Выбрать язык
Книги Ветхого Завета
Книги Нового Завета
с русским текстом1Пророк пиос пӧлысь одӥгзэ Елисей ӧтиз но солы шуиз: «Кусъёстэ дум, кияд вӧйын сосуд кут но Галаадысь Рамоф каре мын.2Отчы вуид ке, Намессийлэн Иосафат пиезлэсь Ииуй пизэ утча, дораз мын но агай-вынъёсыз пӧлысь сое потыны кос, пыдлось комнатае сое пырты.3Вӧйын сосудэз басьты но солэн йыр вылаз кисьты, шу солы: ”Тазьы шуэ Кузё-Инмар: тонэ, вӧйын зырӟыса, Израильлы эксэе пукто”. Собере ӧстэ усьты, бызь, возьмаса эн улы».
4Пинал пи, пророклэн медоез, Галаадысь Рамоф каре мынӥз.5Со вуиз. Тани ожгарчиослэн кивалтӥсьёссы пуко, со шуиз: «Ожгарчиослэн кивалтӥсьсы, мынам тыныд веран кылы вань». Соку Ииуй шуиз: «Ваньмы пӧлысь кинлы?» Со шуиз: «Тыныд, ожгарчиослэн кивалтӥсьсы».6Султыса со корка пыриз. Пинал пи солэн йыр вылаз вӧй кисьтӥз, солы со шуиз: «Тазьы шуэ Кузё-Инмар Израильлэн Инмарез: ”Тонэ Израильлы, Кузё-Инмарлэн калыкезлы, вӧйын зырӟыса, эксэе пукто.7Аслад кузёедлэсь, Ахавлэсь, выжызэ тон быдтод, Иезавельлэн киыныз быдтэм Мынам ляльчиосылэсь, пророкъёслэсь, вирзэс кисьтэм понна, Кузё-Инмарлэн вань ляльчиосызлэн вирзы понна Мон пунэм берыкто.8Ахавлэн вань выжыез кулоз-быроз, Израильысь Ахавлэсь борддор борды педло потасьёссэ – пытсэтын пукисьёссэ но, Израиле кылемъёссэ но – ваньзэс быдто.9Ахавлэн выжыезлы, Наватлэн Иеровоам пиезлэн выжыезлы кадь ик, Ахиялэн Вааса пиезлэн выжыезлы кадь ик лэсьто.10Нош Иезавелез Изреель бусыын айы пуныос сиёзы, нокин но сое уз ваты”». Ӧссэ усьтӥз но бызьыса кошкиз.
11Кузёезлэн медоосыз доры Ииуй потӥз но, солы шуизы: «Ӟечен-а? Та визьзэ ыштэм малы тон доры ветлӥз?» Соослы со шуиз: «Тӥ тодӥськоды со адямиез, солэсь мар верамзэ но».12Соос шуизы: «Зэм ӧвӧл, вера милемлы». Со шуиз: «Мыным со но со вераз, шуиз: ”Тазьы шуэ Кузё-Инмар: тонэ, вӧйын зырӟыса, Израильлы эксэе пукто”».13Соос дыртӥзы, котькудзы асьсэлэсь дӥськутсэс басьтӥзы но солэн азяз, тубат вылэ вӧлдӥзы, гумыоссэс пелляны кутскыса шуизы: «Ииуй эксэе пуксиз!»
14Намессийлэн Иосафат пиезлэн Ииуй пиез Иорамлы пумит ӝутскиз; нош Иорам вань израиль ожгарчиосын ӵош Галаадысь Рамоф карын вал, Сириялэн Азаил эксэезлы пумит сылонын возьмаськыса улӥзы.15Нош ачиз Иорам эксэй берытскиз Изреельын яраосызлэсь эмъяськон понна, Сириялэн ожгарчиосыз сое яраё каризы вал, Сириялэн Азаил эксэеныз ожмаськыкуз. Соку Ииуй шуиз: «Тӥ монэн соглаш ке, соку одӥг мурт но городысь медаз кошкы Изрееле ивор вуттон понна».16Ииуй вал вылэ пуксиз но Изрееле кошкиз, отын Израильлэн Иорам эксэез яраоссэ эмъяса улэ вал, [Сириялэн кужмо, батырлыко Азаил эксэеныз Рамоф карын ожмаськыку, сири ожгарчиос сое яраё каризы вал], соку Иудеялэн Охозия эксэез Иорамен адӟиськыны лыктэмын вал.17Изреельын, каланча йылын, возьмаськись сылӥз, Ииуйлэсь лыктӥсь уллёзэ адӟыса, со шуиз: «Адями уллёез мон адӟисько». Соку Иорам шуиз: «Буш вал вылын ветлӥсез кут, соослэн пумитазы сое ысты, соослы мед вералоз: ”Ӟечен-а лыктӥськоды?”»18Буш вал вылын ветлӥсь солэн пумитаз потыса шуиз: «Тазьы шуэ эксэй: ”Ӟечен-а лыктӥськод?”» Ииуй шуиз: «Мар тынад ужед ӟечен-а лыктӥсько? Мон сьӧры мын». Возьмаськись ивор вуттыса шуиз: «Соос доры вуиз, нош берен уг ни лыкты».19Мукетсэ буш вал вылын ветлӥсез ыстӥзы, соос доры вуыса, со шуиз: «Тазьы шуэ эксэй: ”Ӟечен-а лыктӥд?”» Ииуй шуиз: «Мар тынад ужед ӟечен-а лыктӥ. Мон сьӧры мын».20Возьмаськись ивор вуттыса шуиз: «Соос доры вуиз, нош берен уг ни лыкты. Солэн мынэмез Намессийлэн Ииуй пиезлэн кадь, уго со, визьтэммем кадь, валэн ворттыса лыктэ».
21Соку Иорам шуиз: «Валъёсты кыткы». Солэсь ожмаськон уробозэ кыткизы. Израильлэн эксэез Иорам, Иудеялэн эксэез Охозия потӥзы, котькудӥз аслаз ожмаськон уробояз султӥз. Ииуйлэн пумитаз потӥзы но Изреель пилэн Навуфейлэн бусыяз пумиськизы.22Иорам Ииуез адӟем бераз шуиз: «Ӟечен-а вуид, Ииуй?» Соиз шуиз: «Кызьы ӟечен луоз, тынад анаед Иезавель азыса-калгыса, трос тунаськон-пелляськонъёс ортчытъяса улэ бере?»23Иорам валзэ берыктӥз но ворттыса кошкиз, со Охозиялы шуиз: «Охозия, асьмеды вузало!»24Нош Ииуй пукыӵсэ золтӥз но Иорамлэн пельпумъёсыз вискы йӧттӥз, ньӧл солэн сюлэм пыртӥз потӥз, ожмаськон уробо вылаз со пограз.25Аслаз кузёйырызлы, Бидекарлы, Ииуй шуиз: «Ӝут сое но Изреель пилэн Навуфейлэн бусыезлэн ана вылаз нуыса кушты, уго тодад вай али, кызьы асьмеос ӵошен солэн атаезлэн, Ахавлэн, бӧрсяз вал вылын мынӥмы но кызьы Кузё-Инмар со сярысь азьпалзэ тодытыса вераз:26”Зэм ик, Навуфейлэсь но солэн пиосызлэсь вирзэс мон толон адӟи, – шуэ Кузё-Инмар, – табере та бусыын тыныд пунэмзэ берыкто”. Озьыен, Кузё-Инмарлэн верам кылызъя сое кут но бусые кушты».
27Тае адӟыса, Иудеялэн эксэез, Охозия, садысь корка пала, сюрес кузя ворттыса кошкиз. Со сьӧры Ииуй уйиськыса мынӥз, со шуиз: «Сое но ожмаськон уробо вылаз тышкалэ». Та вал Ивлеам вӧзысь Гур вырйылын. Со ворттыса Мегиддонэ вуиз но отчы кулӥз.28Ляльчиосыз сое Иерусалиме нуизы но атайёсыныз огазе, Давидлэн городаз, шайгуэ ватӥзы.29Ахавлэн Иорам пиезлэн дас одӥгетӥ араз Охозия Иудеяе эксэй пуконэ пуксиз вал.
30Ииуй Изрееле вуиз. Нош Иезавель ивор басьтэм бераз синдурзэ буяз, йырсизэ чеберъяз но укно шоры учкыса улӥз.31Ииуй капкатӥ пырем бере Иезавель шуиз: «Ас эксэйзэ виись, Замврий, ӟечез адӟиз-а?»32Соку Ииуй синъёссэ укно пала ӝутыса шуиз: «Кин монэн огкылысь, кин?» Со шоры кык, куинь евнухъёс учкизы.33Со шуиз: «Куштэ сое отысь». Иезавелез куштӥзы. Солэн вирыз борддор борды, валъёс вылэ пызйиз. Сое пыд улазы лёгазы.34Ииуй лыктыса сиськиз, юиз но шуиз: «Со каргам кышнолэсь шӧйзэ утчаса шедьтэ но ватэ, уго со эксэй ныл».35Сое ватыны мынӥзы но йыркобызэ, пыдъёссэ, кимышъёссэ сяна, мугорзэ ӧз шедьтэ.36Берытскыса Ииуйлы ивортӥзы. Со шуиз: «Таӵе вал Аслаз ляльчиез Фесваысь Илия пыр Кузё-Инмарлэн верам кылыз: Изреель бусыын Иезавельлэсь шӧйзэ айы пуныос кесялозы,37Изреельысь ана вылын Иезавельлэн шӧйыз бусыысь кыедлы пӧрмоз, ”татын Иезавель ватэмын” – нокин но уз шуы».
Глава 9