Выбрать язык
Книги Ветхого Завета
Книги Нового Завета
с русским текстом1Ахавлэн Самарияын сизьымдон пиосыз вал. Ииуй, гожтэтъёс гожтыса, Самарияе Изреельысь кивалтӥсьёслы, тӧроослы, Ахавлэсь нылпиоссэ будэтӥсьёслы ыстӥз, соослэн таӵе вал пуштроссы:2«Та гожтэт тӥ доры вуиз ке, тӥ дорын кузёдылэн пиосыз вань бере, тӥляд ожмаськон уробоосты, валъёсты, юнматэм карды, ожмаськон тӥрлыкты вань бере,3кузёдылэн пиосыз пӧлысь самой умойзэ, ярамонзэ быръе но сое атаезлэн эксэй пуконаз пуктэ, кузёдылэн юртэз-семьяез понна ожмаське».4Соос туж кышкатскизы но шуизы: «Тани, со азьын кык эксэйёс сылыны ӧз чидалэ, кызьы нош ми чидаломы?»5Эксэй юртэн кивалтӥсь, городлэн йырыз, тӧроос, эксэйлэсь нылпиоссэ будэтӥсьёс Ииуйлы тазьы вераны ыстӥзы: «Ми тынад ляльчиосыд, мар верад, сое ик лэсьтомы; ми нокинэ но эксэе ум пуктэ, кызьы тыныд кулэ, озьы ик лэсьты».
6Ииуй кыкетӥ ползэ таӵе пуштросъем гожтэт ыстӥз: «Тӥ мынам адямиосы ке, мынэсьтым кылъёсме санэ понӥськоды ке, соку ӵуказе, кузёдылэн пиосызлэсь йыръёссэс басьтыса, мон доры та дыре ик Изрееле лыктэ». Нош эксэйлэн сизьымдон пиосыз вал; соосты будэтӥзы городысь сӥё-дано адямиос.7Соос доры гожтэт вуэм бере соос эксэй пиосты, сизьымдон муртэ, кутӥзы но бышкыса виизы, йыръёссэс, корзинае поныса, Ииуй доры Изрееле ыстӥзы.8Ыстэм мурт лыктыса ивор вуттӥз но шуиз: «Эксэй пиослэсь йыръёссэс вайизы». Ииуй шуиз: «Ӵукнаозьлы соосты капка выжые кык люке тыре».9Ӵукна ик потыса султӥз но вань калыклы шуиз: «Тӥ янгыш ӧвӧл. Тани мон кузёелы пумит ӝутски, сое вии, нош соосыз ваньзэс кин вииз?10Нош табере тодэ, Ахавлэн выжыез сярысь Кузё-Инмарлэн одӥгез но верам кылыз пыд улэ уз усьы; Кузё-Инмар лэсьтӥз сое, мае вераз Аслаз Илия ляльчиез пыр».11Ахавлэн Изреельысь юртаз вань улӥсьёсты Ииуй вииз, вань кузёйыръёсты, солэсь матысь муртъёссэ, солэсь священникъёссэ, одӥг улэпсэ но со ӧз кельты.
12Султыса кошкиз но Самарияе вуиз. Сюрес кузя мыныкуз, Беф-Екед дорын, пудо возьман интыын,13Ииуй Иудеялэн Охозия эксэезлэсь агай-вынъёссэ пумитаз, соослы со шуиз: «Кинъёс тӥ?» Соос шуизы: «Ми Охозиялэн агай-вынъёсыз, эксэйлэн пиосызлэсь, эксэйлэн анаезлэн пиосызлэсь тазалыксэс тодыны мынӥськомы».14Ииуй шуиз: «Соосты улэпкын кутэ». Соосты улэпкын кутӥзы но бышкаса виизы – ньыльдон кык муртэ – Беф-Екед гудӟем вӧзы, соос пӧлысь одӥгез но улэп ӧз кыльы.
15Отысен со кошкиз но Рихавлэсь Ионадав пизэ пумитаз, со Ииуйлэн пумитаз лыктэ вал, сое ӟечкыласа шуиз: «Мынам сюлмылэн тынад сюлмыдлы ӟеч карыны ӟеч мылкыдыз вань, нош тынад сюлмыдлэн мынам сюлмылы ӟеч карыны ӟеч мылкыдыз вань-а?» Ионадав шуиз: «Вань». Ииуй шуиз: «Озьы ке, вай кидэ». Со кизэ сётӥз но аслаз ожмаськон уробояз сое ӝутӥз.16Солы шуиз: «Монэн ӵош мын но Кузё-Инмарез яратэме шоры учкы». Сое ожмаськон уробояз пуктӥз.17Самарияе вуэм бераз со Ахавлэсь Самарияе вань кылем муртъёссэ вииз, озьы сое со чылкак быдтӥз, кызьы Кузё-Инмар Илиялы вераз вал.
18Ииуй вань калыкез люказ, соослы со шуиз: «Ахав Вааллы ӧжыт ужаз-тыршиз, Ииуй солы тросгес ужалоз-тыршоз.19Озьыен, мон доры люкалэ Вааллэсь вань пророкъёссэ, солэсь вань ужась-тыршисьёссэ, вань священникъёссэ, лыктытэк нокин но медаз кыльы, малы ке шуоно мон Вааллы туж бадӟым курбон сёто. Нош кин ке ӧз лыкты, со улэп уз кыльы». Ииуй тае визьмын малпаса лэсьтӥз Вааллы ужась-тыршисьёсты быдтон понна.20Ииуй шуиз: «Вааллы сӥзем праздник ортчытонэ люкалэ калыкез». Люкаськон сярысь ялӥзы.21Ииуй быдэс Израиле ӧтчаськисьёсты ыстӥз, соку Вааллэн вань ужась-тыршисьёсыз лыктӥзы. Одӥг адями но лыктытэк ӧз кыльы; ваньзы Вааллэн корказ пыризы, Вааллэн корказ тыраз калык люкаськиз.22Дӥськут утисьлы Ииуй шуиз: «Вааллэн ужась-тыршисьёссылы ваньзылы дӥськут вай». Соослы со дӥськут вайиз.23Рихавлэн Ионадав пиеныз Ииуй Вааллэн корказ пыриз но Вааллэн ужась-тыршисьёсызлы шуиз: «Чаклалэ, эскере, пӧлады ӧвӧл-а Кузё-Инмарлы ужась-тыршись муртъёс, малы ке шуоно татын Вааллы ужась-тыршисьёс гинэ луыны кулэ».24Курбонъёс, тылын сутӥськись курбонъёс сётылон борды соос басьтӥськизы. Нош Ииуй коркалэн палэназ тямыстон муртэ пуктӥз но соослы шуиз: «Адямиос пӧлысь кинлэн ке лулыз утиськиз ке, кинъёсты мон тӥляд киулады сётӥсько, со утиськемлэн лулыз интыын луоз».
25Тылын сутӥськись курбонэз сётэмзы бере Ииуй ӝог ветлӥсьёслы, кивалтӥсьёслы шуиз: «Мынэлэ, бышкалэ соосты, одӥгез но кошкыса медаз вуы». Соосты лэчыт мечъёсын бышказы, ӝог ветлӥсьёс, кивалтӥсьёс соосты сэрпаллязы но, городэ мыныса, Вааллы сӥзем куалае пыризы.26Вааллы сӥзем куалаысь йыбыртъян юбоосты поттыса сутӥзы,27Вааллэсь сульдэрзэ пыргытӥзы, Вааллы сӥзем куалаез куашкатӥзы; со интыез жоб макеосты куян-кисьтан интылы пӧрмытӥзы, туннэ нуналэ но отчы жоб макеосты кисьтало, куяло.28Ииуй Израиль музъемысь Вааллы йыбыртъянэз чылкак быдтӥз.29Озьы ке но Наватлэн Иеровоам пиезлэн Израилез сьӧлыке пыртэм ужъёсызлэсь Ииуй ӧз палэнскы: Вефильын, Данын сылӥсь зарни кунян сульдэръёслэсь ӧз куштӥськы.
30Кузё-Инмар Ииуйлы шуиз: «Мар Мынам син азям шонерлыко-ярамон вал, мае тон мылысь-кыдысь лэсьтӥд, Ахавлэн выжыезлы Мынам сюлмам улӥсь малпанъёсты быдэстэмед понна ньылетӥ выжыозь тынад пиосыд Израильлэн эксэй пукон вылаз пукозы».31Нош Ииуй Израильлэн Инмарезлэн Кузё-Инмарлэн законэзъя вань сюлэмзэ поныса улыны ӧз тыршы. Израилез сьӧлыке пыртӥсь Иеровоамлэн сьӧлыкъёсызлэсь со ӧз куштӥськы.
32Со нуналъёсы Кузё-Инмар Израиль музъемез люкетъёсын вандылыса люкылыны кутскиз, Азаил Израильлэсь ожгарчиоссэ солэн вань люкетъёсаз уськытъяз.33Иорданлэсь шундыӝужан палзэ, быдэс Галаад музъемез, Арнон шур дурысь Ароер бордысен кутскыса, Гад, Рувим, Манассия выжыослэсь музъемзэс, Галаадэз но, Васанэз но Азаил киултӥз.
34Ииуйлэн вань мукет ужъёсыз сярысь, мар со лэсьтӥз, батырлыко ужъёсыз сярысь Израиль эксэйёслэн книгаязы гожтэмын.35Ииуй кулӥз но, атайёсыныз огазе Самарияе сое ватӥзы. Со интые пиез, Иоахаз, эксэе пуксиз.36Самарияын Ииуй Израилен кызь тямыс ар ӵоже эксэй пуконын кивалтыса улӥз.
Глава 10