Выбрать язык
Книги Ветхого Завета
Книги Нового Завета
с русским текстом1Тани, Мон Аслэсьтым Кылчинме ыстӥсько,
Мынам азям со сюрес дасялоз,
возьмамтэ дыръя Аслаз храмаз Кузё-Инмар лыктоз,
Кинэ тӥ утчаськоды,
Сӥзёнлэн Кылчинэз лыктоз, Кудзэ тӥляд адӟемды потэ;
тани, Со лыктэ, – шуэ Саваоф Кузё-Инмар.
2Кин бен чидалоз Солэн лыктон нуналаз,
кин бен сылыны быгатоз Со лыктэм бере?
Уго Со – тыл кадь ӵыжатэ, пень кадь сузя.
3Пуксёз ӵыжатыны, азвесез сузяны,
Левийлэсь пиоссэ чылкытатоз,
Кузё-Инмарлы курбонэз шонер сётон понна
соосты зарниез кадь, азвесез кадь ӵыжатоз.
4Соку Иудалэн, Иерусалимлэн курбонэз, вашкала нуналъёсы кадь,
азьвыл аръёсы кадь, Кузё-Инмарлы ярамон луоз.
5Суд лэсьтыны тӥ доры лыкто,
ӝоген шарае потто туно-пеллёосты,
азыса-калгыса улӥсьёсты, пӧяськыса кыл сётӥсьёсты,
медоослы уждунзэс ӝегатӥсьёсты,
палкышноосты, анайтэм-атайтэм нылпиосты ӝикатыса возисьёсты,
палэнысь лыктэм муртъёсты уллясьёсты, –
Мынэсьтым кышкасьтэмъёсты, – шуэ Саваоф Кузё-Инмар.
6Мон Кузё-Инмар, Мон уг вошъяськиськы;
соин ик тӥ, Иаков выжыысь нылпи, ӧд быре.
7Атайёстылэн нуналъёссы бордысен кутскыса
Мынам пуктон-косонъёсы бордысь тӥ палэнскиды,
соосты уд быдэсъяське;
Мон пала берытске, соку Мон тӥ пала берытско, –
шуэ Саваоф Кузё-Инмар.
Тӥ шуоды: «Кызьы милемлы берытсконо?»
8«Адямилы яра-а Инмарлэсь лушканы?
Нош тӥ Мынэсьтым лушкаськоды».
Тӥ шуоды: «Кызьы ми Тынэсьтыд лушкаськомы?»
«Дасэтӥ люкетэз сётытэк, салам-кузьым вайытэк».
9Каргаса тӥ каргамын, малы ке шуоно тӥ, быдэс калык,
Мынэсьтым лушкаса улӥськоды.
10Дасэтӥ люкетъёстэс вае ваньбур возён коркам,
Мынам коркам сиён-юон мед луоз;
озьы ке но Монэ эскере, – шуэ Саваоф Кузё-Инмар, –
уг усьты-а Мон инлэсь пасьёссэ но
уг кисьты-а тӥ вылэ тырмымон ӟечлыкъёсме?
11Тӥ понна бусыысьтыды емышъёстэс быдтыны
нымы-кибыослы уг сёты,
сад бакчаысьтыды виноградпудды но емыштэк уз кыльы, –
шуэ Саваоф Кузё-Инмар.
12Вань калыкъёс тӥледыз «шудо муртъёс» шуозы,
уго тӥляд улоно музъемды туж синмаськымон луоз, –
шуэ Саваоф Кузё-Инмар.
13Кышкатэк Мыным пумит кылъёс вераськоды, – шуэ Кузё-Инмар.
Тӥ шуоды: «Кыӵе пумит кылъёс ми Тыныд вераськомы?»
14Тӥ шуиськоды: «Юнме гинэ Инмарлы ужаса-тыршыса улӥмы,
кыӵе пайдазэ басьтӥмы Солэсь пуктон-косонъёссэ быдэсъяса
улэммы понна,
Саваоф Кузё-Инмар азьын пеймыт-сьӧд дӥськутэн
ветлэммы понна?
15Али ми сьӧлыклэсь кышкасьтэмъёсты
шудо муртъёс шуыса лыдъяськомы:
законлы пумит улӥсьёслэн котькытын азинлыксы вань,
Инмарлэсь визьзэ сынало ке но, но соос ваньзы быдэсэсь».
16Инмарлэсь кышкасьёс ог-огзылы шуо:
«Кузё-Инмар адӟе, кылэ, Со азьын буре ваён книга гожтӥське,
кытчы гожтэмын Кузё-Инмарлэсь кышканэн,
Сое сӥё-сано карыса улӥсьёслэн нимъёссы».
17Соос Мынам адямиосы луозы, – шуэ Саваоф Кузё-Инмар, –
тупатэм-пуктэм нуналам соос Мынам люкетэ луозы;
соосты гажаса-жаляса утё, кызьы адями гажа-жаля аслыз
ужаса-тыршыса улӥсь вордэм пизэ.
18Соку тӥ нош ик адӟыны быгатоды
шонер улӥсьлэсь но сьӧлыклэсь кышкатэк улӥсьлэсь
маин ог-огзылэсь висъяськемзэс,
Инмарлы ужаса улӥсьлэсь но Солы ужатэк-тыршытэк улӥсьлэсь
пӧртэмлыксэс.
Глава 3