Выбрать язык
Книги Ветхого Завета
Книги Нового Завета
с русским текстом2-тӥ книга
1Иудеяысь вань калык кутӥз но дас куать аресъем Озияез атаез, Амасия, интые эксэе пуктӥз.2Со Елафез выльдӥз, эксэй кулыса атайёсыз доры кошкем бере сое Иудея кие берыктӥз.
3Эксэе пуксьыкуз, Озиялы дас куать арес вал, витьтон кык ар ӵоже со Иерусалимын эксэй пуконын пукиз; анаезлэн нимыз Иехолия, со Иерусалимын вордскемын вал.4Атаез, Амасия, кадь ик со Кузё-Инмар азьын ярамон ужъёс лэсьтыса улӥз.5Инмарлэсь кышканэн улыны дышетӥсь Захария улон нуналъёсы со Инмарлы вазиськылӥз; Кузё-Инмарлы вазиськылыкуз, Инмар солы юрттылӥз.6Со мынӥз но филистим калыкен ожмаськиз, Гефлэсь борддоръёссэ, Иавнеялэсь борддоръёссэ, Азотлэсь борддоръёссэ куашкатӥз; Азот ёросэ городъёс пуктылӥз, филистим калык доры но.7Инмар солы филистим калыклы пумит, Гур-Ваалын улӥсь арабъёслы пумит, меун калыклы пумит ожмаськыны юрттылӥз.8Аммон калык Озиялы выт тыриз, солэн нимыз Египетын но тодмо луиз, уго со туж кужмо вал.9Сэрего капка йылэ Озия каланчаос пуктылӥз, нёжаллэн капкаез вылэ но, сэреге но соосты юнматӥз.10Луоё кыре каланчаос пуктӥз, трос ву возён гуос гудӥз, уго трос пудоез вал, улыг интыосын но, ӵошалъёсын но, музъем ужасьёсыз, сад будэтӥсьёсыз гурезьёсын вал, Кармилын но, со музъем ужез яратэ вал уго.
11Отрядъёсын оже потӥсь армиез но Озиялэн вал, – эксэйлэн одӥгез валтӥсез Хананиялэн кивалтэм улсаз Иеиел подъясь но Маасея эскерись-чаклась соосты лыдъяса список лэсьтӥзы.12Кышкасьтэм ожгарчиос пӧлысь быръемын вал выжыослэн вань йыръёссы, соос кык сюрс куать сю кузя вал.13Соослэн ож кужымен кивалтэм улсазы куинь сю сизьым сюрс вить сю кышкасьтэм ожгарчиос, эксэйлы юрттӥськыса, тушмонлэн пумитаз ожмаськыны султылӥзы.14Соослы, вань ожгарчиосызлы Озия щитъёс, шибодыос, корт изьыос, корт дӥсьёс, пукыӵъёс, зӥръян изъёс дасяз.15Иерусалиме со усто малпам машинаос лэсьтӥз, соосты каланчаос, сэрег йылъёсы пуктылӥз ньӧлъёсты ыбылытыны, бадӟымесь изъёсты зӥръяны. Солэн данэз кыдёке вӧлмиз, уго солы паймымон амалэн юрттэт вуыса, со кужмо луиз.
16Кужмо луэм бераз со вылтӥяськыны кутскиз но, со сое быронэ нуиз, Инмарез Кузё-Инмар азьын со йыруж лэсьтӥсь луиз, – Кузё-Инмарлэн храмаз ӵындытон курбон сётон ӝӧк вылын ладанэн ӵындытыны пыриз.17Со бӧрсьы мынӥз Азария священник, соин ӵош Кузё-Инмарлэн тямыстон священникъёсыз, умоесь адямиос.18Соос Озия эксэйлы пумит кариськизы, шуизы: «Озия, тыныд уг яра Кузё-Инмарлы ӵындытон ортчытыны, со ӵындытон ортчытыны пуктэм Аарон пиослэн, священникъёслэн, ужзы; вӧсяськон коркась пот, тон законлы пумит уж лэсьтӥд, та понна Инмар Кузё-Инмар дорын тыныд сӥ-дан уз луы».19Озия йыркуръяськыны кутскиз, нош кияз солэн ӵындытон кадилоез; священникъёслы йырзэ кур карем бераз ӵындытон курбон сётон ӝӧк дорын, Кузё-Инмарлэн корказ, священникъёслэн син азязы солэн кымесаз гижлочер потӥз.20Со шоры Азария архиерей, вань священникъёс учкизы; тани солэн кымесаз гижлочер потӥз. Сое отысь потыны косӥзы, со ачиз но дыртыса потыны кутскиз, Кузё-Инмар сое вӧсь кариз уго.21Озиялэн кулытозяз гижлочерез ӧз быры, со нимаз коркан улӥз, Кузё-Инмарлэн корказ пыраны лэземын ӧй вал. Нош солэн Иоафам пиез эксэй коркаен, та музъемысь калыкен кузёяськиз.
22Озиялэсь мукет ужъёссэ кутсконысеныз пумозяз гожъяз Амослэн пиез Исаия пророк.23Озия атайёсыз кадь ик кулӥз, атайёсыныз огазе сое эксэйёслэн шайгу бусыязы ватӥзы, уго шуо вал: со гижлочерен висись. Со интые эксэе пуксиз Иоафам пиез.
Глава 26