями кутылӥсь каро».20Калтонъёссэс куштӥзы но соку ик Со сьӧры мынӥзы.21Отысен, азьпала мынон сяменыз, мукет кык агай-вынъёсты адӟиз – Зеведей Иаковез но солэсь Иоанн вынзэ. Соос атаенызы Зеведеен пыжын калтонзэс кышъяса пуко вал. Соосты но ӧтиз.22Соос соку пыжзэс но, атайзэс но кельтыса, Со сьӧры мынӥзы.

23Иисус быдэс Галилеяетӥ, сӥнагогаосазы дышетыса, Эксэйлыклэсь Евангелизэ тодытыса, адямиослэсь котькыӵе но висёнъёссэс, ляблыкъёссэс бурмытылыса ветлӥз.24Со сярысь ивор быдэс Сирияе кылӥськиз. Со доры вань лябӟемъёсты, олокыӵе но черъёсын висисьёсты, курадӟисьёсты, перияськемъёсты, кулыса усьылӥсьёсты, пери шуккемъёсты вайылӥзы; Иисус соосты бурмытылӥз.25Со сьӧрын Галилеяысь, Дас каро музъемысь, Иерусалимысь, Иудеяысь но Иордан тупалась трос адямиос ветлӥзы.


*а 4:4 Кык. зак. 8:3

*б 4:6 Пс. 90:11-12

*в 4:10 Кык. зак. 6:13

*г 4:16 Ис. 9:1-2


предыдущая глава Глава 4 следующая глава