Выбрать язык
Книги Ветхого Завета
Книги Нового Завета
с русским текстом1Иудеяын Ахаз дас кыкетӥ арзэ эксэйын пукыку, Самарияын Илалэн Осия пиез Израильлы эксэе пуксиз, со укмыс ар ӵоже эксэйын пукиз.2Кузё-Инмар азьын со ярантэм ужъёс лэсьтыса улӥз, но солэсь азьвыл улэм Израиль эксэйёс кадь ӧз.
3Солы пумит Ассириялэн Салманассар эксэез урдскиз, Осия солы тэрытскыса, выт тырыса улоно луиз.4Ассириялэн эксэез шӧдӥз, Осия солы тэрытскемысь дугдэ но Египетлэн Сӥгор эксэез доры адямиоссэ ыстэ, арлы быдэ Ассириялэн эксэезлы вытсэ уг ни нуллы шуыса. Соку Ассириялэн эксэез сое киулаз басьтэ но пытсэт корка ворсатэ.
5Ассириялэн эксэез быдэс Израиль музъем вылэ пыре но, Самария доры вуыса, сое куинь ар ӵоже котыртэмын возе.6Осия эксэйын укмысэтӥ арзэ пукыкуз, Ассириялэн эксэез Самарияез киултэ но израиль калыкез Ассирияе улыны нуэ, соосты Гозан шур дурысь Халахе, Хавор шур дуре, Мидияысь городъёсы улыны интыя.
7Израиль пиос Египет музъемысь, фараонлэн, Египет эксэйлэн, киулысьтыз соосты поттӥсь Инмарзы Кузё-Инмар азьын сьӧлыкаса, мурт инмаръёсты сӥлы карыса улыны кутскизы,8Кузё-Инмарлэн израиль пиос азьысь уллям калыкъёслэсь сямъёссэс санэ поныса улыны кутскизы, Израиль эксэйёслэн сямъёссыя улыны кутскизы;9Инмарзы Кузё-Инмар азьын израиль пиос ярантэм ужъёс лэсьтыса улыны кутскизы – вань городъёсазы вырйылъёсы вӧсяськон интыос пуктылӥзы, возьмаськон каланча бордысен кутскыса юнматэм город дорозь;10ас доразы сульдэръёс-статуяос пуктылӥзы, Астарталэсь сульдэрзэ вань вырйылъёсы, вань сайуло писпуос улэ интыяллязы,11Кузё-Инмарлэн соос дорысь уллям калыкъёсыз музэн вань вырйылъёсын ӵындытонъёс ортчытъяны кутскизы, урод ужъёс лэсьтыса, Кузё-Инмарлэсь вожзэ поттылӥзы,12сульдэръёслы ужаса-тыршыса улыны кутскизы. Та пумысен Кузё-Инмар соослы шуиз вал: «Тазьы эн лэсьтэ».
13Соку Кузё-Инмар вань пророкъёсыз пыр, вань азьпал адӟисьёс пыр Израильлы но, Иудеялы но алыса вералляз: «Урод сюресъёсты вылысь берытске, чакласа-утьыса возе Мынэсьтым атайёстылы сӥзьыса сётэм курон-косонъёсме, пуктон-косонъёсме, вань дышетонъёсме, кудъёссэ Мон Аслам ляльчиосы, пророкъёсы пыр тӥледлы сётӥ».14Нош соос ӧз кылзӥське, Инмарзылы Кузё-Инмарлы оскисьтэм атайёссы музэн вогъяськыса улӥзы.15Инмарлэсь Кузё-Инмарлэсь пуктон-косонъёссэ синазькыль карылӥзы, атайёсынызы кутэм сӥзён-косонэз но, Солэсь усьтыса веранъёссэ но, кудъёсыныз Со соосты алыса вералляз, алекъяськон сьӧры мынӥзы, алекъяськыса улыны кутскизы, ёрос калыкъёс сьӧры мынӥзы, та сярысь Кузё-Инмар вераз вал, соос кадь эн лэсьтэ шуыса.16Инмарзылэсь Кузё-Инмарлэсь вань курон-косонъёссэ палэнтӥзы но асьсэлы ӵыжатыса кык кунянъёслэсь тусбуйзэс кисьтӥзы, тыпы сурдэ вӧсяськон лэсьтӥзы, вань ин кужымъёслы йыбыртъяса улӥзы, Вааллы ужаса-тыршыса улӥзы,17пиоссэс, нылъёссэс тыл пыр поттылӥзы, тунаськизы, пелляськылӥзы; Кузё-Инмарлэн азяз мар ярантэм, со ужъёсты лэсьтылыны кутскизы но Солэсь вожзэ поттылӥзы.18Кузё-Инмар израиль калыклы туж вожзэ поттӥз но Аслаз азьысьтыз соосты донгытӥз. Иуда выжы сяна, татчы нокин но ӧз кыльы.19Иуда но Кузё-Инмарлэсь курон-косонъёссэ ӧз быдэсъя, израиль калыклэн сямъёсызъя, кызьы соос лэсьтылӥзы, со но озьы ик лэсьтылӥз.20Израильлэн вань выжыосыз бордысь Кузё-Инмар палэнскиз, соосты зӥбыт-востэм кариз, таласьёслэн киулазы соосты сётӥз, пумаз ини соосты Аслаз азьысьтыз палэнтӥз.
21Израиль калык Давидлэн юрт бордысьтыз усиз но Наватлэсь Иеровоам пизэ эксэе пуктӥз. Иеровоам израиль калыкез Кузё-Инмар бордысь палэнтӥз но соосты туж бадӟым сьӧлык пӧлы пыртӥз.22Иеровоам кыӵе сьӧлыкъёс лэсьтӥз, соосты ваньзэ израиль калык лэсьтыса улӥз, соослэсь ӧз палэнскылы,23Аслаз ляльчиосыз, пророкъёс пыр кызьы вераз Кузё-Инмар, Аслаз азьысьтыз Израилез палэнтытозь. Аслаз музъем вылысьтыз Израиль Ассирияе улыны нуэмын, отын со туннэ нуналозь но улэ.
24Ассириялэн эксэез Вавилонысь, Кутаысь, Авваысь, Емафысь, Сепарваимысь калыкез поттӥз но израиль калык интые Самарияысь городъёсы улыны интыяз. Самарияез соос киулазы басьтӥзы но солэн городъёсаз улыны кутскизы.25Отын улыны кутскон вакытазы Кузё-Инмарез санэ понытэк улэмзы понна Кузё-Инмар соос вылэ сьӧсь пӧйшуръёсты (левъёсты) ыстылӥз но, адямиосты соос виылӥзы.26Ассириялэн эксэез доры ивор вуттыса шуизы: «Самариялэн городъёсаз тынад ваем, улыны интыям калыкъёсыд со музъемлэн Инмарезлэсь законзэ уг тодо, со понна Со соос вылэ сьӧсь пӧйшуръёсты лэзе, тӥни, соос виыло соосты, малы ке шуоно со музъемлэн Инмарезлэсь законзэ уг тодо».27Ассириялэн эксэез косон сётыса шуиз: «Отысь поттэм священникъёсты пӧлысь одӥгзэ отчы ыстэ; отчы мыныса, со отын мед улоз, со музъемысь Инмарлэн законэзлы соосты со мед дышетоз».28Самарияысь мукет азе улыны нуэм священникъёс пӧлысь одӥгез бертӥз, Вефиле улыны интыяськиз но дышетыса улӥз, кызьы Кузё-Инмарез сӥлы карыса улыны кулэ.
29Котькудӥз калык аслэсьтыз инмарзэ лэсьтӥз но самарян калыклэн гурезь йылъёсысь куалаосаз соосты пуктӥз, – котькудӥз калык аслаз улоно городаз пуктӥз:30Вавилон калык лэсьтӥз Суккот-Бенофез, кути калык Нергалэз, емаф калык Ашимаез,31аввий калык лэсьтӥз Нивхазэз но Тартакез, Сепарваим калык аслаз инмаръёсызлы Адрамелехлы но Анамелехлы пиоссэс тылын сутыса курбон сётылӥзы.32Со виын ик Кузё-Инмарез но сӥлы карылӥзы, асьсэ пӧлысь священникъёсты пуктылӥзы, соос гурезь йылъёсысь куалаосын вӧсьёс ортчытъязы.33Кузё-Инмарез сӥлы каризы, но ас калыкъёссылэн сямъёссыя, кытысь соос поттэмын вал, ас инмаръёссылы но йыбыртъяса улӥзы.
34Туннэ нуналозь но соос асьсэлэн вашкала сямъёссыя уло: Кузё-Инмарлэсь уг кышкало, Кузё-Инмарлэсь Иаковлэн пиосызлы, кинлы Со Израиль ним сётӥз, сӥзем пуктон-косонъёсызъя, сямъёсызъя, законъёсызъя, курон-косонъёсызъя уг уло.35Кузё-Инмар сӥзён-косон пыр соосын кусып кылдытыса шуиз: «Мурт инмаръёсты сӥлы карыса эн улэ, соослы эн йыбыртъялэ, соослы курбон эн сётъялэ.36Нош быдӟым кужымен, юн суйбыгытэн тӥледыз Египет музъемысь поттэм Кузё-Инмарез сӥлы каре, Солы йыбыртъялэ, Солы курбон сётъялэ,37Солэсь тӥ понна гожтэм пуктон-косонъёссэ, лэсьтон-пуктонъёссэ, законзэ, курон-косонъёссэ вань улоно нуналъёсады быдэсъяны тырше, мурт инмаръёсты санэ поныса эн улэ.38Тӥледын кутэм сӥзён-косонме эн вунэтэ, мурт инмаръёслы йыбыртъяса эн улэ.39Одӥг Инмардэс Кузё-Инмарез гинэ сӥлы карыса улэ, Со тӥледыз вань тушмонъёстылэн киулысьтыз мозмытоз».
40Нош соос ӧз кылзӥське, асьсэлэн вашкала сямъёссыя лэсьтылӥзы.41Та калыкъёс Кузё-Инмарез сӥлы карылӥзы, со виын ик асьсэлэн сульдэръёссылы йыбыртъяса улӥзы. Соослэн нылпиоссы, нылпиоссылэн нылпиоссы туннэ нуналозь но лэсьто озьы ик, кызьы лэсьтӥзы атайёссы.
Глава 17