Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Ветхого Завета

Книги Нового Завета

предыдущая главаследующая главас русским текстом

МАЛАХИЯ ПРОРОКЛЭН КНИГАЕЗ

2-тӥ ЛЮКЕТ

1Тани, тӥледлы, священникъёс, та курон-косон:2Ӧд ке кылзӥське, сюлэмдэс сётыса, Мынэсьтым нимме данъяны ӧд ке кутске, – шуэ Саваоф Кузё-Инмар, – тӥ вылэ карган лэзё, тӥлесьтыд бакель каронъёстэс каргало, каргасько но ини, малы ке шуоно солы тӥ сюлэмдэс уд сётӥське.

3Тани, курбон сӥльдылэсь пельпумзэ басьто,
пудодылэсь сӥтьсэ ымнырады пазьго, –
праздник нуналъёсы ваем курбон пудоостылэсь сӥтьсэс,
соку тӥледыз кыедэн валче поттыса куштозы.
4Соку тӥ тододы: та курон-косонме Мон Левийлы сётэм сӥзёнме
утён понна сётӥ, – шуэ Саваоф Кузё-Инмар.
5Солы сётэм сӥзён-косонэ улон сётӥсь, каньыллык вайись
сӥзён-косон вал.
Сое Мон солы Мынэсьтым кышканэн мед улоз шуыса сётӥ,
зэм, со Мынэсьтым кышкаса улӥз,
Мынам нимы азьын куалекъяса улӥз.
6Кылаз-ымаз зэмлыклэн законэз улӥз,
вераськоназ ӧрекчаськонэз ӧй вал;
тупаса, шонерлыко улыса, Монэн ӵош ветлӥз,
троссэ сьӧлыко ужъёслэсь палэнтылӥз.
7Уго священниклэн ымыз тодонлыкез утьыны кулэ,
солэн кылысьтыз-ымысьтыз законэз утчало,
малы ке шуоно со Саваоф Кузё-Инмарлэн ивортӥсез.
8Нош тӥ та сюрес вылысь палэнскиды,
трос калык понна законэз утёнын тӥ визь тугасьёс луиды,
Левийлы сётэм сӥзён-косонме тугады-таркады, –
шуэ Саваоф Кузё-Инмар.
9Со понна Мон но тӥледыз вань калыклэн син азяз
кӧтвеськантэм, сӥтэм-сантэм муртъёс каро,
малы ке шуоно тӥ Мынам сётэм сюресэ кузя уд мынӥське,
законэз тӥяса, одӥгзэ адямиез вылӥ кариськоды,
мукетсэ – ултӥяськоды.
10Ваньмылэн асьмелэн Атаймы одӥг ӧвӧл-а?
Одӥг со ик Инмар асьмеды ӧз кылдыты-а?
Нош малы бен асьмеос ог-огмылы пумит кескич лэсьтӥськомы,
атайёсмылы сётэм сӥзён-косонэз сӧриськомы?
11Кескич уж лэсьтэ Иуда,
юрӟым уж быдэсме Израильын, Иерусалимын,
уго Иуда Кузё-Инмарлэсь яратоно святынязэ сантэмаз,
мурт инмарлы йыбыртъясь нылэз кышно басьтӥз.
12Тае лэсьтӥсь муртлэсь, возьмаськыса улӥсьсэ, ответ сётӥсьсэ,
Саваоф Кузё-Инмарлы курбон вайисьсэ
Кузё-Инмар Иаковлэн тылысъёсысьтыз быдтоз.
13Тани, эшшо мар тӥ лэсьтӥськоды на:
Кузё-Инмарлэсь курбон тыронзэ
викышъяса, куараен бӧрдыса кисьтэм синвуэн коттытӥськоды,
соин ик табере Со тӥляд салам-кузьымъёсты шоры уг ни учкы,
тӥляд киысьтыды каньыллык понна ваем курбондэс но
кабыл уг ни басьты.
14Тӥ шуоды: «Мар понна?» Со понна:
Кузё-Инмар адӟись вал егит дырысьтыды кышноеныд кусыпъёстэс;
кышнодэ ӧрекчаса возид,
нош со тынад эшед, законъя басьтэм кышноед луэ ук.
15Тазьы ик ӧз лэсьты-а одӥг мурт, кудӥз пушкын улэ вал вылӥ дух?
Мар бен лэсьтӥз та «одӥг мурт»?
Солэн Инмарлэсь сётэм выжы басьтэмез потэ вал.
Озьыен, лулдэс-сюлэмдэс чылкыт возе,
егит дыръяды ваем кышнодэс одӥгды но ӧрекчаса медад возе.
16Тон сое синазькыль кариськод ке, кошкыны лэзь сое, –
шуэ Израильлэн Инмарез Кузё-Инмар;
йӧнтэм ужъёс дӥськуттэ сапталозы, – шуэ Саваоф Кузё-Инмар;
соин ик лулдэс-сюлэмдэс чылкыт возе; кескичъяськыса эн улэ.
17Тӥ кылыныды Кузё-Инмарлэсь вожзэ поттӥськоды, шуиськоды:
«Маин ми Солэсь вожзэ поттӥськомы?»
Соин, тӥ шуиськоды:
«Котькудӥз урод уж лэсьтӥсь мурт Кузё-Инмар азьын ӟеч,
соос бордын Солэн ӟеч эрикез»
яке «Кытын шонер судить карись Инмар?»


предыдущая глава Глава 2 следующая глава