Слово Твое - светильник ноге моей и свет стезе моей

Библия на финно-угорских языках



Библия

Выбрать язык

Книги Нового Завета

предыдущая главаследующая главас русским текстом

ИОАННОНДИ ПАНЧФ НЯЙФКС

Глава 12

Авась, цёра идняц и драконць

1Менельса эвондась оцю дивань тяштькс: ава, кона щафоль шиса. Сонь пильгонзон ала ульсь ковсь и прясонза – кемгафтува тяштьста каштаз.2Сон ульсь пеки, и сярятьфть эзда юватькшнесь и маятась, вдь сась сонь шачфтома пингоц.

3Менельса эвондась дивань лия тяштькс: мон няень кабаконашка толу-якстерь дракон, кона ульсь сисем пря и кемонь сюра мархта, и прянзон лангса – сисем оцязоронь каштаст.4Сон пулосонза тяезень и ёрдазень модать лангс менелень тяшттнень колмоце пяльксснон. Драконць стясь шачфты авать инголи, нилемс иднять, мзярда ся шачи.5Авась шачфтсь идня, цёраня, кона кармай ваномост кшнинь байдекса сембе ломаньтналхнень. И кепотьфоль сонь идняц Шкайти и Сонь оцязоронь озама вастонцты.6А авась ворьгодсь шавмодав, коса тейнза аноклафоль Шкайть эзда васта. Тоса сонь аннезь-симнезь тёжянь кафта сятт кодгемонь ши.

Менельса ушедсь тюрема

7Менельса ушедсь тюрема: архангел Михаил и сонь ангелонза тюрсть драконть мархта, а драконць и сонь ангелонза тюрсть синь мархтост.8Но драконць и ангелонза ульсть сяськфт, и тейст ашезь кадов ни менельса васта.9Кабаконашка драконць, кунардонь куйсь, кона лемневи идемэвозькс и Сатанакс, сембе масторлангонь ломаттнень васькафнисна, ёрдафоль эсь ангелонзон мархта масторлангти.10И мон кулень кайги вайгяль, кона корхтась менельса:
«Тяни сась идемась и вийсь,
и Шкаеньконь Оцязорксшиц,
и Сонь эздонза кучф Христость азорксшиц,
сяс мес минь кемай ялганьконь муворгофтысна ёрдаф тяста,
ся, кие шинек-венек муворгофнезень синь
Шкаеньконь инголе.
11Синь сяськозь сонь Верозть верса
и Шкаень валть пачфнемаса.
Синь, нльне, эсь эряфснон аноктольхть максомс,
аф пелемок куломать эзда.
12Кенярдеда ина, менельхть и эсонза сембе эряйхне!
Но кальдяв мода лангса и оцюведьса эряйхненди,
сяс мес идемэвозсь валгсь тейнть,
оцюдонга оцю кяжса палозь,
вдь содасы, кржа лядсь сонь пингтонза».

13Мзярда драконць шарьхкодезе: сон ёрдаф масторти, кармась панцемонза цёрань шачфты авать.14Но авати максфтольхть кабаконашка куцьканонь кафта пацят, туза лиезь шавмодав тейнза аноклаф вастти, коса куйти аф сатови, и коса кармайхть аннемонза-симнемонза колма пяле мархта кизот.15Куйсь кргакстсь кургстонза авать мельге ведь, кона шудесь ляй лаца, салалезе шудись авать.16Но модась лездсь авати: сон панжезе кургонц и нилезе ляйть, конань драконць кргакстозе эсь кургстонза.17Драконть кяжец лаказевсь авать лангс, и сон тусь тюрема авать лия идензон мархта, конат ванфнесазь Шкайть кошардомвалонзон и конат кирдихть Иисус Христосонь эзда азф валти.


предыдущая глава Глава 12 следующая глава